ހދ. ކަނޑުމައިވާދޫގައި އޯޕަން ޖަލެއް އެޅުމަށް ތައްޔާރުވަނީ

Oct 4, 2014

ހދ. ކަނޑުމައިވާދޫގައި އޯޕަން ޖަލެއް ހެދުމަށް ތައްޔާރުކުރުމުގެ އިދާރީ މަސައްކަތްތައް ހުރީ ނިންމުމާއި ހިސާބުގަ ކަމަށް ހޯމް މިނިސްޓަރ އުމަރު ނަސީރު ވިދާޅުވެއްޖެ އެވެ.

ދިޓީވީގެ ހަބަރުތެރެއިން ޕްރޮގްރާމްގައި ވާހަކަ ދައްކަވަމުން އުމަރު ނަސީރު ވިދާޅުވީ ކަނޑުމައިވާދޫގައި އަޅަން ތައްޔާރުކުރާނީ އޯޕަން ޖަލެއް ކަމަށާއި އެއީ މީހުން އަރުވާލާފައި ތިބޭއިރު ތިބޭގޮތަށް ހަދާފައިވާ ޖަލެއް ކަމަށެވެ. އަދި އެރަށް ހެދުމާއެކު އެރަށުގައި ކުށްވެރިން އުޅޭނީ އަމިއްލައަށް ކައްކައި ދަނޑު ހައްދައިގެން ކަމަށް މިނިސްޓަރު ވިދާޅުވި އެވެ.

އެޖަލަށް ލާނީ ދުވަސްވީ މީހުންނާއި ވަރަށް އާދައިގެ ކުށްތައް ކޮށްފައިވާ މީހުން ކަމަށްވެސް އުމަރު ވިދާޅުވި އެވެ.

އޯޕަން ޖަލެއްގެ އިތުރުން އިތުރު ތިން ވައްތަރެއްގެ ޖަލެއް ހެދުމަށް ނިންމާފައިވާ ކަމަށް ހޯމް މިނިސްޓަރު އުމަރު ނަސީރު ވިދާޅުވެއްޖެ އެވެ. އެއީ ތިލަފުށީގައި އަޅާ އިންޑަސްޓްރިއަލް ޖަލާއި މާފުށީގައި ކުށްވެރިންނަށް އެންމެ ހައި ސެކިއުރިޓީ ޖަލަކާއި ޓެގްގައި ތިބޭ ކުށްވެރިން ބޭތިއްބުމަށް ހަދާ ޖަލެކެވެ.

އުމަރު ވިދާޅުވީ ކުށްވެރިން ލުމަށް ޖަލު ހެދުމަށް މީގެ ކުރީގެ ހުރިހާ ސަރުކާރަކުންވެސް އަމަލު ކޮށްފައިވާގޮތުން ބުރަ ބޮޑުވަނީ ދައުލަތަށް ކަމަށާއި އެހެންކަމުން މިސަރުކާރުގެ ވިސްނުން ހުރީ ހަތަރު ބަޔަކަށް ކުށްވެރިން ބަހާލައިގެން ޖަލުތައް ހެދުމަށް ކަމަށެވެ.

ކަނޑުމައިވާދޫގެ ރައްޔިތުން ވަނީ ހދ. ނޮޅިވަރަންފަރަށް ބަދަލުކޮށްފަ އެވެ.

ހދ. ކަނޑުމައިވާދޫގައި ޖަލެއް ހެދުމަށް ނިންމާފައިވާއިރު ހދ. ނޭކުރެންދޫގައިވެސް 300 މީހުންގެ ޖާގައިގެ ޖަލެއް ހެދުމަށް ވަނީ ނިންމާފަ އެވެ.

މިލިޔުމާއި ގުޅޭ