މިމަހުގެ ތެރޭގައި ރައްޔިތުންނާ ބައްދަލު ކުރާނަން: ކައުންސިލްގެ ރައީސް

Oct 9, 2014

މިމަހުގެ ތެރޭގައި ކުޅުދުއްފުށީގެ ރައްޔިތުންނާ އެކު ބައްދަލުވުމެއް ރޭވުމަށް މަސައްކަތް ކުރައްވަމުންދާ ކަމަށް ކުޅުދުއްފުށީ ކައުންސިލްގެ ރައީސް އަލީ މުހައްމަދު ވިދާޅުވެއްޖެ އެވެ.

ކައުންސިލްގެ ރައީސް ވިދާޅުވީ މިބައްދަލުވުން މިމަހުގެ ތެރޭގައި ބޭއްވުމަށް މަސައްކަތް ކުރައްވާކަމަށާއި މިއީ ކައުންސިލުން ހާއްސަ އިސްކަމެއްދީގެން ކުރިއަށް ގެންދަވާ ކަމެއް ކަމަށެވެ. އެގޮތުން މިބައްދަލުވުމުގައި ފާއިތުވި 6 މަސްދުވަހު ކައުންސިލުގެ މަސައްކަތް ދިޔަގޮތުގެ ތަފްސީލު ރައްޔިތުންނާ ހިއްސާކުރާނެ އެވެ.

މީގެ އިތުރުން ކައުންސިލުން މިހާރު ކުރިއަށް ރާވާފައިވާ ކަންކަމާއި މިހާތަނަށް ކުރެވިފައިވާ މަސައްކަތްތަކުގެ މައުލޫމާތުވެސް މިބައްދަލުވުމުގައި ދެއްވުމަށް ހަމަޖެހިފައިވާކަމަށް އަލީ މުހައްމަދު ވިދާޅުވި އެވެ.

ލާމަރުކަޒީ ގާނޫނުގެ ދަށުން މަދުވެގެން އަހަރަކު 2 ފަހަރު ރައްޔިތުންނާ ބައްދަލު ކުރަންޖެހެ އެވެ. މިގޮތުން ކުޅުދުއްފުށީ ކައުންސިލުން ވަނީ ފުރަތަމަ ބައްދަލުވުން މިދިޔަ މާޗް މަހުގެ ތެރޭގައި ބާއްވާފަ އެވެ.

މިހާރު ކައުންސިލުން ކުރަމުން ގެންދާ މަސައްކަތްތަކާ ބެހޭ ގޮތުން ވާހަކަ ދައްކަވަމުން ކައުންސިލްގެ ރައީސް ވިދާޅުވީ މިހާރު ކައުންސިލުން އިސްކަމެއް ދީގެން އުތުރު ބަނދަރުގައި ހުރި ހޮޅިދަނޑިތައް ބަދަލު ކުރުމުގެ މަސައްކަތް ކުރަމުންދާ ކަމަށާއި މިކަމަށް ބިޑް ހުށައެޅިފައިވާކަމަށް ވެސް ކައުންސިލްގެ ރައީސް ވިދާޅުވިއެވެ. އަދި ޖެހުމަށް ހަމަޖެހިފައިވާ ހޮޅިދަނޑިތައް މިމަހުގެ ތެރޭގައި ކުޅުދުއްފުއްޓަށް ގެނެވޭނެކަމަށް ވެސް ރައީސް ވިދާޅުވި އެވެ.

މިލިޔުމާއި ގުޅޭ