އިންސާނީ ހައްގުތަކާ ގުޅޭގޮތުން ބާއްވާ ސްކޫލުތަކުގެ ޑްރާމާ މުބާރާތުގައި ޖަލާލުއްދީން ސްކޫލުން ބައިވެރިއްޖެ

އިންސާނީ ހައްގުތަކާ ގުޅޭގޮތުން ސްކޫލުތަކުގެ މެދުގައި ބާއްވާ ފުރަތަމަ ޑްރާމާ މުބާރާތުގައި ޖަލާލުއްދީން ސްކޫލުން ބައިވެރިވެއްޖެ އެވެ.

ހިއުމަން ރައިޓްސް ކޮމިޝަނުން އިންތިޒާމްކޮށްގެން ކުރިއަށްގެންދާ މިމުބާރާތުގައި ޖުމްލަ 7 ސްކޫލުން ބައިވެރިވެފައިވެ އެވެ.ޖަލާލުއްދީން ސްކޫލުގެ ހިއުމަން ރައިޓްސް ކުލަބުގެ 33 ދަރިވަރަކުވަނީ މި މުބާރާތައްޓަކައި އިއްޔެ މާލެ ގޮސްފަ އެވެ.

އޭގެ އިތުރުން ސްކޫލްގެ ފަރާތުން 10 ބެލެނިވެރިންނާއި 1 ލީޑިން ޓީޗަރަކާއި އިތުރު 2 ޓީޗަރުން ވެސް މާލެ ގޮސްފައި ވާ ކަމަށާއި އަދި އަމިއްލަ ގޮތުންވެސް ގިނަ އަދަދެއްގެ ބެލެނިވެރިން ދަރިވަރުންނާއެކު މި ދަތުރުގައި ބައިވެރިވެފައި ވާކަމަށް ޖަލާލުއްދީން ސްކޫލްގެ އިންފޮމޭޝަން އޮފިސަރ އައިމިނަތު މުހައްމަދު ވިދާޅުވި އެވެ.

މައުލޫމަތު ދެއްވަމުން އައިމިނަތު މުހައްމަދު ވިދާޅުވީ މިމުބާރާތައް ކުދިން ހޮވާފައި ތިބޭނީ މި މުބާރާތައް ހުޅުވާލި ފުރުސަތުގައި އެކަމުގައި ބައިވެރިވި ކުދިންކަމަށެވެ. އަދި މާލެދިއުމުގެ ކުރިން މިކުދިންނަށް ތަމްރީން ދެވިފައިވާނެ ކަމަށް ވެސް ވިދާޅުވިއެވެ.

ހިއުމަން ރައިޓްސް ކޮމިޝަނުން ބުނީ ޑްރާމާތަކުގެ ޒަރީއާއިން އާންމުންގެ މެދުގައި އިންސާނީ ހައްގުތަކަށް ހޭލުންތެރިކުރުވުމުގެ މަގްސަދުގައި ފެށި މި މުބާރާތުގައި ހަތް ސްކޫލަކުން ބައިވެރިވެފައިވާ ކަމަށެވެ. އަދި މި މުބާރާތުގައި ރަށް ރަށުން ބައިވެރިވި ކުދިން ޑްރާމާ ކުޅެ އޭގެ ވީޑިއޯ ފޮނުވާފައިވާ ކަމަށް ވެސް އެ ކޮމިޝަނުން ބުންޏެވެ.

އޮލިމްޕަހުގައި އާންމުކޮށް ހުޅުވާލައިގެން ކުރިއަށް ގެންދާ މި މުބާރާތުގައި ކުޑަކުދިންނާއި އަންހެނުންގެ ހައްގުތަކާއި ބިދޭސީ މަސައްކަތްތެރިންގެ ހައްގާއި އުމުރުން ދުވަސްވީ މީހުންނާއި އުނގެނުމާއި ދުޅަހެޔޮ ސިއްހަތެއްގައި ހުރުމާއި ނުކުޅެދުންތެރިކަން ހުންނަ މީހުންގެ ހައްގުތަކާ ގުޅޭގޮތުން ސްކޫލުތަކުން ޑްރާމާ ހުށަހަޅައިދިނުމަށް ހަމަޖެހިފަވާ ކަމަށް އެކޮމިޝަނުން މައުލޫމާތުދެ އެވެ.

އެޗްއާރުސީއެމުން ބުނީ ރައްޔިތުންގެ ބޭނުންތަކާއި ތަހައްމަލު ކުރަންޖެހޭ ކަންކަން އަންގައިދީ ދައުލަތުން އެކަންކަމަށް ބާރު އެޅުމަކީ ވެސް މި މުބާރާތުގެ މަގްސަދެއް ކަމަށެވެ.

މި މުބާރަތުގައި އެކުދިން ޕާރފޯމް ކުރުމަށް ހަމަޖެހިފައިވަނީ މިއަދު ހަވީރު ކަމަށާއި އެކުދިން އެނބުރި ކުޅުދުއްފުއްޓަށް އައުމަށް ހަމަޖެހިފައިވަނީ މާލޭގައި 2 ދުވަހު މަޑުކުރުމަށްފަހު މިމަހު 27 ވަނަ ދުވަހު ހެދުނު އެވެ.

މި މުބާރާތް ކުރިއަށް ގެންދަން ހަމަޖެހިފައިވަނީ މިމަހުގެ 26، 27، އަދި 28 ދުވަހުގެ ނިޔަލަށެވެ.