ކުޅުދުއްފުށީ އަމީރު އަމީން ސްކޫލުން ވަގަށްނެގި ލެޕްޓޮޕެއް ހޯދައި މީހަކު ހައްޔަރު ކޮށްފި

މިދިޔަ މަހުގެ 26 ވަނަ ދުވަހުގެ ވަގުތެއްގައި އަމީރު އަމީން ސްކޫލުން ލެޕްޓޮޕެއް ވަގަށް ނަގާފައިވާ މައްސަލައާ ގުޅިގެން މީހަކު ހައްޔަރުކޮށްފި އެވެ.

މި މައްސަލައާ ގުޅިގެން ހައްޔަރުކޮށްފައިވަނީ 22 އަހަރުގެ މީހެކެވެ. އޭނާއަކީ ވައްކަމާއި މަސްތުވާތަކެތީގެ މައްސަލަތަކުގެ ރެކޯޑް އޮންނަ މީހެއް ކަމަށާއި އޭނާ ހައްޔަރުކޮށްފައިވަނީ ކުޅުދުއްފުށި ޕޮލިސް ސްޓޭޝަނަށް ހުށަހެޅުނު މައްސަލައާ ގުޅިގެން ފުލުހުން ކުރަމުންދިޔަ މަސައްކަތުން މިދިޔަ މަހުގެ 27 ވަނަ ދުވަހުގެ މެންދުރު ކޯޓު އަމުރެއްގެ ދަށުން ކަމަށް ފުލުހުން މައުލޫމާތު ދެއެވެ.

ލެޕްޓޮޕް ފެނިފައިވަނީ މި މައްސަލައާ ގުޅިގެން ހައްޔަރުކޮށް އޭނާ ދިރިއުޅެމުންދާ ގެ ބަލައިފާސްކުރިކުރުމުން އޭނާގެ ކޮޓަރި ތެރެއިން ކަމަށްވެސް ފުލުހުން ހާމަ ކުރެއެވެ.

ކުޅުދުއްފުށި މެޖިސްޓްރޭޓް ކޯޓަށް އޭނާ ހާޒިރުކުރުމުން އޭނާ ބަންދުގައި ބަހައްޓައިގެން ތަހުގީގު ކުރިއަށް ގެންދިޔުމަށް 7 ދުވަހުގެ މުއްދަތެއް ވަނީ ދީފައެވެ.

މި މައްސަލަ ކުޅުދުއްފުށި ޕޮލިސް ސްޓޭޝަނުން ދަނީ ތަހުގީގު ކުރަމުންނެވެ.