ބަލިމީހަކު އެމަޖެންސީގައި މާލެ ފޮނުވާލައިފި

ކުޅުދުއްފުށި ރީޖަނަލް ހޮސްޕިޓަލްގެ އައިސީޔޫގައި ފަރުވާދެމުންގެންދިޔަ ބަލިމީހަކަށް އިތުރަށް ފަރުވާދިނުމަށް މިއަދު ސީޕްލޭންގައި މާލެ ފޮނުވާލައިފި އެވެ.

“ކުޅުދުއްފުށި އޮންލައިން”އަށް މައުލޫމާތު ދެއްވަމުން ކުޅުދުއްފުށި ރީޖަނަލް ހޮސްޕިޓަލް ހިންގުމާ ހަވާލުވެ ހުންނެވި ހަދީޖާ އަލީ ވިދާޅުވީ މިއަދު ފޮނުވާލައިފައިވަނީ  ޕެރަލައިޒް ވެގެން ފަރުވާދެމުންގެންދިޔަ ހދ. މަކުނުދޫ ލުނބޯގަސްދޮށުގެ ސިއްތި (64އ) ކަމަށެވެ.

ހެނދުނު 8:05 ހާއިރު އޭނާ ފުރުވާލާފައިވަނީ އާސަންދައިގެ ދަށުން ސީޕްލޭނެއް ގެނެސްގެން ކަމަށް ހަދީޖާ ވިދާޅުވި އެވެ. އަދި ސީޕްލޭން ގެންނަން ޖެހުނީ މޯލްޑިވިއަންގެ ފްލައިޓުން ސީޓް ނުލިބިގެން ކަމަށްވެސް އޭނާ ވިދާޅުވި އެވެ.

ހަދީޖާ ވިދާޅުވީ މޯލްޑިވިއަންގެ ފުލައިޓަކުން އާސަންދައިގެ ދަށުން ސީޓްހޯދުމަށް ދަތިތަކެއް އުފުލަން ޖެހޭ ކަމަށެވެ. އަދި ހޮސްޕިޓަލް ބޭނުންވުމުން ސީޕްލޭން ނުގެނެވޭ ކަމަށާއި ސީޕްލޭން ގެނެވެނީ އާސަންދަ ވެރިފައިކުރާ ފަރާތްތަކުން ވެރިފައިކޮށްފައި ކަމަށެވެ.

މިދިޔަ ހަފުތާ ތެރޭގައިވެސް މޯލްޑިވިއަންގެ ފްލައިޓުން އާސަންދައިގެ ދަށުން ސީޓް ނުލިބި މާލޭ ފޮނުވާނުލެވިގެން އުޅެނިކޮށް ދެ މީހަކު ނިޔާވެފައިވާ ކަމަށް ހަދީޖާ ވިދާޅުވި އެވެ. އަދި އެއީ ކުޅުދުއްފުށީ އަންހެނަކާއި ވައިކަރަދޫ އަންހެނެއް ކަމަށް އޭނާ މައުލޫމާތުދިނެވެ.