ދ ބަނޑިދޫ ގެއެއްގެ ގިފިލިތެރެއިން ކުޅުދުއްފުށި މީހަކު މަރުވެފައި އޮއްވާ ފެނިއްޖެ

.ދ. ބަނޑިދޫ ގެއެއްގެ ގިފިލިތެރޭގައި ކުޅުދުއްފުށި މީހަކު މަރުވެފައި އޮއްވާ ފެނިއްޖެ އެވެ

މިނޫހަށް މައުލޫމާތު ލިބިފައިވާ ގޮތުގައި މަރުވެފައި އޮއްވާ ފެނުނީ ކުޅުދުއްފުށީ ސިނަމާގޭ އަލީ ނިޔާޒެވެ. މިމީހާއަކީ ބަނޑިދޫ މީހަކާ އިނދެގެން އެރަށުގައި ދިރިއުޅެމުން ގެންދާ މީހެކެވެ.

ފުލުހުންގެ މީޑިއާ އޮފިޝަލު މި ނޫހަށް މައުލޫމާތުދެމުން ވިދާޅުވީ ރޭ 5:10 ހާއިރު ބަނޑިދޫ ގެއެއްގެ ތެރެއިން މަރުވެފައި އޮއްވަ ފެނިފައިވަނީ އުމުރުން 37 އަހަރުގެ ދިވެހި ފިރިހެނެއްކަމަށާއި، އެމީހާ އެރަށު ސިއްހީ މަރުކަޒަށް ގެންދެވުނު އިރުވެސް ވަނީ މަރުވެފައި ކަމަށް މީޑިއާ އޮފިޝަލް މައުލޫމާތު ދެއެވެ.

މިމީހާ މަރުވެފައި އޮތް އިރު ކައިރީގައި ޑަންލޮޕް ދަޅެއް ހުރި ކަމަށާއި މިމީހާއަކީ މަސްތުވާތަކެތި ބޭނުންކުރާ މީހެއް ކަމަށް އެރަށު މީހުން ތުހުމަތުކުރާ ކަމަށް ވެސް މައުލޫމަތު ލިބިފައި ވެއެވެ.

އާއިލާގެ ފަރާތުން ވާހަކަ ދެއްކި މީހަކު ބުނީ އަލީ ނިޔާޒު ބަނޑިދޫ މީހަކާ އިނދެގެން އެރަށުގައި ދިރިއުޅެމުން އަންނަތާ ގިނަ ދުވަސްތަކެއް ވެފައިވާ ކަމަށާއި މަރުވިއިރު 14 އަހަރުގެ ފިރިހެން ދަރިއަކު ދުނިޔޭގައި އެބަހުއްޓެވެ. ނިޔާޒުއަކީ ބަނޑިދޫ ކަންނެލި ބޯޓެއްގައި މަހައްދާ މީހެކެވެ. ޑޮކްޓަރުންނާ ހަވާލާދީ އާއިލާއިން ބުނީ މަރުވެފައިވަނީ ފިޓުޖެހިގެން ކަމަށެވެ.

މިމައްސަލަ މިހާރު ދަނީ ދ. ކުޑަހުވަދޫ ޕޮލިސް ސްޓޭޝަނާއި، ދ. ބަނޑިދޫ ޕޮލިސް ސްޓޭޝަނާ ގުޅިގެން ތަހުގީގު ކުރަމުންނެވެ.