އާރޓް އެންޑް ޑިޒައިން ކޯހާއި ޕާރފޯމިންގ އާޓްސް ކޯހުގެ ނިމުން ފާހަގަކޮށްފި

ނެޝަނަލް ސެންޓަރ ފޯރ ދި އާރޓްސް (އެން.ސީ.އޭ) އާއި ކުޅުދުއްފުށީ ކައުންސިލް ގުޅިގެން ކުޅުދުއްފުށީގައި ކުރިއަށް ދެންދިޔަ ޕަރފޯމިންގ އާރޓްސް އާއި އާރޓް އެންޑް ޑިޒައިން ކޯސް ނިމިއްޖެ އެވެ.

މި ދެ ކޯސް ނިންމުމުގެ ގޮތުން ރޭ ތިލަދެކުނު ސިނަމާގައި ބޭއްވި ކުލަގަދަ ހަފުލާގައި ޕަރފޯމިންގ އާރޓްސް ކޯހުގައި ބައިވެރިވި 22 ފަރާތަކުން ސެޓްފިކެޓް ހާސިލުކުރިއިރު އާރޓް އެންޑް ޑިޒައިން ކޯހުގައި ބައިވެރިވި 60 ފަރާތަކުން ސެޓުފިކެޓް ހާސިލުކުރި އެވެ.

ބައިވެރިންނަށް ސެޓްފިކެޓް ހަވާލުކޮށްދެއްވާފައިވަނީ ކުޅުދުއްފުށީ ކައުންސިލްގެ ރައީސް އަލީ މުހައްމަދާއި, ހދ.އަތޮޅު ކައުންސިލް އިދާރާގެ ޑެޕިއުޓީ ޑިރެކްޓަރ އަހުމަދު އިމާދާއި ފެނަކައިގެ ރީޖަނަލް މެނޭޖަރ އާދަމް މުހައްމަދު އަދި ކުޅުދުއްފުށީ ކައުންސިލް އިދާރާގެ ފައިނޭންސް އޮފިސަރ މުހައްމަދު ގާސިމް އެވެ.

މި ހަފުލާގައި ޕަރފޯމިންގ އާރޓް ކޯހުގެ ދަރިވަރުންގެ ހުށަހެޅުންތަކެއް ހުށަހަޅާފައިވާއިރު ދައްސޫރަ ބޮޑުބެރު ގްރޫޕާއި މިސްގާލް ބޮޑުބެރު ގްރޫޕާއި ޑީއެލްޑީ ގްރޫޕުގެ ފޯރިގަދަ ހުށައެޅުންތަކެއް ފެނިގެން ދިޔަ އެވެ.

ޕަރފޯމިން އާރޓް ކޯހުގައި ކިޔަވައިދެއްވި މަޝްހޫރު ލަވަކިޔުންތެރިޔާ އުމަރު ޒާހިރާއި އާރޓް އެންޑް ޑިޒައިން ކޯސް ކިޔަވައިދެއްވި ތާޅަފިލި އަލިބެ އާއި އަލީ އާމިރުވެސް ލަވައެއް ހުށަހަޅައިދީފައިވެ އެވެ.

މީގެ އިތުރުން އާރޓް އެންޑް ޑިޒައިން ކޯހުގެ ދަރިވަރުންގެ ކުރެހުންތައް ދައްކާލާފައިވާއިރު އެކުރެހުންތައް ކުރިއަށް އޮތް 3 ދުވަހު ތިލަދެކުނު ސިނަމާގައި އާންމުކޮށް ހުޅުވާލައިގެން ދައްކާލުން އޮންނާނެކަމަށް ކުޅުދުއްފުށީ ކައުންސިލްގެ ރައީސް އަލީ މުހައްމަދު ހަފުލާގައި ވާހަކަދައްކަވަމުން ވިދާޅުވި އެވެ.

މި ހަފުލާގައި ވާހަކަ ދައްކަވަމުން ޕާރފޯމިންގ އާޓްސްގެ އެގްޒެކްޓިވް އިންޗާޖު އުމަރު ޒާހިރު ވަނީ ކުޅުދުއްފުށީ ރައްޔިތުން ބެހެއްޓި ގާތްކަމާއި އެކުވެރިކަމަށް ޝުކުރުއަދާކޮށް އެހެން ރަށްރަށުންވެސް ކުޅުދުއްފުށި ނަމޫނާއަކަށް ބެލުމަށް ގޮވާލާފަ އެވެ. އަދި ކުޅުދުއްފުށީގެ ރައްޔިތުންގެ އެއްބައިވަންތަކަމާއި ސިޔާސީ ދެކޮޅުވެރިކަން ނެތްކަންވެސް ވަނީ އޭނާ ވަނީ ފާހަގަކޮށްފަ އެވެ.

މިދިއަ އޯގަސްޓް މަހުގެ 21 ވަނަ ދުވަހުން ފެށިގެން 15 ދުވަހުގެ މުއްދަތަށް ކުރިއަށް ގެންދިއަ މި ދެ ކޯސް ނިންމުމުގެ ގޮތުން ބޭއްވި މި ހަފުލާގައި ކުޅުދުއްފުށީ މުވައްސަސާތަކުގެ އިސްވެރިންނާއި ކޯހުގެ ބައިވެރިން އަދި އާންމުން ބައިވެރިވި އެވެ.