ހިއުމަން ރައިޓްސް ކޮމިޝަނުން ރާއްޖެއަށް ހުޅުވާލި މަޒުމޫނު ލިޔުމުގެ މުބާރާތުގެ އެއްވަނަ ޖަލާލުއްދީން ސްކޫލްގެ ދަރިވަރަކު ހޯދައިފި

ހިއުމަން ރައިޓްސް ކޮމިޝަން އޮފް ދަ މޯލްޑިވްސްއިން މުޅި ރާއްޖޭގެ ހުރިހާ މަތީ ސާނަވީއަށް ކިޔަވައިދޭ ސްކޫލްތަކުގެ ދަރިވަރުންނަށް ހުޅުވާލި މަޒުމޫނު ލިޔުމުގެ މުބާރާތުގެ އެއްވަނަ ޖަލާލުއްދީން ސްކޫލްގެ އައިޝަތު ލީނާޒް ހޯދައިފި އެވެ.

މި ނޫހަށް މައުލޫމާތު ދެއްވަމުން ޖަލާލުއްދީން ސްކޫލްގެ ލީޑިންގ ޓީޗަރ އައިމިނަތު މުހައްމަދު ވިދާޅުވީ މަތީ ސާނަވީއަށް ރާއްޖެގައި ކިޔައިދޭ 11 ސްކޫލަކުން ދިވެހި އަދި އިނގިރޭސި 70 މަޒުމޫނު ހިމެނުނު މި މުބާރާތުގެ އެއްވަނަ ލީނާޒް ހޯދާފައިވަނީ ދިވެހި މަޒުމޫނު ބައިން ކަމަށާއި އެއީ 3 ފަނޑިޔާރުންގެ ކޮމިޓީއަކުން މާކްސް ދީގެން އެންމެ މަތިން މާކްސް ހޯދައިގެން ކަމަށެވެ.

“ދިވެހި ރާއްޖޭގައި އަންހެނުންނަށް އިންސާނީ ހައްގުތައް ފުރިހަމަ ގޮތުގައި ލިބިގަތުމަށް ހުރި ގޮންޖެހުންތައް” މި މައުޟޫއަށް ލީނާޒް މަޒުމޫނު ލިއެފައިވާއިރު މި މުބާރާތުގައި ޖަލާލުއްދީން ސްކޫލުން އިތުރު 4 ކުދިން ބައިވެރިވި އެވެ.

މި މުބާރާތް ހަމަޖެހިފައިވާ ގޮތުން މުބާރާތުގައި ބައިވެރިކުރި މަޒުމޫނުތައް މީޑިޔާގައި ޝާއިރުކޮށް ވަނަވަނަ ދިޔަ ދަރިވަރުންނަށް ހަނދާނީ ލިޔުން ދިނުމަށް ވަނީ ހަމަޖެހިފަ އެވެ.

މީގެ ކުޑަ ދުވަސްކޮޅެއް ކުރިން ހިއުމަން ރައިޓްސް ކޮމިޝަނުން ބޭއްވި އިންޓަރ ސްކޫލް ހިއުމަން ރައިޓްސް ތިއޭޓަރ ފެސްޓިވަލްގައި މާލޭގެ ގިނަ ސްކޫލްތަކަކާ ވާދަކޮށް އެ މުބާރާތުންވެސް ޖަލާލުއްދީން ސްކޫލް ވަނީ އެއްވަނަ ހޯދައިފަ އެވެ.