1000 ފާމަސީ އެސިސްޓެންޓުން ތަމްރީނު ކުރުމުގެ ޕްރޮގުރާމުގައި ބައިވެރިވުމުގެ ފުރުސަތު ހުޅުވާލައިފި

އެޑިއުކޭޝަން މިނިސްޓްރީ އާއި ސްޓޭޓް ޓްރޭޑިން އޯގަނައިޒޭޝަން (އެސްޓީއޯ) ގުޅިގެން 1000 ފާމަސީ އެސިސްޓެންޓުން ތަމްރީން ކުރުމަށް ހިންގާ އެޕްރެންޓިސްޝިޕް ޕްރޮގްރާމުގައި ބައިވެރިވުމުގެ ފުރުސަތު ހުޅުވައިލައިފި އެވެ.

“ދަސްވަރުކަން” ޕްރޮގްރާމްގެ ދަށުން ފާމަސީ އެސިސްޓެންޓުން ތަމްރީނުކުރުމަށް އެޕްރެންޓިސްޝިޕް ޕްރޮގްރާމް އަންނަ މަހު ފެށުމަށް ހަމަޖެހިފައިވާއިރު މީހުން ދިރިއުޅޭ ކޮންމެ ރަށަކަށް ފަސް ޖާގަ ހިމެނޭ ގޮތަށް ކުރިއަށް ގެންދާ މި ޕްރޮގްރާމުގައި ބައިވެރިވާ ފަރާތްތަކަށް ބޭނުންވާ އަމަލީ ތަޖުރިބާ ހޯދުމަށް ހަމަޖެހިފައިވަނީ ފާމަސީއެއްގައި ފާމަސިސްޓެއްގެ ބެލުމުގެ ދަށުން މަސައްކަތް ކޮށްގެން ކަމަށް އެސްޓީއޯއިން ބުނެ އެވެ.

މި ކޯހަށް ކުރިމަތިލެވޭނީ ޖީސީ އޯ ލެވެލް އިމްތިހާނުން އެންމެ ދަށްވެގެން ތިން މާއްދާއިން “ސީ” ފާސް ލިބިފައިވާ ދަރިވަރުންނަށެވެ.

8 މަސް ނުވަތަ 6 މަހަށް ކުރިޔަށް ގެންދާ މި ކޯހުގައި 200 ގަޑިއިރު އޮންލައިން މެދުވެރިކޮށް އަމިއްލައަށް ކިޔެވުމުގެ އިތުރުން، 500 ގަޑިއިރު ފާމަސިސްޓަކާ އެއްކޮށް މަސައްކަތް ކުރަން ޖެހޭނެ ކަމަށް އެސްޓީއޯއިން ބުނެ އެވެ. އަދި މި ކޯހަކީ، ދިވެހި ރާއްޖޭގެ ގައުމީ ސަނަދުގެ އޮނިގަނޑުގެ ލެވެލް 4 ގެ ކޯހެއް ކަމަށްވެސް އެސްޓީއޯއިން މައުލޫމާތުދެ އެވެ.

ޕްރޮގްރާމްގައި ބައިވެރިވުމުގެ ޝަރުތު ފުރިހަމަވާ ފަރާތްތަކުން މިމަހުގެ 25 ވަނަ ދުވަހުގެ 15:00 ގެ ކުރިން އެކަމަށް ބޭނުންވާ ލިޔުންތަކާއެކު މޯލްޑިވްސް ކޮލިފިކޭޝަން އޮތޯރިޓީއަށް ހުށަހެޅުމުގެ ފުރުސަތު ވަނީ ހުޅުވާލާފަ އެވެ.

މާލޭގެ ފާމަސީތަކުގައި މަސައްކަތްކުރާ ފާމަސިސްޓުންނަށް މަހަކަށް އެވަރޭޖް ގޮތެއްގައި މުސާރައަށް 10000 ރުފިޔާ ޖެހޭ ބީދައިން، އަތޮޅުތަކުގައި ވެސް މަސައްކަތް ކުރުމަށް ތަމްރީނު ދެވޭ ފާމަސިސްޓުންނަށް ވެސް ބޭސްފިހާރަތަކުގައި މަސައްކަތް ކުރަން ފެށުމުން މުސާރައިގެ ގޮތުގައި 10000 ރުފިޔާ ދެވޭނެ ކަމަށް އެސްޓީއޯގެ މެނޭޖިން ޑިރެކްޓަރ އާދަމް އާޒިމް ވިދާޅުވެފައިވެ އެވެ.

އެސްޓީއޯއިން މިހާރު ވަނީ ރާއްޖޭގެ ރީޖަނަލް ހޮސްޕިޓަލްތައް ހުންނަ ހުރިހާ ރަށެއްގައިހެން ބޭސް ފިހާރަތައް އަޅާފަ އެވެ. އެގޮތުން މިހާތަނަށް 20 ބޭސް ފިހާރައެއް ވަނީ އަޅާފަ އެވެ.