އެސްޓީއޯއިން މޯލްޑިވް ގޭސް އަގުހެޔޮކޮށް ކުޅުދުއްފުށީގައި ވިއްކަން ފަށައިފި

ދިވެހި ސަރުކާރުގެ ވިޔަފާރި ކުންފުނި އެސްޓިއޯއިން ކުޅުދުއްފުށީގައި މޯލްޑިވް ގޭސް އަގުހެޔޮކޮށް ވިއްކަން ފަށައިފި އެވެ.

އިއްޔެ ކުޅުދުއްފުށި އެސްޓީއޯ ބްރާންޗުން ވިއްކަން ފެށި މޯލްޑިވް ގޭހުގެ 10 ކިލޯގެ ފުޅިއެއް ވިއްކަމުން ދަނީ 290 ރުފިޔާއަށެވެ. މޯލްޑިވް ގޭހުގެ ކުޅުދުއްފުށީ އެޖެންޓް ކަމަށްވާ ސޭމްއިން އިއްޔެއާ ހަމައަށް 10 ކިލޯގެ ގޭސް ފުޅިއެއް ވިއްކަމުން އައިސްފައިވަނީ 310 ރުފިޔާއަށެވެ.

“ކުޅުދުއްފުށި އޮންލައިނާ” ވާހަކަ ދައްކަމުން އެސްޓީއޯގެ އޮފިޝަލަކު ބުނީ ގޭސް ފުޅި ޑެލިވަރީ ކޮށްދިނުމަށް ހަމަޖެހިފައިވަނީ އެސްޓީއޯ ކުޅުދުއްފުށި ފިހާރަ ހުޅުވިފައި ހުންނަ ގަޑި ކަމަށްވާ ހެނދުނު 8 ން ހަވީރު 4 ށް ކަމަށެވެ.

އެ އޮފިޝަލް ބުނީ މޯލްޑިވް ގޭސް މިހާރު ބޭނުންކުރާ ފަރާތްތަކަށް އިތުރު ރަޖިސްޓްރީކުރުމަކާއި ނުލާ ގޭހުގެ ހިދުމަތް ލިބޭނެ ކަމަށެވެ.

“މޯލްޑިވް ގޭސް މިހާރު ބޭނުން ކުރާ ފަރާތަކަށް އިތުރަށް އެއްވެސް ޗާޖަކާއި ނުލާ ހިދުމަށް ލިބޭނެ. އެކަމަކު އެހެން ގޭސް ބޭނުން ކުރާ ފަރާތްތައް ޖެހޭނެ މޯލްޑިވް ގޭސް ފުޅިއެއް ގަންނަ. އެހެންނަމަވެސް އަދި އެހިދުމަތެއް ނުފެށޭ.” އޭނާ ބުންޏެވެ.

ސޭމްއިން މިއަދުން ފެށިގެން 10 ކިލޯގެ މޯލްޑިވް ގޭސް ފުޅިއެއް ވިއްކަމުން ދަނީ 295 ރުފިޔާއަށެވެ. ކުޅުދުއްފުށީގައި ވިލާ ގޭސް ވިއްކަމުންގެންދާ އެތުމާއިންވެސް ވަނީ 10 ކިލޯގެ ގޭސް ފުޅިއެއްގެ އަގު 315 ރުފިޔާއިން 290 ރުފިޔާއަށް ހެޔޮކޮށްފަ އެވެ.

އެސްޓީއޯއިން މާލޭގައި 10 ކިލޯގެ ގޭސް ފުޅިއެއް 225 ރުފިޔާއަށް ވިއްކަމުންދާއިރު އައްޑޫގައި އޭގެ ފުޅިއެއް ވިއްކަމުން ދަނީ 310 ރުފިޔާއަށެވެ.

މޯލްޑިވް ގޭސް އެސްޓީއޯއިން ގަތުމަށް 3012578 ނަންބަރަށް ގުޅުއްވުމުން އެ ހިދުމަތް ލިބޭނެ ކަމަށް އެސްޓީއޯއިން މައުލޫމާތުދެ އެވެ.

އެސްޓީއޯ އިން މިއަހަރުގެ ރޯދަމަހު ވަނީ ކުދި ގޭސްފުޅި މާކެޓަށް ނެރެފައެވެ. އަދި ދާދިފަހުން ވަނީ އަލިފާން ނުހިފާ ލުއި ގޭސްފުޅި ތައާރަފް ކޮށްފަ އެވެ.