ދަނޑުވެރިކަމުގެ ތަމްރީނު ޕްރޮގްރާމްގައި ބައިވެރިވުމުގެ ފުރުސަތު ހުޅުވާލައިފި

މިނިސްޓްރީ އޮފް ފިޝަރީޒް އެންޑް އެގްރިކަލްޗަރ އާއި ނޭކުރެންދޫ ކައުންސިލް ގުޅިގެން ހިންގަން ހަމަޖެހިފައިވާ ދަނޑުވެރިކަމުގެ ތަމްރީނު ޕްރޮގްރާމްގައި ބައިވެރިވުމުގެ ފުރުސަތު ހުޅުވާލައިފި އެވެ.

ދަނޑުވެރިކަމަށް ޝައުގުވެރިވާ ފަރާތްތަކަށް މި ޕްރޮގްރާމް ކުރިއަށް ގެންދިއުމަށް ހަމަޖެހިފައިވަނީ މި މަހުގެ 21 ވަނަ ދުވަހުން ފެށިގެން އަންނަ މަހުގެ 4 ވަނަ ދުވަހުގެ ނިޔަލަށް ހދ ނޭކުރަންދޫގަ ށެވެ.

މި ޕްރޮގްރާމްގައި ބައިވެރިވާން ބޭނުންވާ ފަރާތްތަކުން މި މަހުގެ 14 ވަނަ ދުވަހުގެ ކުރިން އެކަމަށް އެދޭ ފޯމް ނޭކުރެންދޫ ކައުންސިލްގެ އިދާރާއަށް ހުށައެޅުމަށް އެ އިދާރާއިން އެދެ އެވެ. އަދި ފޯމެއްގެ އަގަކީ ފަސް ރުފިޔާ ކަމަށް އެ އިދާރާއިން މައުލޫމާތުދެ އެވެ.

ނޭކުރެންދޫ ކައުންސިލްގެ އިންފޮމޭޝަން އޮފިޝަލް ހަފްޒާ ވިދާޅުވީ މި ޕްރޮގްރާމްގައި ކިޔަވައިދެއްވާ ބޭފުޅެއް މިނިސްޓްރީން ހަމަޖައްސަވައި ދެއްވާނެ ކަމަށެވެ.

ނޭކުރެންދޫގެ އިގްތިސާދު ދަނޑުވެރިކަމަށް ބަރޯސާވެފައިވާއިރު ނޭކުރެންދޫގެ ދަނޑުވެރިކަމުގެ ދަފުތަރުގައި 100 ފަރާތަކުން ރަޖިސްޓްރީވެފައިވެ އެވެ.

ނޭކުރެންދޫގައި މިރުސް، ބަރަބޯ، ކޮޕީ ފަތް އަދި ކިއުކަންބާ ފަދަ ތަކެތި އާންމުކޮށް ހައްދާއިރު އެތަކެތި ވިއްކަނީ ކުޅުދުއްފުށީގަ އެވެ.