މިއަހަރުގެ އަޟްހާ އީދު ކުލަގަދަ ގޮތެއްގައި ފާހަގަ ކުރުމަށްޓަކައި ހދ. ނޭކުރަންދޫގައި ގިނަގުނަ ތައްޔާރީތަކެއް ވަމުން އަންނަކަމަށް އެރަށު ކައުންސިލްގެ ރައީސް މުހައްމަދު ސިޒާން ވިދާޅުވެއްޖެ އެވެ.
އެހެންއަހަރުތަކެކޭ އެއްފަދައިން މިއަހަރުވެސް ނޭކުރަންދޫގައި އަޟްހާ އީދު ފާހަގަ ކުރުމަށްޓަކައި ބައިބަލާ އާއި، އަންހެން އަދި ފިރިހެނުންގެ ވާދެމުން ކުރިއަށް ދާނެ ކަމަށާއި އޭގެ އިތުރުން ހޭވައްލާގެ ނަމުގައި އެކިއެކި ކުޅިވަރުތައް ހިމެނިގެން ޕްރޮގްރާމެއް ހިންގުމަށް ހަމަޖެހިފައިވާ ކަމަށް މުހައްމަދު ސިޒާން ވިދާޅުވި އެވެ.
އިތުރަށް މައުލޫމާތު ދެއްވަމުން ރައީސް ވިދާޅުވީ ސްޓޭޖް ޝޯ ބޭއްވުމަށްޓަކައި މިއުޒިކް ބޭންޑްތައް އަދި ހަމަނުޖެހޭ ކަމަށެވެ. އެހެންނަމަވެސް ކުޅުދުއްފުށީގެ ބޮޑުބެރު ގްރޫޕަކާ ވާހަކަ ދެކެވެމުން އަންނަ ކަމަށާއި ކުރިނބީ އަންހެން ދަނޑި ގްރޫޕެއް ގެނައުމުގެ މަސައްކަތްވެސް ކުރެވެމުން އަންނަ ކައުންސިލުގެ ރައީސް ވިދާޅުވި އެވެ.
އަދި ސަގާފީ ކުޅިވަރު ތަކުގެ ތެރެއިން އެރަށުގައި އާންމުކޮށް ހިނގަމުން އަންނަ ވަގު ކުޅުމާއި، ބޮޑުމަސް ބޭނުމުގެ ހަރާކާތްތައް މިއަހަރުވެސް ކުރިއަށް ދާނެކަމަށް ކަމަށް އޭނާ ފާހަގަ ކުރެއްވިއެވެ.
އެސްޓީއޯ އިން ސްޕޮންސާރ ކުރާ ނޭކުރަންދޫ އީދު ކުޅިވަރު ކުރިއަށް ގެންދިއުމަށް ވިހި ހާސް ރުފިޔާގެ ބަޖެޓެއް މިހާރު ހަމަޖެހިފައިވާއިރު ހަރަދުކުރަމުން ގެންދަނީ ހުރިހާ ކުޅިވަރަކަށް އެއްވަރަކަށް ބަޖެޓް ބަހާލައިގެންކަމަށް މުހައްމަދު ސިޒާން ވިދާޅުވި އެވެ.
ނޭކުރަންދޫއަކީ ވެސް އީދުގައި ސަގާފީ ކުޅިވަރުތަކުގެ ގިނަ ކަންތައްތަކެއް ކުރަމުން އަންނަ ރަށެކެވެ.