ރާއްޖޭގެ އުތުރުގައި އާމްދަނީއާއި ވަޒީފާގެ ފުރުސަތުތައް އިތުރުކުރުމަށްޓަކައި އިތުރު 5 ރިޒޯޓެއް ބީލަމަށް ލަނީ

ރާއްޖޭގެ އުތުރުގައި އާމްދަނީއާއި ވަޒީފާގެ ފުރުސަތުތައް އިތުރުކުރުމަށްޓަކައި، ފަތުރުވެރިކަމުގެ ސިނާޢަތުގެ ތެރެއިން އިތުރު 5 ރިޒޯޓެއް މިއަހަރުގެ ތެރޭގައި ބީލަމަށް ލައި، އެ ރިޒޯޓުތައް ތަރައްގީ ކުރުމަށްޓަކައި ބަޔަކާ ހަވާލުކުރެވޭނެ ކަމަށް ރައީސް އަބުދުﷲ ޔާމީން ވިދާޅުވެއްޖެ އެވެ.

މިއަދު ފާހަގަކުރާ ދުނިޔޭގެ ޓޫރިޒަމް ދުވަހުގެ މުނާސަބަތުގައި ރައީސް ދެއްވި ހިތާބުގައި ވިދާޅުވީ މި އަހަރުގެ ތެރޭގައި ބީލަމަށް ލާ ރަށްތަކަކީ ރާއްޖޭގެ އުތުރުގެ ސަރަހައްދަށް އާމްދަނީ އާއި ވަޒީފާގެ ފުރުސަތުތައް އިތުރު ކުރުމަށް ޓަކައި ހުޅުވާލާ ރަށްތަކެއް ކަމަށާއި ޓޫރިސްޓް ރިސޯޓްތައް ނެތް ސަރަހައްދުތަކުގައި ޓޫރިޒަމްގެ ވިޔަފާރިތައް ކުރިއަށް ގެންދިޔުމަށް ސަރުކާރުން ފިޔަވަޅުތަކެއް އަޅުއްވާނެ ކަމަށެވެ.

ރާއްޖޭގެ އިގްތިސާދީ ދާއިރާގައި އަދި ހާއްސްކޮށް ފަތުރުވެރިކަމުގެ ދާއިރާއިން ޒުވާނުންނަށް ކުރިއަށް ދެވޭނެ މަގުތައް ތަނަވަސްކޮށްދީ، ވަޒީފާގެ ފުރުސަތުތައް އިތުރަށް ހުޅުވާލަދިނުމަކީ ސަރުކާރުގެ އަމާޒުކަމަށާއި ވިޔަފާރިކުރުމަށް ވިޔަސް ނުވަތަ ވަޒީފާއަށް ކަމަށްވިޔަސް ފަތުރުވެރި ކަމުގެ ދާއިރާއަކީ ޒުވާނުންނަށް ފުރުސަތު އޮތް ދާއިރާއެއްކަން ކަށަވަރުކުރުމަށް ސަރުކާރުން މަސައްކަތް ކުރާނެ ކަމަށް ރައީސް ޔާމީން ވިދާޅުވި އެވެ.

ދިވެހި ޒުވާނުން “އާހިތްވަރަކާއެކު” ފަތުރުވެރިކަމުގެ ދާއިރާއަށް ނުކުތުމަށްވެސް ރައީސް ވަނީ ގޮވާލައްވާފަ އެވެ.

އަދި ރާއްޖެއަށް ޒިޔާރަތްކުރާ ފަތުރުވެރިންގެ އަދަދު އިތުރުވަމުން ދިޔުމަކީ، ރާއްޖޭގެ އިގްތިސާދަށާއި، ރާއްޖޭގެ އިޖުތިމާއީ ތަރައްގީއަށް އެކަމުގެ އަސަރު ހެޔޮގޮތުގައި ކުރަމުންދާނެ ކަމެއްކަމަށާއި އެއީ ރާއްޖެއަށް ވަންނަ ބޭރު ފައިސާގެ އަދަދު އިތުރުވެ ވަޒީފާގެ އިތުރު ފުރުސަތުތައް ތަނަވަސްވެގެންދާނެ ކަމްކަމަށް ރައީސް އިތުރަށް ވިދާޅުވި އެވެ.

ރައީސް ވިދާޅުވި ގޮތުގައި ޓޫރިޒަމްގެ ފައިދާ އެންމެންނަށް ކުރާނެ ގޮތްތަކެއް ފަހިކޮށްދިނުމުގެ ގޮތުން ޓޫރިޒަމް ޑައިވާސިފައި ކުރުމާ އެކު ސިޔާސަތުތަކަށް ގެންނަން ޖެހޭ ބަދަލުތައް ވެސް ސަރުކާރުން އަންނަނީ ގެންނަމުންނެވެ. އެގޮތުން ގާނޫނުތަކާއި ގަވާއިދުތަކަށް ގެންނަން ޖެހޭ ބަދަލުތައް ގެންނަވާނެ ކަމަށް ވެސް ރައީސް ވިދާޅުވި އެވެ. އެގޮތުން ތުބުރި ގެސްޓް ހައުސް އައިލެންޑް ޕްރޮޖެކްޓަކީ ކުދި އަދި މެދުފަންތީގެ ވިޔަފާރިތަކުން ޓޫރިޒަމް ދާއިރާ އަށް ވަނުމަށް އޮތް ރަނގަޅު ފުރުސަތެއް ކަމަށް ރައީސް ވިދާޅުވި އެވެ.

ދުނިޔޭގެ ޓޫރިޒަމް ދުވަހުގެ މުނާސަބަތުގައި ރާއްޖޭގައި ވެސް އަންނަނީ ހާއްސަ ހަރަކާތްތަކެއް ހިންގަމުންނެވެ. އެގޮތުން ގިނަ ރިސޯޓްތަކެއްގައި ސާފު ކުރުމުގެ ޕްރޮގްރާމްތަކެއް ކުރިއަށް ގެންދާއިރު މިއަދު ރާއްޖެ އަންނަ ޓޫރިސްޓުންނަށް މަރުހަބާ ކިޔުމަށް އެއާޕޯޓްތަކުގައި ގިނަ ހަރަކާތްތަކެއް ވެސް ހިންގާނެ އެވެ.