ކުޅުދުއްފުށީގައި އަޟްހާ އީދު ނަމާދު ބޮޑު ޖަމާއަތެއްގައި ކުރުމަށް ތައްޔާރުވަނީ

މި އަހަރުގެ ފިތުރު އީދު ނަމާދެކޭ އެއްގޮތަށް ހުސްބިމެއްގައި އެއް ޖަމާއަތެއްގައި ކުޅުދުއްފުށީގައި އަޟްހާ އީދު ނަމާދު ކުރުމަށް ތައްޔާރުވަމުން އެބަދެ އެވެ.

މިކަން ކުރުމަށް އިސްނަގާފައިވާ ހުސައިން އަލީ މިނޫހަށް މައުލޫމާތު ހިއްސާކުރަމުން ވިދާޅުވީ ރަސޫލާގެ ސުންނަތާ އެއްގޮތަށް އީދު ނަމާދު ހުސްބިމެއްގައި އެއް ޖަމާއަތެއްގެ ގޮތަށް ކުރުމަށް މަސައްކަތް ކުރަމުން އަންނަ ކަމަށެވެ.

މިދިޔަ އަހަރުގެ އަޟްހާ އީދު ނަމާދާއި މިއަހަރުގެ ފިތުރު އީދު ނަމާދުވެސް ކުރެވުނު ޒޯން ސްޓޭޑިމުގައި މި އަހަރުގެ އަޟްހާ އީދު ނަމާދު ކުރަން ހަމަޖެހިފައިވާއިރު މިތަނުގައި 6000 މީހުންގެ ޖާގަ ލިބޭނެކަމަށް ހުސެއިން ވިދާޅުވި އެވެ.

އަންހެނުންނާއި ފިރިހެނުންނަށް ވަކިން ވަދެ ނިކުމެވާން ގޭޓުތަށް ހަމަޖައްސާއިރު ނަމާދުގައި ބައިވެރިނުވެވޭ އަންހެނުންނަށް ހުތުބާ އަޑު އެހުމުގެ ފުރުސަތު ހޯދައިދިނުމަށް ހާއްސަ އިންތިޒާމުތަކެއް ހަމަޖެއްސޭނެކަމުގައިވެސް އޭނާ ވިދާޅުވި އެވެ. އަދި ދަތުރުތައް ކުރުމަށް ޕިކަޕްގެ ހިދުމަތް ހަމަޖެއްސުމަށްވެސް މަސައްކަތް ކުރަމުންދާ ކަމަށް އޭނާ ވިދާޅުވި އެވެ.

ހުސެއިން މައުލޫމާތުދިންގޮތުގައި އަޟްހާ އީދު ނަމާދު އިމާމުވެ ކުރައްވާނެ ބޭފުޅެއް އަދި ހަމަޖެހިފައިނުވި ނަމަވެސް އިމާމުވެލައްވާނީ ކުޅުދުއްފުށީގެ އިމާމެއް ކަމަށެވެ.

ކުޅުދުއްފުށީ ކައުންސިލުން ކުރިން ބުނެފައިވާގޮތަށް މިކަމަށް އެއްބާރުލުންދޭނެ ކަމަށް އުއްމީދުކުރާ ކަމަށާއި ސަރުކާރު މުއައްސަސާތަކާއި އަމިއްލަ ފަރުދުންވެސް މިއީ އެމީހެއްގެ އަމިއްލަ ކަމެއް ކަމަށް ދެކިގެން މިކަމަށް ވެދެވެން އޮތް އެހީތެރިކަމެއްވެ ދެއްވުމަށް ހުސެއިން އެދުނެވެ.

މާލީ ގޮތުންނާއި އަމަލީ ގޮތުން މިކަމަށް އެހީ ތެރިކަމެއް ފޯރުކޮށްދޭން ބޭނުންވާ ބޭފުޅުން މި 7947133،9858133 ނަންބަރުތަކަށް ގުޅުވުމަށްވެސް އޭނާ އެދެ އެވެ.

ހުސްބިމުގައި ކުރެވުނު މި އަހަރުގެ ފިތުރު އީދު ނަމާދުގައި ހާހެއްހާ މީހުން ބައިވެރިވިއިރު އިމާމުވެ ނަމާދު ކޮށްދެއްވާފައިވަނީ ރާއްޖޭގެ މަޝްހޫރު ދީނީ އިލުމްވެރިއާ އަދި ފިގްހު އެކަޑަމީގެ ނައިބު ރައީސް ޑރ. އިޔާޒެވެ