ހަނިމާދޫ ހިމެނޭ އިދާރީ ދާއިރާގެ ރަށްރަށަށް ޒިޔާރަތްކޮށް އެ ރަށްރަށުގައި ހުރި މައްސަލަތަކާ ބެހޭގޮތުން މަޝްވަރާކޮށްފި

ހަނިމާދޫ ހިމެނޭ އިދާރީ ދާއިރާގެ ރަށްރަށަށް ޒިޔާރަތްކޮށް އެ ރަށްރަށުގައި ހުރި މައްސަލަތަކާ ބެހޭގޮތުން އެ ދާއިރާގެ މަޖިލިސް މެމްބަރ ހުސައިން ޝަހުދީ އެ ރަށްރަށުގެ ކަމާބެހޭ މުއައްސަސާތަކާ މަޝްވަރާކުރައްވައިފި އެވެ.

ހަނިމާދޫ ހިމެނޭ އިދާރީ ދާއިރާގެ ރަށްތަކުގެ ހާލު ބައްލަވައިލެއްވުމަށް ކުރައްވަމުންގެންދަވާ ދަތުރުފުޅާ ބެހޭގޮތުން މި ނޫހަށް މައުލޫމާތު ދެއްވަމުން ޝަހުދީ ވިދާޅުވީ ދާއިރާގެ ރަށްރަށުގެ ތެރެއިން ހަނިމާދޫއަށް މިހާރު އެންމެ ދަތިވެފައިވާ ކަމަކީ ބޭންކް އޮފް މޯލްޑިވްސް އިން ހަނިމާދޫގައި ބަހައްޓާފައި ހުންނަ އޭޓީއެމް ހަލާކުވެފައި ހުރުމާއި ހަނިމާދޫގެ ރަށް ގިރުމުގެ މައްސަލަކަމަށެވެ.

ހަނިމާދޫގެ އޭޓީއެމް ހަލާކުވެފައި ހުރުމުން ރައްޔިތުން އޭގެ ދަތިތައް އުފުލަން ޖެހިފައިވާ ކަމަށާއި ރުފިޔާ ނަގަން އެހެން ރަށްރަށަށް ދާން ޖެހުމަކީ ފަސޭހަ ކަމެއް ނޫން ކަމަށެވެ.

އޭޓީއެމްގެ ކާޑް ރީޑަރ ބަދަލުކުރުމުންވެސް މައްސަލަ ހައްލުވެފައިނުވާ ކަމަށާއި އޭނާ މާލެ ގޮސް މި މައްސަލައަށް އަވަސް ހައްލެއް ހޯދައިދިނުމަށް މަސައްކަތް ކުރައްވާނެ ކަމަށް މެމްބަރު ޝަހުދީ ވިދާޅުވި އެވެ.

ހަނިމާދޫގެ އިތުރުން އެ ދާއިރާގެ އެހެން ރަށެއް ކަމަށްވާ ނާވައިދޫއަށްވެސް ރަށްގިރުމުގެ މައްސަލަ ކުރިމަތިވެފައިވާ ކަމަށް އޭނާ ވިދާޅުވި އެވެ.

ހދ. ނަވައިދޫ، ފިނޭ އަދި ހިރިމަރަދޫގެ ރައްޔިތުންގެ އެންމެ ބޮޑު ކަންބޮޑުވުމަކީ ނަރުދަމާގެ ހިދުމަތާއި ކަރަންޓްގެ މައްސަލަތައް ކަމަށް ޝަހުދީ ވިދާޅުވި އެވެ. މި ތިން ރަށުގައިވެސް ނަރުދަމާގެ ހިދުމަތް ރަނގަޅު ފެންވަރެއްގައި ދެމުން ނުދާތީ އެކަމުގެ ސަބަބުންވެސް ރައްޔިތުނަށް ދަތިވަމުންދާ ކަމަށް ޝަހުދީ ވިދާޅުވި އެވެ. އަދި ހާއްސަކޮށް ނާވައިދޫއަށް މި މައްސަލަ އިންތިހާއަށް ބޮޑުވެފައިވާ ކަމަށްވެސް އޭނާ ވިދާޅުވި އެވެ.

މި ތިން ރަށުގައިވެސް ކަރަންޓްގެ ހިދުމަތް ދެމުންގެންދަނީ އެންމެ އިންޖީނެއް ބޭނުންކޮށްގެން ކަމަށާއި އަޑީތެޔޮ ބަދަލުކުރަންވެސް ޖެހެނީ ކަރަންޓް ކަނޑާލަން ކަމަށް އޭނާ ވިދާޅުވި އެވެ.

މީގެ އިތުރުން ހަނިމާދޫ ދާއިރާގެ އެއްވެސް ރަށަކުން އާސަންދައިގެ ހިދުމަތް ނުލިބުމަކީވެސް ރައްޔިތުންގެ ވަރަށް ބޮޑު ކަންބޮޑުވުމެއް ކަމަށް މެމްބަރު ޝަހުދީ ވިދާޅުވި އެވެ. ރަށުގައި ތިބެގެން މި ހިދުމަތް ލިބޭނެ ދުވަހަކަށް ރައްޔިތުން އުއްމީދުކުރާއިރު ވަރަށް އަވަހަށް ހަނިމާދޫގައި މި ހިދުމަތް ފެށޭނެ ކަމަށްވެސް އޭނާ ވިދާޅުވި އެވެ.

އަދި ހިރިމަރަދޫ ސްކޫލްގެ ޕްރިންސިޕަލްގެ ފެންވަރާ މެދު ރައްޔިތުން ސުވާލު އުފައްދާ ކަމަށާއި މިކަމަކީ ހިރިމަރަދޫ ކައުންސިލުގެވެސް ބޮޑު ކަންބޮޑުވުމެއް ކަމަށާއި އެކަންކަމާ ގުޅޭގޮތުން އެޑިއުކޭޝަން މިނިސްޓްރީގެ ޒޯން ކޯޑިނޭޓަރ ފަތުހުﷲ މުހައްމަދާ މަޝްވަރާކޮށްފައިވާނެ ކަމަށް ޝަހުދީ ވިދާޅުވި އެވެ.

މެމްބަރުގެ މި ދަތުރުފުޅުގައި ދާއިރާގެ 4 ރަށުގެ ސްކޫލްތަކާއި ބައްދަލުކޮށްފައިވާއިރު ނާވައިދޫ ކައުންސިލް ފިޔަވައި އެހެން ކައުންސިލްތަކާވެސް ވަނީ ބައްދަލުކޮށްފަ އެވެ. ނާވައިދޫ ކައުންސިލާއި ބައްދަލުވެފައިނުވަނީ އެޕޮއިންޓްމެންޓް ނުލިބިގެން ކަމަށް ޝަހުދީ ވިދާޅުވި އެވެ. މީގެ އިތުރުން ބައްދަލުކޮށްލުމަށް އެދުނު އާންމުންނާވެސް ބައްދަލުކޮށްފައިވާނެ ކަމަށް މެމްބަރު ވިދާޅުވި އެވެ.

ކައުންސިލްތަކާ ބައްދަލުކޮށް އަންނަ އަހަރުގެ ބަޖެޓްގައި ހިމަނަން ބާރުއަޅާ ކަންކަމާ ބެހޭގޮތުން މަޝްވަރާކޮށްފައިވާއިރު މަޖިލިސް ތެރޭގައި ބަޖެޓްގައި އެ ކަންކަން ހިމެނުމަށް މަސައްކަތްކޮށްދެއްވާނެ ކަމަށްވެސް ޝަހުދީ ވިދާޅުވި އެވެ.

އަދި ރަށްތަކަށް ދިމާވެފައިވާ ކަންބޮޑުވުންތަކާއި ބެހޭގޮތުން ކަމާބެހޭ މުއައްސަސާތަކާއި ބައްދަލުކޮށް އަވަސް ހައްލެއް ހޯދައިދިނުމަށް މަސައްކަތް ކުރައްވާނެ ކަމަށް މެމްބަރު ޝަހުދީ ވިދާޅުވި އެވެ.