ހިއުމަން ރައިޓްސް ތިއޭޓަރ ފެސްޓިވަލްގައި މާލޭގެ ސްކޫލްތަކާ ވާދަކޮށް ޖަލާލުއްދީން ސްކޫލް އެއް ވަނަ ހޯދައިފި

ހިއުމަން ރައިޓްސް ކޮމިޝަނުން ބޭއްވި އިންޓަރ ސްކޫލް ހިއުމަން ރައިޓްސް ތިއޭޓަރ ފެސްޓިވަލްގައި މާލޭގެ ގިނަ ސްކޫލްތަކަކާ ވާދަކޮށް ޖަލާލުއްދީން ސްކޫލުން އެއްވަނަ ހޯދައިފި އެވެ.

އިއްޔެ ހަވީރު އޮލިމްޕަހުގައި ބޭއްވި ނަތީޖާ ފާޅުކުރުމުގެ ހަފުލާގައި ޖަލާލުއްދީން ސްކޫލަށް ވަނީ ހާއްސަ ޓްރޮފީއަކާއި މެޑަލް އަދި ސެޓްފިކެޓް ހަވާލުކޮށްފަ އެވެ. ސްކޫލްގެ ފަރާތުން މިތަކެއްޗާ ހަވާލުވެފައިވަނީ ސްކޫލްގެ ކުރީގެ ދަރިވަރު އިބްރާހިމް ޒިޔާދެވެ.

މި ނޫހާ ވާހަކަ ދައްކަމުން ޖަލާލުއްދީން ސްކޫލުން ޑްރާމާގައި ބައިވެރިވި ދަރިވަރެއްކަމަށްވާ ރައުފާ އާދަމް ބުނީ މިފަދަ މުބާރާތެއްގައި ފުރަތަމަ ފަހަރަށް ބައިވެރިވެ މާލޭގެ ސްކޫލްތަކާ ވާދަކޮށް މިފަދަ ބޮޑު ކާމިޔާބީއެއް ލިބުމުން ވަރަށް އުފާވާ ކަމަށާއި ސްކޫލްގައި ހިއުމަން ރައިޓްސް ކުލަބް އުފެއްދި އަހަރު މި މުބާރާތުން އެއްވަނަ ލިބިގެންދިއުމަކީ ވަރަށް ބޮޑު ކުރިއެރުމެއް ކަމަށެވެ. އަދި ޖަލާލުއްދީން ސްކޫލުން މިފަދަ ބޮޑު ފުރުސަތެއް ދެއްވި ކަމަށްޓަކައި ސްކޫލަށް ރައުފާ ވަނީ ޝުކުރުއަދާކޮށްފަ އެވެ.

ސްކޫލްކުދިންގެ ފަރާތުން ހުށަހަޅައިދޭ ޑްރާމާ ތަކުގެ ޒަރިއްޔާއިން އާއްމުންގެ މެދުގައި އިންސާނީ ހައްގުތަކަށް ހޭލުންތެރި ކުރުވުމުގެ މަގްސަދުގައި ބޭއްވި މި ފެސްޓިވަލްގައި ޖަލާލުއްދީން ސްކޫލްގެ އިތުރުން މާލޭގެ އަމީނިއްޔާ ސްކޫލާއި ހިރިޔާ ސްކޫލާއި ޖަމާލުއްދީން ސްކޫލް އަދި ގަލޮޅު މަދަރުސާ ބައިވެރިވެފައިވެ އެވެ. އަދި އަތޮޅު ތެރެއިން ހާފިޒް އަހުމަދު ސްކޫލާއި ބ.ތުޅާދޫ ސްކޫލް ބައިވެރިވި އެވެ.

މި މުބާރާތުގެ ދެވަނަ އަށް ގަލޮޅު މަދަރުސާ ދިޔައިރު ތިން ވަނަ ގޮސްފައިވަނީ ޖަމާލުއްދީން ސްކޫލެވެ.

މި ފެސްޓިވަލްގައި ފެނިގެންގޮސްފައިވަނީ ކުޑަކުދިންގެ ހައްގުތައް، އަންހެނުންގެ ހައްގުތައް، ބިދޭސީ މަސައްކަތްތެރިންގެ ހައްގުތައް، އުމުރުން ދުވަސްވީ މީހުންގެ ހައްގުތައް، އުގެނުމުގެ ހައްގު، ދުޅަހެޔޮ ސިއްހަތެއްގައި ހުރުމުގެ ހައްގު އަދި ނުކުޅެދުންތެރިކަން ހުންނަ މީހުންނަށް ލިބިގެންވާ ހައްގުތައް އެކުލެވޭ ގޮތަށް ތައްޔާރު ކޮށްފައިވާ ޑްރާމާ ތަކެކެވެ.

ޖަލާލުއްދީން ސްކޫލްގެ ހިއުމަން ރައިޓްސް ކުލަބުގެ 33 ދަރިވަރަކުވަނީ މި މުބާރާތައްޓަކައި ބައިވެރިވެފަ އެވެ.