ކުޅުދުއްފުށި އޮންލައިންގެ ކުރުވާހަކަ ލިޔުމުގެ މުބާރާތުގެ އެއްވަނަ ސީމާ ހޯދައިފި

ކުޅުދުއްފުށި އޮންލައިނުން ބޭއްވި ހަތަރުވަނަ ކުރުވާހަކަ ލިޔުމުގެ މުބާރާތުގެ އެއްވަނަ ޖަލާލުއްދީން ސްކޫލްގެ 12 ބީގެ ދަރިވަރު ސީމާ ހަސަން ހޯދައިފި އެވެ.

ޖަލާލުއްދީން ސްކޫލުގެ ދިވެހި ޑިޕާޓްމަންޓާއި ގުޅިގެން ބާއްވަމުން އަންނަ މި މުބާރާތުގެ އެއްވަނަ އަށް ދިޔަ ސީމާ ލިޔެފައިވާ ވާހަކައަކީ “އެފްބީ ލޯބި” އެވެ. މުބާރާތުގެ އެއްވަނަ އަށް ހޮވުމުން “ކުޅުދުއްފުށި އޮންލައިން”ގެ ފަރާތުން ސީމާއަށް ވަނީ  އެސާ އައިކޮނިއާ ޓެބްލެޓެއްގެ އިތުރުން ޓްރޮފީއަކާއި ހަނދާނީ ލިޔުމެއް ދީފަ އެވެ.

މިމުބާރާތުގެ ދެވަނަ އަށް ހޮވިފައިވަނީ ޖަލާލުއްދީން ސްކޫލްގެ 12 ބީގެ ޝަހީދާ އިބްރާހިމް ލިޔެފައިވާ “ހައްގުގައި” އެވެ. އަދި ތިންވަނަ އަށް ހޮވިފައިވަނީ 11 ސީގެ ޝިބާ އަލީ ލިޔެފައިވާ “އަހަރެންގެ ހުވަފެން” ނަމަކަށް ކިޔާ ވާހަކަ އެވެ.

މުބާރާތުގެ ދެވަނަ އާއި ތިންވަނަ ހޯދި ޝަހީދާ އާއި ޝިބާއަށް ވަނީ “ކުޅުދުއްފުށި އޮންލައިން”ގެ ފަރާތުން އުރީދޫ މޮޑެމްއެއްގެ އިތުރުން ޓްރޮފީއަކާއި ހަނދާނީ ލިޔުމެއް ދީފަ އެވެ.

އަފީފުއްދީން ސްކޫލްގެ ޑެޕިއުޓީ ޕްރިންސިޕަލް ޝަމްސީރާ ޒަކަރިއްޔާ ޝަރަފުވެރިކޮށްދެއްވި ހާއްސަ އެސެމްބަލީގައި މުބާރާތުގައި އެންމެ މޮޅު 15 ވާހަކަ ލިޔުނު ދަރިވަރުންނަށް ވެސް ވަނީ ހަނދާނީ ލިޔުން ދީފަ އެވެ. އެންމެ މޮޅު 15 ވާހަކަ ލިޔުން ދަރިވަރުންނަށް ހަނދާނީ ލިޔުން “ކުޅުދުއްފުށި އޮންލައިން”ގެ ސީއީއޯ ބަދުރުއްދީން ހަސަން ބައްސަވާ ދެއްވިއިރު އެންމެ މޮޅު ތިން ދަރިވަރުންނަށް އިނާމް ދެއްވީ ޝަމްސީރާ އެވެ.

މިއަދުގެ މި ރަސްމިއްޔާތުގައި ވަނަވަނައަށް ދިޔަ ދަރިވަރުންނަށް އިނާމް ދެއްވުމަށް ފަހު ޝަރަފުވެރި މެހެމާނު ޝަމްސީރާ ޒަކަރިއްޔާ ދެއްކެވި ވާހަކައިގައި ކުޅުދުއްފުށި އޮންލައިނުން ޖަލާލުއްދީން ސްކޫލާއި އަފީފުއްދީން ސްކޫލްގެ ދަރިވަރުންނަށް ހާއްސަ ކޮށްގެން މި ފުރުސަތު ހުޅުވާލާ ކަމަށްޓަކައި ޝުކުރު އަދާ ކުރެއްވި އެވެ.

ތައުލީމް އުނގެނުމުގެ އިތުރުން ސްކޫލްގައި ކުރިއަށް ގެންދާ އެހެނިހެން އިތުރު ހަރަކާތްތަކާއި މުބާރާތްތަކުގައި ބައިވެރިވުމުގެ މުހިންމުކަމަށް އަލިއަޅުވާލައި އެފަދަ ކަންކަމުގައި ބައިވެރިވެ ހުނަރުތައް ދިރުވުމަށް ޖަލާލުއްދީން ސްކޫލްގެ ދަރިވަރުންނަށް ޝަމްސީރާ ވަނީ ނަސޭހަތްތެރިވެފަ އެވެ.  އަދި އަހަރެމެންގެ މާދަރީ ބަސް ކަމުގައިވާ ދިވެހި ބަހަކީ ދިވެހިންގެ ގައުމިއްޔަތުގެ އެއް ބަހާކަމާއި ދިވެހި ބަހުގެ ފަންނުތައް ކުރިއެރުވުމަށް މޮޅެތި ލިޔުންތެރިންގެ ފޮތްތައް ކިޔުމަށް އިލްތިމާސް ކުރެއްވި އެވެ.

މީގެ އިތުރުން މި އެސެމްބްލީގައި ލިޔުމަކީ ފަންނެއް ކަން ފާހަގަ ކުރައްވަމުން ބަދުރުއްދީން ހަސަން ވިދާޅުވީ ވާހަކަ ލިޔުމަކީ އާމްދަނީ ހޯދުމުގެ ގޮތުންވެސް ކުރެވިދާނެ ކަމެއް ކަމަށެވެ. މިގޮތުން މަޝްހޫރު ވާހަކަ ސީރީޒް “ހެރީ ޕޮޓަރ” ގެ މުސަންނިފް ޖޭ.ކޭ. ރޯވްލިންސްގެ ކާމިޔާބީ އަށް އަލިއަޅުވާލައި އަދި ރާއްޖެއިން ބިންމާ އިބްރާހިމް ވަހީދާއި ފާތުމަތު ނަހުލާގެ މިސާލު ދައްކަވާ ވާހަކަ ދެއްކެވި އެވެ. އަދި މުސްތަގުބަލުގައި ކޮންމެ ދާއިރާއަކުން ކުރިއަށް ދިޔަކަމުގައި ވިޔަސް، މިހާރު ލިބިފައިހުރި ވާހަކަ ލިޔުމުގެ ހުނަރާއި ފަންނު ދޫކޮށްނުލައި ލިޔުންތެރިކަމަށްވެސް ހިދުމަތް ކުރުމަށް ގޮވާލެއްވި އެވެ.

މިއަހަރުގެ މުބާރާތުގައި އަފީފުއްދީން ސްކޫލާއި ޖަލާލުއްދީން ސްކޫލުން 36 ދަރިވަރަކު ވަނީ ވާހަކަ ލިޔެފަ އެވެ. މިމުބާރާތުގެ ވާހަކަތަކަށް އިންސާފު ކޮށްދެއްވާފައިވަނީ ޖަލާލުއްދީން ސްކޫލުގެ ދިވެހި މުދައްރިސުންނެވެ. ކުރުވާހަކަ ލިޔުމުގެ މުބާރާތުގައި ވާހަކަ ލިޔެފައިވާ ދަރިވަރުންނަށް މުސްތަގްބަލުގައި ކުޅުދުއްފުށީ އޮންލައިންގައި އިތުރު ވާހަކަތައް ޝާއިއު ކުރުމުގެ ފުރުސަތު ވަނީ ހުޅުވާލައިފަ އެވެ.

[yass cats=126]