ފައިސާ އާއި މަސައްކަތް ދިންވަރަކުން އިތުރު ކޮންޓެކްޓަރުން ނަގައިގެން ނާގޯށީގެ މަސައްކަތް ކުރާނަން: ސަލީމް

ހދ.ނާގޯށީގެ މަސައްކަތް ހުއްޓިފައިނުވާ ކަމަށް މަސްއޮޑި ސަލީމް ވިދާޅުވެއްޖެ އެވެ.

ކުޅުދުއްފުށީ އޮންލައިންއަށް މަޢުލޫމާތުދެއްވަމުން ސަލީމް ވިދާޅުވީ ކޮންމެސް މަސައްކަތެއް މިވަގުތުވެސް ހިނގާކަމަށާއި ފައިސާ އާއި މަސައްކަތް ދިންވަރަކުން އިތުރު ކޮންޓެކްޓަރުން ނަގައިގެން ނާގޯށީގެ މަސައްކަތް ކުރާނެކަމަށެވެ.

“ނާގޯއްޓާއިބެހޭގޮތުން އަހަރެމެންނަށް، އެއްޗެއްބުނަން ވަރަށް ދަތި މިހާރު، އަހަރެމެންނަކާ އެއްވެސް އޯނާރޝިޕްއެއް އޮންނަ ތަނެއްނޫން މިހާރު އެއީކީ، މުޅިން ބޭރު ކުންފުންޏަކުން ނަގައިގެން އުޅޭ ތަނެއް ތަނަކީ، އަހަރެމެން އެތަނުގެ މަސައްކަތް ތަކެއް ނަގައިގެން ކުރަނީ، އެތަނުގެ ކުރާ ހުރިހާ ކޮންސްޓްރަކްޝަން މަސައްކަތެއް ކުރަނީ އަހަރެމެން” ސަލީމް ވިދާޅުވި އެވެ.

ތްރީކޭ އިންޓަރނޭޝަނަލްގެ ފަރާތުން ވާހަކަ ދައްކަވަމުން ސަލީމް އިތުރަށް ވިދާޅުވީ ނާގޯށި މިހާރު އޯންކުރަނީ ރޝިިޔާ ކުންފުންޏެއް ކަމަށާއި އެމީހުން ފައިސާ ދޭވަރަކުން އެމީހުން ހަވާލު ކުރާ ކަންކަން ކުރަމުން ގެންދާކަމަށެވެ.

ކާލްސަން ހޮޓެލްސްގެ ރެޑިސަން ބްރޭންޑްގެ ރިސޯޓެއް ނާގޯށީގައި ތަރައްޤީކުރުމަށްޓަކައި އެރަށް ކުއްޔަށް ނަގައިގެން އުޅޭ ތްރީ ކޭ އިންޓަނެޝަނަލްއާ އެކު 2011 ވަނަ އަހަރު ކުރީކޮޅުވަނީ އެއްބަސްވުމެއްގައި ސޮއިކޮށްފަ އެވެ. ހދ. އަތޮޅުގައި އޮތް އެންމެ ހިތްގައިމު ރަށް ކަމަށްވާ ނާގޯއްޓަކީ 17 ސެޕްޓެމްބަރ 2006 ގައި ސަރުކާރުން އެމްޓީޑީސީ އަށް ކުޔަށް ދޫކޮށްފައިވާ ރަށެކެވެ. އެމްޓީޑީސީން، ރާއްޖޭގައި ރަޖިސްޓްރީކޮށްފައިވާ ކުންފުންޏެއް ކަމަށްވާ ތްރީ ކޭ އަށް އެ ރަށް ކުއްޔަށް ދިނީ 2008 ވަނަ އަހަރު ކުރީކޮޅެވެ.

އެ ރަށުގައި 600 އެނދު ތަރައްގީކުރުމަށް ސަރުކާރުން ވަނީ ހުއްދަދީފަ އެވެ. ތްރީ ކޭ އިންޓަނޭޝަނަލް އިން 91 މިލިއަން ޑޮލަރު ( 1.2 ބިލިއަން ރުފިޔާ) ޚަރަދުކޮށްގެން ނާގޯށީގައި ތަރައްޤީކުރާ 281 ވިލާގެ އަގު ބޮޑު ރިސޯޓްގައި ހަދާ ވިލާތަކުގެ ތެރެއިން 182 ވިޅާ އަޅާނީ އެއްގަމުގަ އެވެ. ބާކީ 99 ވިލާ އަޅަން ހަމަޖައްސާފައިވަނީ ވަށައިގެން އޮތް ހިތްގައިމު ފަޅު ތެރޭގަ އެވެ.

އެ ރަށުގެ މޫދުގައި ދެ ރެސްޓޯރަންޓް ހަދަން ހަމަޖައްސާފައިވާ އިރު، 16 ކޮޓަރީގެ ސްޕާއަކާއި ބޮޑެތި މީހުންނާއި ކުޑަކުދިންނަށް ހާއްސަ ދެ ސުވިމިން ޕޫލާއި ޖިމެއް ވެސް ހިމެނޭނެކަމަށް ޓޫރިޒަމާ ގުޅޭ ހަބަރުތައް ގެނެސްދޭ ވެބްސައިޓެއް ކަމަށްވާ އޭޝިއާ ޓްރެވަލް ޓިޕްސްގައި 2011 ވަނަ އަހަރު ކުރީކޮޅު ރިޕޯޓްކޮށްފައިވެއެވެ. ކާލްސަން އިން ދަނީ ރާއްޖޭގައި އިތުރު އިންވެސްޓްމަންޓެއް ވެސް ކުރަމުންނެވެ. އެއީ އެސްޓީއޯ އަށް ހުޅުމާލޭން ދޫކޮށްފައިވާ ބިމުގައި ތަރައްގީކުރާ ރެޑިސަން ބްރޭންޑްގެ 250 ކޮޓަރީގެ ހޮޓަލެވެ.

ކާލްސަންގެ 1،060 ހޮޓަލާއި 1،000 އަށް ވުރެ ގިނަ ރެސްޓޯރަންޓް ދުނިޔޭގެ އެކި ހިސާބުތަކުގައި ހިންގަމުންދެ އެވެ. ކާލްސަންގެ އެކި ބްރޭންޑުތަކުގެ ދަށުން ހިންގާ ވިޔަފާރިތަކުގައި 150،000 އަށް ވުރެ ގިނަ މީހުން ވަޒީފާ އަދާކުރާކަމަށް މީޑިޔާ ރިޕޯޓް ތަކުންބުނެ އެވެ.

ނޯޓް: މިއީ މިހާރު ކުރިއަށްދާ މީޑިއާތަކުގެ ކެމްޕެއިން ”ހދ ފަތުރުވެރިކަމަށް ދަހިވެފައި” ގައި ބައިވެރިވާ ހުރިހާ މީޑިއާއެއްގައި ލިއަމުން ދާ ސިލްސިލާގެ ލިޔުމެކެވެ.