ހއ އަތޮޅުގައި ފޮރެންސިކް ހިދުމަތް ގާއިމްކޮށް ފޮރެންސިކް ޔުނިޓެއް ހުޅުވައިފި

ފުލުހުންގެ ހިދުމަތް ފުޅާކޮށް ތަރައްޤީކުރުމަށް ކުރަމުންދާ މަސައްކަތްތަކުގެ ތެރެއިން މިދިޔަ ސެޕްޓެމްބަރ 29 ވަނަ ދުވަހު ހއ އަތޮޅުގައި ފޮރެންސިކް ހިދުމަތް ގާއިމްކޮށް ފޮރެންސިކް ޔުނިޓެއް ހުޅުވައިފި އެވެ.

ހއ ދިއްދޫ ޕޮލިސް ސްޓޭޝަންގައި ބޭއްވި ރަސްމިއްޔާތުގައި ފޮރެންސިކް ޔުނިޓް ހުޅުއްވައި ދެއްވުމަށްފަހު ސްޕްރިންޓެންޑެންޓް އޮފް ޕޮލިސް އަޙްމަދު މުހައްމަދު ދެއްކެވި ވާހަކަފުޅުގައި ދިއްދޫގައި ގާއިމްކުރެވިގެންދިޔަ ފޮރެންސިކް ޔުނިޓްގެ ސަބަބުން ހއ އަތޮޅުގެ މައްސަލަތައް ނިންމުމުގައި އިންވެސްޓިގޭޝަން އޮފިސަރުންނަށް އިތުރު ފަސޭހަތަކެއް ވެގެންދާނެކަމަށާއި މި ޔުނިޓް ގާއިމްކުރެވި ފޮރެންސިކް ހިދުމަތް ފެށިގެން ދިޔަކަމުގައިވިޔަސް ކުރިއަށް އޮތްތަނުގައި ފޮރެންސިކް ސަރވިސަސް ޑައިރެކްޓްރޭޓުން ގިނަ ހިދުމަތް ތައާރަފްކުރެވިގެންދާނެކަމަށް ފުލުހުން ހާމަ ކުރެ އެވެ.

ފޮރެންސިކް ޚިދުމަތް ގާއިމްކުރެވިގެންދިޔުމާއެކު ފޮރެންސިކްގެ އެންމެ އަސާސީ ހިދުމަތްތައް ލިބިގެން ދިއުމުގެ އިތުރުން މި ހިދުމަތުގެ ސަބަބުން ހއ އަތޮޅުގެ ރަށްތަކުން ފުލުހުންނަށް ހުށަހެޅޭ މައްސަލަތަކުގައި ތަހުގީގަށް ހެކި ހޯދުމުގައި އިތުރު ފަސޭހަތަކެއް ވެގެންދާނެ ކަމަށް ވެސް ފުލުހުން މައުލޫމާތުދެ އެވެ.

ފޮރެންސިކް ޔުނިޓް ހުޅުވުމަށް ބޭއްވި ރަސްމިއްޔާތުގައި ފޮރެންސިކް ޔުނިޓް ހުޅުއްވައި ދެއްވީ ފޮރެންސިކް ސަރވިސަސް ޑައިރެކްޓްރޭޓް ގެ ޑެޕިއުޓީ ހެޑް ސްޕްރިންޓެންޑެންޓް އޮފް ޕޮލިސް އަޙްމަދު މުހައްމަދު އިތުރުން އެ ޑައިރެކްޓްރޭޓްގައި މަސައްކަތްކުރާ އިސް ބައެއް ފުލުހުންނާއި ދިއްދޫ ޕޮލިސް ސްޓޭޝަންގައި މަސައްކަތްކުރާ އިސް ފުލުހުން ބައިވެރިވެފައިވެ އެވެ.