ވައިކަރަމުރައިދޫ ރިޒޯޓެއްގެ ގޮތުގައި ތަރައްގީކުރުމަށް ސަރުކާރުން ނިންމައިފި

ހދ.ވައިކަރަމުރައިދޫ ރިޒޯޓެއްގެ ގޮތުގައި ތަރައްގީ ކުރުމަށް ސަރުކާރުން ނިންމަވާފައިވާކަމަށް ޓުއަރިޒަމް މިނިސްޓަރ އަހުމަދު އަދީބު ވިދާޅުވެފައިވާކަމަށް ހދ.އަތޮޅު ކައުންސިލްގެ ރައީސް އާދަމް ނާޞިރު ވިދާޅުވެއްޖެ އެވެ.

މި ނޫހަށް މައުލޫމާތު ދެއްވަމުން ނާޞިރު ވިދާޅުވީ އެގްރިކަލްޗަރ ކޮމްޕޮނެންޓަކާއެކު ވައިކަރަމުރައިދޫގައި ރިސޯޓެއް ތަރައްގީކުރުމަށް ސަރުކާރުން ނިންމަވާފައިވާ ކަމަށާއި، ނަމަވެސް ދެ ކަންތައް ކުރާނީ އެއްފަރާތަކުންތޯ ނުވަތަ ދެފަރާތަކުންތޯ އަދި ނުނިންމަވާކަމަށް މިނިސްޓަރ އަދީބު ވިދާޅުވިކަމަށެވެ.

ނާޞިރު ވިދާޅުވިގޮތުގައި ފިޝަރީޒް އެންޑް އެގްރިކަލްޗަރ މިނިސްޓަރ ޝައިނީވެސް އެކަންވަނީ ކަށަވަރުކޮށްދެއްވާފަ އެވެ. ޝައިނީއާ ހަވާލާދެއްވައި ނާޞިރު ވިދާޅުވިގޮތުގައި އެގްރިކަލްޗަރ ކޮމްޕޮނެންޓެއް ހިމަނާފައިވަނީ އެރަށަކީ ބޮޑު ރަށަކަށްވެފައި ބޮޑު އަދަދެއް ބިމު ކުއްޔަށް ދައްކަން ޖެހިއްޖެނަމަ އިންވެސްޓަރުން ލިބުން ދަތިވެދާނެތީ އެވެ.

ނާޞިރު ވިދާޅުވިގޮތުގައި މިއީ ހދ.އަތޮޅުގައި ރިޒޯޓެއް ހުޅުވުމަށް އަތޮޅު ކައުންސިލުން އިސްނަގައިގެން، ހދ.އަތޮޅުގެ ދާއިރާތައް ތަމްސީލްކުރައްވާ މަޖިލީސް މެމްބަރުންނާ ގުޅިގެން ކުރަމުންދާ މަސައްކަަތަށް ލިބުނު ކުރިއެރުމެކެވެ.

ނާޞިރު އިތުރަށް ވިދާޅުވީ މިއީ ކުރީގެ އަތޮޅު ކައުންސިލުންވެސް ކުރަމުންއައި މަސައްކަތެއްކަމަށާއި، 25 ފެބްރުއަރީ 2014 ވަނަ ދުވަހުން ފެށިގެން މިހާރުގެ އަތޮޅު ކައުންސިލުން އެންމެ އިސްކަމެއް ދީގެން މަސައްކަތްކުރަމުންދާ އެއް ކަންތައްކަމަށެވެ. އެހެން ނަމަވެސް ފުރިހަމަ ހިތްހަމަޖެހުމެއް ލިބޭނީ ހދ.އަތޮޅުގައި ރިޒޯޓެއް ހުޅުވިގެން ދިޔުމުން ކަމަށާއި، މިހާރު ރިސޯޓް ހަދަން ދޫކޮށްފައިވާ 3 ރަށުގެ މަސައްކަތް ނިމި އަވަހަށް ހުޅުވޭނެ މަގެއް ހޯދުމަށް ކަމާބެހޭ ފަރާތްތަކާއެކު މަސައްކަތް ކުރައްވަމުންދާކަމަށް ނާޞިރު ވިދާޅުވިއެވެ.

އެގޮތުން އެރަށްރަށުގެ ކަންތައް އެންމެ އަވަސް މަގަކުން ނިންމުމަށްޓަކައި ގާނޫނީގޮތުން ކުރައްވަންޖެހޭ ކަންކަމުގެ ލަފާ ޓުއަރިޒަމް މިނިސްޓްރީގެ ގާނޫނީ ޓީމާ މަޝްވަރާކުރައްވައިގެން ހޯއްދަވަމުން ގެންދަވާކަމަށް މިނިސްޓަރ އަދީބާ ހަވާލާދެއްވައި ނާޟިރު ވިދާޅުވިއެވެ.

ވައިކަރަމުރައިދޫއަކީ އަލްމަރުހޫމް އަލީ އަބްދުﷲ (އެލިއާ) އަށް ދަނޑުވެރިކަމަށް ދޫކުރެވިފައިވާ ރަށެކެވެ. ދަނޑުވެރިކަމަށް ދޫކުރެވިފައިވާ މުއްދަތު ހަމަވާނީ އަންނަ 2015 ވަނަ އަހަރުގެ އޭޕްރީލް މަހު އެވެ.

ހދ.އަތޮޅުގައި ރިޒޯޓެއް ހުޅުވިފައިނެތުމުން ކަމާބެހޭ ފަރާތްތަކުގެ ސަމާލުކަމަށް އެކަން ގެނައުމަށްޓަކައި އެއަތޮޅަށް ނިސްބަތްވާ އޮންލައިން ނޫސްތައް ގުޅިގެން ދަނީ ކެމްޕެއިންނެއް ކުރަމުންނެވެ. އެގޮތުން ކެމްޕެއިންގ ލަވައެއްވެސް ވަނީ މި ސެޕްޓެމްބަރ މަހުގެ 28 ވަނަ ދުވަހުގެ ރޭ ނެރެފަ އެވެ.