ކުޅުދުއްފުށީގައި ޑިޖިޓަލްކޮށް ބާއްވާ ފުރަތަމަ ގުރްއާން މުބާރާތް ފަށައިފި

އިހުލާސް ގުރްއާން ކުލާހުން އިންތިޒާމްކޮށްގެން ކުޅުދުއްފުށީގައި ޑިޖިޓަލްކޮށް ބާއްވާ ފުރަތަމަ ގުރުއާން މުބާރާތް މިއަދު ފެށިއްޖެ އެވެ.

މިއަދު ހަވީރު ތިލަދެކުނު ސިނަމާގައި މުބާރާތް ފެށުމުގެ ގޮތުން ބޭއްވި ހަފުލާ ޝަރަފުވެރިކޮށްދެއްވާ ކުޅުދުއްފުށީ ކައުންސިލްގެ ރައީސް އަލީ މުހައްމަދު ދެއްކެވި ވާހަކަފުޅުގައި ގުރްއާން މުބާރާތްތަކުގައި ގުރްއާން ރީތިކޮށް ކިޔެވުމުގެ އިތުރުން އެ ގުރްއާން ދަސްކޮށްދޭ ރިވެތި ގޮތްތަކަށް އަމަލުކުރުމަކީ މުހިންމު ކަމެއް ކަމަށާއި މިފަދަ މުބާރާތްތައް ކުޅުދުއްފުށީ ގިނަ ގިނައިން ބާއްވާ މުބާރާތްތަކުގައި ގިނަ ފަރާތްތައް ބައިވެރިވުމަށް ގޮވާލާފައިވެ އެވެ.

އިހުލާސް ގުރްއާން މުބާރާތުން ބުނީ މި މުބާރާތް ބޭއްވުމުގެ މަގުސަދަކީ ގުރްއާނަށް ލޯބިޖައްސާ ގުރްއާން ތަޖުވީދަށް ކިޔެވުމަށް އަހުލުވެރިކުރުން ކަމަށެވެ.

ނަމަވެސް އެ ގުރްއާން ކުލާހުގެ 241 ދަރިވަރުންނަށް ހުޅުވާލި މި މުބާރާތަށް ފިނި ތަރުހީބެއް ލިބި ބައިވެރިވެފައިވަނީ 51 ދަރިވަރުންނެވެ. އިހުލާސް ގުރްއާން ކުލާހުން އިންތިޒާމްކުރި ފުރަތަމަ ގުރުއާން މުބާރާތަށް ފުޓްބޯޅަ އަދި އެހެނިހެންވެސް ކުޅިވަރުތަކަށް ލިބިގެންދާ ވަރަށްވެސް ތަރުހީބު ނުލިބުމުން އެ ގުރްއާން ކުލާހުން ވަނީ އެކަމާ ހިތާމާކުރާ ކަމަށް ބުނެފަ އެވެ.

ބަލައިގެން ކިޔުމުގެ ގޮފި އަދި ނުބަލާ ކިޔެވުމުގެ ގޮފީގައި 7 އުމުރު ފުރާއަށް ބަހަލައިގެން ކުރިއަށްދާ މި މުބާރާތުގެ ފަނޑިޔާރުކަން ކޮށްދެއްވަނީ ޖަލާލުއްދީން ސްކޫލްގެ ލީޑިންގ ޓިޗަރ ހުސެއިން ސޮބާހު އާއި އިހުލާސް ގުރްއާން ކުލާހުގެ މުދައްރިސް ރޫހުލް އަމީން އެވެ.

މި މުބާރާތް ކުރިއަށްދާނީ ދެ ދުވަހުގެ މުއްދަތަށް ކުރިއަށްދާ މި މުބާރާތުގެ ފެށުމުގެ ހަފުލާގައި ރަށު ކައުންސިލްގެ މެމްބަރުން ބައިވެރިވެފައިވެފައިވާއިރު މި ހަފުލާގައިވަނީ ޖަލާލުއްދީން ސްކޫލް ކުދިންގެ މަދަހައަކާއި ވީޑިއޯ މަދަހެއް އަދި މުބާރާތާ ބެހޭ ވީޑިއޯއެއް ހުށައަޅާދީފަ އެވެ.

[yass cats=121]