ހދ އަތޮޅުގެ އިންޖީނުގެތަކަށް ޖަނަރޭޓަރުތައް ގެންނަން ފަށައިފި

24 ގަޑިއިރު ކަރަންޓު ޔަގީން މަޝްރޫއުގެ ދަށުން ހދ އަތޮޅަށް ގެންނަ ޖަނަރޭޓަރުތައް ގެންނަން ފަށައިފި އެވެ.

މި ނޫހަށް މައުލޫމާތު ދެއްވަމުން ފެނަކަ ކޯޕަރޭޝަންގެ ރީޖަނަލް މެނޭޖަރ އާދަމް މުހައްމަދު ވިދާޅުވީ ހދ އަތޮޅަށް ގެންނަން ހަމަޖެހިފައިވަނީ 11 ޖަނަރޭޓަރު ކަމަށާއި އެތަކެތި ގެނައުމުގެ މަސައްކަތް ފަށާފައިވާ ކަމަށެވެ.

ހދ އަތޮޅަށް ގެންނަނީ 1 މެގަ ވޯލްޓާއި 150 ކިލޯ ވޯޓްގެ ދެމެދުގެ ޖަނަރޭޓަރުތަކެއް ކަމަށް އާދަމް މައުލޫމާތުދިނެވެ.

އާދަމް މުހައްމަދު ވިދާޅުވީ މި ޖަނަރޭޓަރުތައް ލިބޭތާ މަހެއް ނުވަތަ ދޮޅު މަސް ދުވަހުގެ ތެރޭގައި އިސްޓޯލްކޮށް ނިންމާލެވޭނެ ކަމަށާއި ޖަނަރޭޓަރުތައް އިސްޓޯލްވުމުން މިހާރު ދިމާވެފައިވާ ކަރަންޓުގެ މައްސަލަތަކަށް ހައްލެއް ކަށަވަރު ވެގެންދާނެ އެވެ.

ހދ ވައިކަރަދޫއަށް 250 ކިލޯ ވޯޓްގެ ޖަނަރޭޓަރެއް ގެނެސްފައިވާއިރު ކުރިނބީއަށް 160 ކިލޯގެ ޖަނަރޭޓަރެއް ވަނީ ގެނެސްފަ އެވެ. އަދި މަކުނުދޫއަށާއި ނޭކުރެންދޫއަށްވެސް މިހާރު ވަނީ ޖަނަރޭޓަރ ގެނެސްފަ އެވެ.

ހދ އަތޮޅު ކައުންސިލްގެ ނައިބް ރައީސް އަހުމަދު އާތިފް މި ނޫހަށް މައުލޫމާތު ދެއްވަަމުން ވިދާޅުވީ ކުޅުދުއްފުއްޓަށް 1 މެގަ ވޯޓްގެ ދެ ޖަނަރޭޓަރ ގެނައުމަށް ހަމަޖެހިފައިވާއިރު ދެންހުރި ޖަނަރޭޓަރުތައް ފޮނުވަން ހަމަޖެހިފައިވަނީ ހދ އަތޮޅުގެ ހަނިމާދޫ، ހިރިމަރަދޫ އަދި ނާވައިދޫ ފިޔަވާ ބާކީ މީހުން ދިރިއުޅޭ 9 ރަށަށް ޖަނަރޭޓަރެއް ކަމަށެވެ.

ސަރުކާރުން ކުރިއަށްގެންދާ މި މަޝްރޫއު ގެ ދަށުން ކުރިޔަށް އޮތް ނުވަ ވަރަކަށް މަސްދުވަހުގެ ތެރޭގައި މުޅި ރާއްޖެއަށް 24 ގަޑިއިރުގެ ކަރަންޓުގެ ހިދުމަތް ޔަގީންކޮށްދޭނެ ކަމަށް ރައީސުލްޖުމްހޫރިއްޔާ އަބްދު ﷲ ޔާމީން އަބްދުލް ގައްޔޫމް ވިދާޅުވެފައިވެ އެވެ.

ފެނަކަ ކޯޕަރަޝަނުން އަތޮޅުތަކަށް ފޮނުވުމަށް 77 ޖަނަރޭޓަރ ގެނެސްފައިވާއިރު ހދ އަތޮޅަކީ އެއް އަތޮޅަކަށް އެންމެ ގިނަ ޖަނަރޭޓަރ ލިބުނު އަތޮޅެވެ. އަދި 24ގަޑިއިރު ކަރަންޓު ޔަގީން މަޝްރޫއުގެ ދަށުން އެއް ރަށަކަށް ދެ ޖަނަރޭޓަރު ލިބޭ ހަމައެކަނި ރަށަކީ ކުޅުދުއްފުށިކަން ވެސް ފާހަގަކޮށްލެވެ އެވެ.