ކޮމިޝަނަރ ޖެނެރަލް އޮފް ކަސްޓަމްސް ހދ. އަތޮޅު ކޮމާންޑަރާ ބައްދަލު ކުރައްވައިފި

ކޮމިޝަނަރ ޖެނެރަލް އޮފް ކަސްޓަމްސް އަޙްމަދު ޒުހޫރު ހދ. އަތޮޅު ކޮމާންޑަރ ސަބް އިންސްޕެކްޓަރ އޮފް ޕޮލިސް އިބްރާޙީމް މުހައްމަދާއި އިއްޔެ ބައްދަލުކުރައްވައިފި އެވެ.

ކުޅުދުއްފުށި ޕޮލިސް ސްޓޭޝަންގައި އޮތް މި ބައްދަލުވުމުގައި ފުލުހުންނާއި ކަސްޓަމްސްއާ ދެމެދު އޮތް ގުޅުން ދެމެހެއްޓުމުގެ ގޮތުންނާއި ދެފަރާތް ގުޅިގެން ކުރަމުންދާ މަސައްކަތްތަކުގައި އެހީތެރިކަން ފޯރުކޮށްދިނުމަށް ބޭނުންވާ ދާއިރާތަކާއި ދިމާވާ ކަންތައްތަކާ ބެހޭގޮތުން މަޝްވަރާކުރައްވާ ރާއްޖެއަށް މަސްތުވާތަކެތި އެތެރެވުން ހުއްޓުވުމަށް ފުލުހުންނާ ކަސްޓަމްސް ގުޅިގެން ކުރަމުންދާ މަސައްކަތްތަކާ ބެހޭގޮތުންވެސް ވާހަކަ ފުޅުދައްކަވާފައިވާ ކަމަށް ފުލުހުން ހާމަ ކުރެއެވެ.

މި ބައްދަލުވުމުގައި އަތޮޅު ކޮމާންޑަރ ދެއްކެވި ވާހަކަފުޅުގައި ކުރިއަށް އޮތްތަނުގައިވެސް ކަސްޓަމްސްއަށް ފުލުހުންގެ ފަރާތުން އެހީތެރިކަން ދެއްވާނެކަމަށް ވިދާޅުވެފައެވެ. އަދި ކޮމިޝަނަރ ޖެނެރަލް އޮފް ކަސްޓަމްސް އަޙްމަދު ޒުހޫރު ވަނީ ހދ. ކުޅުދުއްފުށި ކަސްޓަމްސް އާއި ހަނިމާދޫ ކަސްޓަމްސްއަށް ފުލުހުންގެ ފަރާތުން ލިބެމުންދާ އެހީތެރިކަމަށް ފާހަގަކޮށް ޝުކުރު ދަންނަވާފަ ކަމަށްވެސް ފުލުހުން މައުލޫމަތުދެ އެވެ.

މި ބައްދަލުވުމުގައި ކޮމިޝަނަރ ޖެނެރަލް އޮފް ކަސްޓަމްސް އަޙްމަދު ޒުހޫރު އާއި ހދ. އަތޮޅު ކޮމާންޑަރ ސަބް އިންސްޕެކްޓަރ އޮފް ޕޮލިސް އިބްރާޙީމް މުޙައްމަދުގެ އިތުރުން ޑެޕިއުޓީ ކޮމިޝަނަރ އޮފް ކަސްޓަމަސް އިސްމާޢީލް ޢަބްދުﷲ އާއި ޗީފް ސްޕްރިންޓެންޑެންޓް މުހައްމަދު މަސީޙް އާއި ހދ. ހަނިމާދޫ ކަސްޓަމްސްގެ ސްޕްރިންޓެންޑެންޓް ތޯރިޤް އިބްރާހިމް އާއި ކުޅުދުއްފުށި ކަސްޓަމްސްގެ ސްޕްރިންޓެންޑެންޓް ޔާސިރު ޢަބްދުއްލަޠީފް ބައިވެރިވެލެއްވިއެވެ.