ޓީޗަރުން މަސައްކަތް ކުރަމުންދަނީ ވަރަށް ދަތި ހާލުގައި: ކައުންސިލަރ އުއްމު

ޓީޗަރުން މަސައްކަތް ކުރަމުންދަނީ ވަރަށް ދަތި ހާލުގައި އެހާމެ ބުރަކޮށް ކަމަށް ހދ. އަތޮޅު ކައުންސިލް މެމްބަރު އުއްމުކުލްސޫމާ އިބުރާހިމް ވިދާޅުވެއްޖެ އެވެ.

އުއްމުކޫލްސޫމާ މިހެން ވިދާޅުވީ ނެޝަނަލް އިންސްޓިޓިއުޓް އޮފް އެޑިއުކޭޝަނާއި ހދ އަތޮޅު ކައުންސިލާ ގުޅިގެން ބޭއްވި ޕްރީ ސްކޫލު ޓީޗަރުން އައު މުގައްރަރަށް އަހުލުވެރިކުރުމަށް ބޭއްވި މަސައްކަތު ބައްދަލުވުން ނިންމުމަށް ޓީއާރުސީގައި ބޭއްވި ހަފްލާގައި ވާހަކަ ދައްކަވަމުންނެވެ.

އޭނާ ވިދާޅުވީ އަތޮޅު ކައުންސިލް ހުވާ ކުރުމަށް ފަހު ރަށްރަށް ޒިޔާރަކުރި ދަތުރުގައި ގިނަ ރަށްތަކަކުން މިފަދަ މަސައްކަތު ބައްދަލުވުން ތަކަށް އެދިފަވާ ކަމަށެވެ. އަދި މިހާކުރު މުއްދަތެއްގެ ތެރޭގައި އެންއައިއީން މިފަދަ ފްރޮގުރާމެއް މިއަތޮޅުގައި ހިންގުމުން އެފަރާތައް އޭނާ ޝުކުރު އަދާކުރެއްވި އެވެ.

ކުޅުދުއްފުށީގައި ހުރި 2 ޕްރީސްކޫލާއި އަޅާ ބަލާއިރު އަތޮޅުގެ އެހެން ރަށްރަށުގައި ހުރި ޕްރީ ސްކޫލުތަކުގެ ހާލު ވަރަށް ދަށް ކަން އުއްމު ފާހަގަކުރި އެވެ. ޓީޗަރުން ކުރާ ބުރަ މަސައްކަތްތައް އޭނާ ފާހަގަކޮށް އެފަރާތައް ޝުކުރުއަދާ ކުރެއްވި އެވެ.

މި މަސައްކަތު ބައްދަލުވުމުގެ ކޯޑިނޭޓަރ އަދި ނެޝަނަލް އިންސްޓިޓިއުޓް އޮފް އެޑިއުކޭޝަންގެ ޓީޗަރ އެޑިއުކޭޓަރ ޝިޔާމާ އަބޫބަކުރު މިހަފްލާގައި ވާހަކަ ދައްކަވަމުން ވިދާޅުވީ މިމަސައްކަތު ބައްދަލުވުމަކީ ވަރަށް ކާމިޔާބު މަސައްކަތު ބައްދަލުވުމެއް ކަމަށާއި މަސައްކަތު ބައްދަލުވުން ކަމިޔާބުވީ އަތޮޅު ކައުންސިލުނާއި ރަށު ކައުންސިލުތަކުން ދިން އެއްބާރުލުމުގެ ސަބަބުންކަން އޭނާ ފާހަގަކުރައްވާ އެފަރާތަކަށް ޝުކުރު އަދާކުރެއްވި އެވެ.

“ޅަފަތުގެ ތައުލީމާއި ތަރުބިއްޔަތުގެ މަރުހަލާ – މުގައްރަރަށް އަހުލުވެރި ކުރުވުމުގެ މަސައްކަތު ބައްދަލުވުން” މިނަމުގައި މިދިޔަ އާދިއްތަ ފެށިގެން މިއަދުގެ ނިޔަލަށް ކުރިއަށް ގެންދިޔަ މިމަސައްކަތު ބައްދަލުވުމުގައި 80 ޓީޗަރަކު ވަނީ ސެޓްޕިކެޓް ހާސިލުކޮށްފަ އެވެ.

ބައިވެރިންނަށް ސެޓްފިކެޓް ހަވާލުކޮށްދެއްވީ ޝަރަފްވެރި މެހެމާނާ އަތޮޅު ކައުންސިލަރ އުއްމުކުލްސޫމާ އިބުރާހިމާއި ކުޅުދުއްފުށީ ކައުންސިލުގެ ރައީސް އަލީ މުހައްމަދެވެ.