ރާޅު ފިހާރަ ފަޅާލާ ދިހަ ހާސް ރުފިޔާގެ ގެއްލުމެއް

ހދ. ކުޅުދުއްފުށީ ވަފާ ފިހާރަ ނުވަތަ މަޝްހޫރު ނަމުންނަމަ ރާޅު ފިހާރަ ރޭ ފަޅާލައިފި އެވެ.

މި ނޫހަށް މައުލޫމާތު ދެއްވަމުން އެ ފިހާރައިގެ މެނޭޖަރ އަބޫބަކުރު ވިދާޅުވީ ފިހާރަ ފަޅާލައިފާވަނީ ދޮރު އިރާލައިގެން ކަމަށާއި ތަޅުވެސް ވަނީ ހަލާކޮށްލާފައި ކަމަށެވެ.

އަބޫބަކުރު ވިދާޅުވީ ވަގަށް ގެންގޮސްފައިވަނީ 50 ރުފިޔާގެ 40 ފޯނު ކާޑާއި ވަތްގަނޑުގައި ބަހައްޓާފައި ހުންނަ ފައިސާތައް ކަމަށެވެ. މިވައްކަމުގައި 10000 ރުފިޔާގެ ގެއްލުންވެފައިވާ ކަމަށާއި ވަގުން ހަލާކޮށްލާފައިވަނީ ހަމައެކަނި މޭޒު ވަތްގަނޑު ކަމަށް އޭނާ ވިދާޅުވި އެވެ.

އޭނާ ވިދާޅުވީ ފިހާރަ ފަޅާލާފައިވާކަން އެނގުނީ ފަތިހު ފިހާރައިގެ ބޮކިތައް ނިއްވުމަށް ދިޔައިރު ދޮރު ހުޅުވިފައި ހުރުމުން ކަމަށެވެ. އަދި ފުލުހުންނަށް ގުޅާ ފިހާރައަށް ވަނީ ފުލުހުންނާއެކު ކަމަށް އޭނާ ވިދާޅުވި އެވެ.

ފިހާރާގައި ގިނަ އަދަދެއްގެ ޑޮލަރާއި 100 ރުފިޔާގެ ފޯނު ކާޑުވެސް ހުރި ކަމަށާއި ނަމަވެސް އެތަކެއްޗަށް އެއްވެސް ގެއްލުމެއް ލިބިފައިނުވާ ކަމަށް އޭނާ ވިދާޅުވި އެވެ.

މި ނޫހާ ވާހަކަ ދައްކަވަމުން ފުލުހުން ވިދާޅުވީ އެ މައްސަލަ ފުލުހުންނަށް ހުށައަޅާފައިވަނީ ފަތިހު 5:15 ހާއިރު ކަމަށާއި އެ މައްސަލަ މިހާރު ތަހުގީގު ކުރަމުންދާ ކަމަށެވެ. އަދި މިހާތަނަށް އެ މައްސަލައިގައި މީހަކު ހައްޔަރުކޮށްފައިނުވާ ކަމަށާއި ވަގަށް ގެންގޮސްފައިވަނީ ފޯނު ކާޑާއި ހާހެއްހާ ރުފިޔާ ކަމަށް ފުލުހުން މައުލޫމާތު ދިނެވެ.

ދޮރު އިރާލައިގެން މިދިޔަ މަހު ފަހުކޮޅު ކުޅުދުއްފުށީ އަމީރު އަމީން ސްކޫލާއި ރިއަލްއެޗް ފިހާރައިންވެސް ވައްކަން ކޮށްފައިވެ އެވެ.