ދިރާގުން މިއަހަރުގެ އެޕްރެންޓިސްޝިޕް ޕްރޮގްރާމް ފަށައިފި

ތަމްރީނު ދިނުމަށާއި ވަޒީފާގެ ދާއިރާއިން ކުރިއެރުން ހޯދުމުގެ ފުރުސަތު އިތުރުކޮށް އަމިއްލަ ނަފްސަށް ކުރާ އިތުބާރާއި މަސައްކަތުގެ ދާއިރާގައި ކެރިގެން ކުރިއަށް ދިއުމުގެ ގަބިލްކަން ހޯދައިދިނުމުގެ ގޮތުން ދިރާގުން ކުރިއަށް ގެންދާ އެޕްރެންޓިސްޝިޕް ޕްރޮގްރާމް ފަށައިފި އެވެ.

ކޮންމެ އަހަރަކުވެސް ދިރާގުގެ އިޖުތިމާއީ ޒިންމާގެ ތެރެއިން ކުރިއަށް ގެންދާ މި ޕްރޮގްރާމާ ބެހޭ ގޮތުން ދިރާގުން މައުލޫމާތު ދިންގޮތުގައި މި ޕްރޮގްރާމްގައި މިއަހަރު އަލަށް 12 ކުދިން ބައިވެރިވެފައިވާއިރު އެ ޕްރޮގްރާމްގެ ދަށުން ދެ ވަނަ އަހަރު ފުރިހަމަކުރާ 17 ޒުވަނަކު ވެސް ބައިވެރިވި އެވެ.

މިދިޔަ ހޯމަ ދުވަހު ދިރާގުގެ ހެޑް އޮފީހުގައި ބޭއްވި ހާއްސަ ހަފްލާއެއްގައި ވަނީ އެއް އަހަރާއި ދެ އަހަރަށް ބަހާލައިގެން ކުރިއަށް ގެންދާ މި ޕްރޮގުރާމަށް މިއަހަރު އަލަށް ހޮވުނު 12 ކުދިންނަށް ސެޓްފިކެޓް ހަވާލުކޮށްފައެވެ.

ދިރާގުން ބުނި ގޮތުގައި މި ޕްރޮގްރާމްގެ ބައިވެރިން މަސައްކަތުގެ ކަންކަން ރޭވުމާއި އިންތިޒާމް ކުރުމާއި މައްސަލަ ހައްލުކުރުމާއި ކަންކަމުގައި ގޮތްނިންމުމާއި ކަސްޓަމަރުންނަށް ޚިދުމަތް ދިނުން އަދި ވަޒީފާގެ މާހައުލުގެ ރައްކާތެރިކަމާއި ސަލާމަތްކަން ފަދަ ދާއިރާތައްކަށް ހޭލުންތެރިކުރެވޭނެ ކަމަށެވެ.

މި ޕްރޮގްރާމްގެ ތެރޭގައި މަސައްކަތުގެ ގާބިލްކަން އިތުރު ކުރުމުގެ ގޮތުން ތަމްރީންތަކާއި ވާރކްޝޮޕްތައް އަދި ކޯސްތަކެއް ކުރިއަށް ދާނެކަމަށް ދިރާގުން ބުނެ އެވެ.

މި ޕްރޮގުރާމުގެ ދަށުން ހިޔާރުކޮށްފައިވާ ދާއިރާއިން މަޢުލޫމާތު މުއްސަނދި ކުރުމަށް އެކި ވަސީލަތްތައް ބޭނުންކުރުމަށް މަގުފަހިވެގެން ދާނެކަމަށްވެސް އެފަރާތުން މައުލޫމާތުދެ އެވެ.

ދިރާގުން އިތުރަށް މައުލޫމާތު ދިން ގޮތުގައި ދިރާގުގައި މަސައްކަތްކުރާ ދުވަސްތަކުގައި ކޮންމެ އެޕްރެންޓިސްއެއްގެ ކަންކަން ބަލަހައްޓާ، އިރުޝާދުދީ ކާމިޔާބުކަމާއެކު ޕްރޮގްރާމް ނިންމުމަށް އެހީތެރިވެ ދިނުމަށް ކަނޑައެޅިފައިވާ ހާއްސަ މުވައްޒަފެއް ހުންނާނެ ކަމަށެވެ.

މިއީ ރާއްޖޭގެ ކުންފުންޏެއްގެ އިޖްތިމާއި ޒިންމާގެ ތެރެއިން މިފަދަ ގޮތަކަށް ކުރިއަށް ގެންދާ ހަމައެކަނި ޕްރޮގްރާމެވެ.