ރޯ ހައުސްއަށް އެދުނު ފަރާތްތަކުގެ ލިސްޓަށް ޝަކުވާ ހުށައެޅުމުގެ ފުރުސަތު ހުޅުވާލައިފި

ކުޅުދުއްފުށީގައި އިމާރަތް ކޮށްފައިވާ ރޯ ހައުސްތަކުގެ ތެރެއިން ކުޅުދުއްފުއްޓަށް ހުޅުވާލާފައިވާ 100 ރޯ ހައުސްއަށް އެދުނު ފަރާތްތަކަށް ޕޮއިންޓް ލިބިފައިވާ ގޮތުގެ ލިސްޓް އާންމުކޮށް، އެ ލިސްޓަށް ޝަކުވާ ހުށަހެޅުމުގެ ފުރުޞަތު ރަށު ކައުންސިލުން ހުޅުވާލައިފި އެވެ.

ރޯ ހަައުސް ތަކަށް އެދި ޖުމްލަ 460 ފަރާތެއް ފޯމްގެ ހުށައަޅާފައިވާއިރު އޭގެތެރެއިން ކައުންސިލުން އާންމު ކުރި ލިސްޓްގައި ހިމަނާފައިވަނީ 421 ފަރާތެއްކަމަށް ކައުންސިލުން މައުލޫމާތު ދެއެވެ. އެގޮތުން 39 ފޯމެއްވަނީ އެކި ސަބަބުތަކާ ހުރެ ބާތިލްވެފަ އެވެ.

ކުޅުދުއްފުށީ މީހުންގެތެރެއިން ރަށުން ބޭރު ފަރާތްތަކާ ކައިވެނިކޮށްގެން އުޅޭ ފަރާތްތަކުގެ ގޯތިގެދޮރުގެ މަޢުލޫމާތު ހުރިނެތްގޮތް އަތޮޅުތަކުން ސާފުވީހާ އަވަހަކަށް، އެފަރާތްތަކުގެ ތެރެއިން ގޯތިގެދޮރު ލިބިފައިވާ ފަރާތްތަކުން އެފަރާތްތަކަށް ލިބިފައިވާ ގޯތި ދޫކޮށްލުމަށް އެއްބަސްވުން ޝަރުތަކަށްވާތީ އެފަރާތްތަކުގެ ބަޔާން ނެގުން އޮންނާނެކަމަށާއި، އަދި ރޯހައުސްއެއް ލިބިއްޖެނަމަ، ލިބިފައިވާ ގޯތި ސަރުކާރަށް ދޫކޮށްލުމަށް އެއްބަސްނުވާ ފަރާތްތައް ދާއިމީ ލިސްޓްގައި ނުހިމެނޭނެކަމަށް ކުޅުދުއްފުށީ ކައުންސިލުން މަޢުލޫމާތުދެއެވެ.

ލިސްޓަށް ޝަކުވާ ހުށައެޅުމަށް ބޭނުންފުޅުވާ ބޭފުޅުންނަށް ފޯމް ދޫކުރުން މިމަހު 1 ން ނޮވެމްބަރ 10 ވަނަ ދުވަހާ ހަމައަށް ބަންދު ނޫން ކޮންމެ ދުވަހެއްގެ ހެނދުނު 9 ން މެންދުރު ފަހު 1:30 ކައުންސިލުގައި އޮންނާނެ އެވެ. އަދި ޝަކުވާ ހުށައެޅުމަށް ބޭނުންފުޅުވާ ފަރާތްތަކުގެ ފޯމްތައް ބަލައިގަތުން މިމަހު 1 ވަނަ ދުވަހުން ނޮވެމްބަރ 10 ށް ބަންދުނޫން ކޮންމެ ދުވަހެއްގެ ހެނދުނު 9 ން މެންދުރުފަހު 2 ށް ހުޅުވާލެވިފައި ވާނެ އެެވެ.