ކުޅުދުއްފުށީ އަފީފުއްދީން ސްކޫލުގެ ސްކައުޓު ދަރިވަރުންނަށް މަގުމަތީގެ ސަލާމަތާ ރައްކާތެރިކަމާ ބެހޭ ގޮތުން މައުލޫމާތު ދީފި

ކުޅުދުއްފުށީ ފޮލިސްޓޭޝަނުގެ ފަރާތުން އަފީފުއްދީން ސްކޫލުގެ ސްކައުޓު ދަރިވަރުންނަށް މަގުމަތީގެ ސަލާމަތާ ރައްކާތެރިކަމާ ބެހޭ ގޮތުން މައުލޫމާތު ދިނުމުގެ ސެޝަނެއް ކުރިއަށް ގެންގޮސްފި އެވެ.

29 ސްކައުޓް ދަރިވަރުން ބައިވެރިވެގެން މިމަހު 12 ވަނަ ދުވަހު އެ ސްކޫލުގައި ކުރިއަށް ގެންދިއަ މި މައުލޫމާތު ދިނުމުގެ ސެޝަނުގައި ޓްރެފިކް ނިޝާންތަކާ ބެހޭގޮތުންނާއި މަގުމަތީ ހިނގާބިނގާވެ އުޅުމުގައި ސަމާލުކަން ދޭންވީ ކަންތައްތަކާ ބެހޭގޮތުން މައުލޫމާތު ދީފައިވެއެވެ.

ކުޅުދުއްފުށީ ޕޮލިސް ޓޭޝަނުން މައުލޫމާތު ދޭގޮތުގައި ކުޅުދުއްފުށީގައި ކުރިއަށް ގެންދިޔަ މި މައުލޫމާތު ދިނުމުގެ ސެޝަނަކީ ފުލުހުންގެ މި އަހަރުގެ ބިޒްނަސް ޕްލޭންގައި ހިމެނޭ ލަނޑުދަނޑިތަކުގެ ތެރެއިން މަގުމަތީގެ އަމާންކަން ދެމެހެއްޓުމަށްޓަކައި ކުށްމަދު ކުރުމާއި ރަމަތަނުވުމާ ދެކޮޅަށް މަސައްކަތްކުރުމުގެ ލަނޑުދަނޑިއަށް ވާސިލުވުމަށް ފުލުހުން ކުރަމުންދާ މަސައްކަތްތަކުގެ ތެރެއިން ހިންގި ސެޝަނެކެވެ.

މި ސެޝަނުގައި މައުލޫމާތު ދީފައިވަނީ ކުޅުދުއްފުށި ޕޮލިސް ސްޓޭޝަނުގެ އިންޗާޖް ޕޮލިސް ސްޓާފް ސާޖަންޓް އިބްރާހިމް އަބްދުލް ކަރީމްއެވެ.