އިހަވަންދޫއިން ގެއްލިގެން ހޯދަމުންދިޔަ މީހާ ވަޅެއްގެ ތެރޭގައި މަރުވެފައި އޮތްވާ ފެނިއްޖެ

އިއްޔެ ހަވީރުން ފެށިގެން ގެއްލިގެން ހޯދަމުންދިޔަ ހދ.އިހަވަންދޫ ގުލްޒާރުގެ އަބުދުﷲ އަބޫބަކުރު ފެންވަޅެއްގެ ތެރޭގައި މަރުވެފައި އޮއްވާ ފެނިއްޖެ އެވެ.

67 އަހަރުގެ އަބުދުﷲ ފުލުހުންނާ ރައްޔިތުން ގުޅިގެން ހޯދަމުން ދަނިކޮށް ހެދުނު 6:18 ހާއިރު ފެނިފައިވަނީ އަބްދުﷲ ގެ ދޮށީ ފިރިހެން ދަރިފުޅަށް ކަމަށް މައުލޫމާތުލިބިފައިވެ އެވެ.

އޭނާ ފަޅު ގެވަޅެއްގައި ހުރި ތިރި ފެންވަޅެއްގައި މަރުވެފައި އޮއްވާ ފެނިފައިވާއިރު މަރުވެފައިވާތާ ގިނައިރުތަކެއް ވެފައިވާކަމަށްވެސް އެ ރަށުން މައުލޫމާތުދިނެވެ.

ފުލުހުންގެ ފޮރިންސިކް ޓީމް އިހަވަންދޫއަށް 9 ޖަހާއިރު ދިއުމަށް ހަމަޖެހިފައިވާއިރު މަރުހޫމްގެ ހަށިގަނޑު އާއިލާއާ ހަވާލުކުރާނީ ފުލުހުންގެ ފޮރިންސިކު ޓީމުން ބެލުމަށްފަހު އެވެ.

ރޭ އަބުދުﷲ އަބޫބަކުރު ހޯދުމުގެ މަސައްކަތުގައި އިހަވަންދޫ ސުކޫލުގެ ގިނައަދަދެއްގެ މަތީ ކުލާސްތަކުގެ ދަރިވަރުންނާއި ސުކޫލުގެ މުވައްޒަފުން ނުނިދާ ހަރަކާތްތެރިވެފައިވާއިރު ރަށުގެ ހުރިހާ ސަރަހައްދުތަކެއްހެން ބަލައި މޫދަށް ފީނައިގެންވެސް ބަލައިފައިވެ އެވެ. އަދި ބޮޑު ލައިޓެއް ދިއްލައިގެން ބޮއްކުރައެއްގައި މޫދުވެސް ބަލާފައިވާ ކަމަށް އެ ރަށުން މައުލޫމާތުދެ އެވެ.

އަބުދުﷲއަކީ އުމުރުން ދުވަސް ވުމުގެ ސަބަބުން ހިނގާބިގާވެ އުޅުމުގައި ކޮންމެވެސް ވަރެއްގެ ދަތިތަކެއް ހުންނަ މީހެކެވެ. އަދި ސިކުނޑީގައި ކޮންމެވެސް ވަރެއްގެ އުނިކަމެއް ހުންނަ މީހެއް ކަމަށްވެސް އެ ރަށު މީހުން ބުނެ އެވެ.

އޭނާ ހޯދުމުގެ މަސައްކަތުގައި އިހަވަންދޫގެ ގިނަ އަދަދެއްގެ ރައްޔިތުން ބައިވެރިވެފައިވެ އެވެ.