ޖީސީއީ އޯލެވެލް އިމްތިހާނު ފަށައިފި

މާލެ އާއި ރާއްޖޭގެ އެކި ރަށްރަށުގެ 7202 ދަރިވަރުންނާ އެކު މި އަހަރުގެ އޯލެވެލް އިމްތިހާނު އިއްޔެ ފަށައިފި އެވެ.

ކުޅުދުއްފުށީގައި ހުންނަ ސްކޫލުތަކުގެ ތެރެއިން ޖަލާލުއްދީން ސްކޫލާއި އަފީފުއްދީން ސްކޫލުގެ ދަރިވަރުން މިއަހަރު އޯލެވެލް އިމްތިހާނުގައި ބައިވެރިވެއެވެ.

މި ނޫހަށް މައުލޫމާތު ދެއްވަމުން ޖަލާލުއްދީން ސްކޫލްގެ ލީޑިން ޓީޗަރ އައިމިނަތު މުހައްމަދު ވިދާޅުވީ އެ ސްކޫލުން މި އަހަރު 92 ދަރިވަރުން އޯލެވެލް އިމްތިހާނުގައި ބައިވެރިވެފައިވާ ކަމަށާއި އެކި މާއްދާތަކުގައި އަމިއްލަ ގޮތުންވެސް ގިނަ އަދަދެއްގެ ދަރިވަރުން ބައިވެރިވެފައިވާ ކަމަށެވެ. އެގޮތުން އަމިއްލަ ގޮތުން އެންމެ ގިނަ ދަރިވަރުން ބައިވެރިވެފައިވަނީ އިނގިރޭސި އިމްތިހާމުގައި ކަމަށާއި އެއީ 41 ދަރިވަރުން ކަމަށް އައިމިނަތު ވިދާޅުވި އެވެ.

އަފީފުއްދީން ސްކޫލްގެ ޕްރިންސިޕަލް އާދަމް މޫސާ މި ނޫހާ ވާހަކަ ދައްކަވަމުން ވިދާޅުވީ އެ ސްކޫލުން އޯލެވެލް އިމްތިހާނުގައި މި އަހަރު ބައިވެރިވެފައިވަނީ 52 ދަރިވަރުން ނެވެ. މިއީ އެ ސްކޫލް އޯލެވެލް އިމްތިހާނުގައި ބައިވެރިވާ ދެވަނަ އަހަރެވެ.

އޯލެވެލް އިމްތިހާނު ފެށުމުގެ ގޮތުން 36 ސެންޓަރެއްގައި އިއްޔެ ޓްރެވެލް އެންޑް ޓޫރިޒަމް މާއްދާގެ އިމްތިހާނު ބާއްވާފައިވާއިރު މިއަދު މެރިން ސައިންސް މާއްދާއިން ޓެސްޓް އޮންނާނެ އެވެ.

14 ނޮވެމްބަރުގައި ނިމޭ މި އިމްތިހާނުގައި މި އަހަރު ރާއްޖޭގެ 174 ރަށަކުން 7202 ދަރިވަރުން ބައިވެރިވާ ކަމަށް އެޑިއުކޭޝަން މިނިސްޓްރީން ބުނެ އެވެ. އެއީ ސަރުކާރުގެ 194 ސުކޫލުތަކުން 5643 ދަރިވަރުނާއި އަމިއްލަ ގޮތުން 53 ސެންޓަރަކުން 1559 ދަރިވަރުނެވެ.

މިދިޔަ އަހަރު އޯލެވެލް އިމްތިހާނުގައި ބައިވެރިވެފައިވަނީ 8255 ދަރިވަރުންނެވެ.