އަލަށް އިމާރާތް ކުރާ ދެ ޕްރީ ސްކޫލުގެ ކުރެހުމާއި ބީއޯކިޔު ތައްޔާރުކުރުމުގެ މަސައްކަތް ދަނީ ކުރިއަށް: އެޑިއުކޭޝަން މިނިސްޓްރީ

ކުޅުދުއްފުށީގައި އަޅަން ހަމަޖެހިފައިވާ ދެ ޕްރީ ސްކޫލުގެ ކުރެހުމާއި ބީއޯކިޔު ތައްޔާރުކުރުމުގެ މަސައްކަތް ކުރިއަށްދާ ކަމަށް އެޑިއުކޭޝަން މިނިސްޓްރީން ބުނެފި އެވެ.

އެޑިއުކޭޝަން މިނިސްޓްރީގެ މީޑިޔާ ކޯޑިނޭޓަރ މައިނާ ލަތީފް “ކުޅުދުއްފުށި އޮންލައިނަ”ށް މައުލޫމާތު ދެއްވަމުން ވިދާޅުވީ ބީއޯކިޔު އާއި އެ ދެ ސްކޫލްގެ ކުރެހުން ތައްޔާރުކުރުމަށް މެއި މަހުގެ 27 ގައި އޯޕީޕީއަށް ފޮނުވާފައިވާނެ ކަމަށާއި މިހާރު ކުރިއަށް ދަނީ ކުރެހުމުގެ ކޮންޓްރެކް އެވޯޑް ކުރުމުގެ މަސައްކަތް ކަމަށެވެ.

ކުޅުދުއްފުށީގައި މިހާރު ހުރި ދެ ޕްރީ ސްކޫލްގެ ޖާގައިގެ ދަތިކަން ހައްލު ކުރުމުގެ ގޮތުން މިދިޔަ އަހަރުގެ އޭޕްރިލް 18 ވަނަ ދުވަހު ބިންގާ އެޅި މި ދެ ޕްރީ ސްކޫލްގެ ބަޖެޓްވެސް ހަމަޖެހިފައިވާ ކަމަށް އޭނާ ވިދާޅުވި އެވެ.

ރައީސް ވަހީދުގެ ސަރުކާރުގައި ބިންގާ އެޅުނު މި ދެ ޕްރީ ސްކޫލާ ބެހޭގޮތުން ކައުންސިލްގެ ރައީސް އަލީ މުހިއްމަދު ވިދާޅުވީ މިހާތަނަށް މަސައްކަތް ނުފެށި ލަސްވީ ބަޖެޓް ހަމަނުޖެހޭތީ ކަމަށާއި ނަމަވެސް މިހާރު އެޑިއުކޭޝަން މިނިސްޓްރީން 2 މިލިއަން ރުފިޔާގެ ބަޖެޓެއް ހަމަޖައްސަވައި ދެއްވާފައިވާ ކަމަށެވެ.

އަދި މިހާރު ކުރިއަށް ދަނީ ލިޔެކިޔުމާ ކުރެހުމެގެ މަސައްކަތް ކަމަށާއި ކައުންސިލްގެ ފަރާތުން އަދި އެއްވެސް އަމަލީ މަސައްކަތެއް ނުފަށާ ކަމަށްވެސް އަލީ މުހައްމަދު ވިދާޅުވި އެވެ.

“ހިރަފުސް ދަނޑު” ސަރަހައްދުގައި އެއް ސްކޫލް އަޅަން ހަމަޖެހިފައި ވާއިރު ދެވަނަ ސްކޫލް އަޅާނީ އުތުރު އަވަށުގައި ކުރިން ކުޑަކުދިންގެ ޕާރކެއްގެ ގޮތުގައި އޮތް ސަރަހައްދުގައެވެ.

މިއީ ރާއްޖޭގައި ޕްރީ ސްކޫލަކަށް ދައުލަތުގެ ބަޖެޓުން ހަރަދުކޮށްގެން އިމާރާތްކުރާ ފުރަތަމަ ދެ ޕްރީސްކޫލު ކަމަށް ކުރީގެ އެޑިއުކޭޝަން މިނިސްޓަރ ޑރ އާސިމް އަހުމަދު ބިންގާ އަޅުއްވައިދެއްވަމުން ވިދާޅުވެފައި ވެއެވެ.