ގައުމީ ޔުނިވަރސިޓީގެ “ފަހި ދުވަސް” ކުޅުދުއްފުށީ ކެމްޕަހުގައި ފަށައިފި

ގައުމީ ޔުނިވަރސިޓީގެ “ފަހި ދުވަސް” ކުޅުދުއްފުށީ ކެމްޕަހުގައި މިއަދު ހަވީރު ފަށައިފި އެވެ

ގައުމީ ޔުނިވަސިޓީން އަންނަ އަހަރު ފަށާ ކޯސްތަކުގެ މައުލޫމާތު ފޯރުކޮށްދިނުމަށް ކުރިއަށްގެންދާ މި ފަހި ދުވަސް ފައްޓަވައިދެއްވީ ކުޅުދުއްފުށީ ކައުންސިލުގެ ރައީސް އަލީ މުހައްމަދެވެ.

މިރަސްމިއްޔާތުގައި ވާހަކަ ދައްކަވަމުން ކައުންސިލުގެ ރައީސް އަލީ ވިދާޅުވީ ކިޔެވުމަށް ލިބޭ މިފަދަ ފުރުސަތުތަކުގެ ބޭނުން ހުރިހާ ފަރާތަކުން ވެސް ހެޔޮގޮތުގައި ހިއްފުމަށް އެދިލެއްވި އެވެ.

ގިނަ ބައެއްގެ އެދުމުގެ މަތިން މުޅި އަލަށް އަންނަ އަހަރު ކުޅުދުއްފުށީ ކެމްޕަހުގައި ޑިޕްލޮމާއިން ޝަރީޢާ އެންޑް ލޯ ފެށުމަށް ހަމަޖެހިފައިވާކަމަށް ކެމްޕަހު މެނޭޖަރު އިބުރާހިމް މުހައްމަދު ވިދާޅުވި އެވެ.

ޔުނިވަރސިޓީން ކުރިއަށް ގެންދާ ކޯސްތަކާ ބެހޭ މައުލޫމާތު ފޯރުކޮށްދީ، ދަރިވަރުން ކުރިއަށްދާނެ ދާއިރާއެއް ޚިޔާރުކުރުމަށް އެހީތެރިވެދީ، ސެޓްފިކެޓްތައް ހިލޭ އެޓެސްޓްކޮށް އެޕްލިކޭޝަން ފޯމް ފުރުން ކުރިއަށްދާނެ އެވެ.

އެޕްލިކޭޝަން ހުށަހެޅުމުގެ ފުރުސަތު ހުޅުވާލާނީ މި މަހުގެ 21 ގައި ކަމަށް ޔުނިވަރސިޓީގެ ކުޅުދުއްފުށީ ކެމްޕަހުން މައުލޫމާތުދެ އެވެ.

ޖުމްލަ 8 ފެކަލްޓީގެ 28 ކޯހަކުން، 760 ދަރިވަރުންގެ ޖާގަ ކުޅުދުއްފުށީ ކެމްޕަހުގައި އަންނަ އަހަރަށް ހުޅުވާލެވިފައި ވެއެވެ.

ކުޅުދުއްފުށީ ކެމްޕަހުގެ ފަހި ދުވަސް ކުރިއަށް ދާނީ މިރޭ 10:30 ވަންދެނެވެ. އަދި މާދަމާ ހެނދުނު 9 ން މެނދުރު 12 ން ، މެނދުރުފަހު 2 ން ހަވީރު 4 ކުރިއަށްދާނެ އެވެ.