ފަރުކޮޅު އެއާޕޯޓުގެ އެއްބަސްވުން ބާތިލްކޮށްފި

Oct 14, 2014

ށ.ފަރުކޮޅުގައި ޑޮމެސްޓިކް އެއާޕޯޓެއް ހަދަން ސިމްޑީ ކުންފުނީގެ ހިއްސާ އޮންނަ އަރާމް ޓްރެވަލްސްއާ އެކުވެފައިވާ އެއްބަސްވުން ސަރުކާރުން ބާތިލްކޮށްފި އެވެ.

ސަން އޮންލައިންގައި ޓޫރިޒަމް މިނިސްޓަރު އަހްމަދު އަދީބްއާ ހަވާލާދީ ބުނެފައިވަނީ ބަންޑާރަ ނައިބުގެ ލަފާއާއެކު އެ އެއްބަސްވުން ބާތިލްކޮށްފައި ވަނީ މިދިޔަ ހަފްތާގެ ތެރޭގަ ކަމަށެވެ.

އަދި އެއްބަސްވުން ބާތިލްކުރުމުގެ ކުރިން ށ.ފުނަދޫ ފަޅު ހިއްކައިގެން އެތަނުގައި އެއާޕޯޓެއް އެޅުމަށް އަރާމް ޓްރެވަލްސްއަށް އެންގުނު ކަމަށާއި އެއްބަސްވުން ބާތިލްކުރީ އެގޮތަށް އެ މަސައްކަތް ކުރަން އަރާމް ޓްރެވަލްސް އިން ދެކޮޅު ހެދުމުން ކަމުގައި ވެސް އަދީބް ވިދާޅުވެފައިވެ އެވެ.

އަދީބާ ހަވާލާދެއްވާ ސަންގައި ބުނެފައިވަނީ މިހާރު ސަރުކާރުގެ ޕްލޭނަކީ އެހެންގޮތަކަށް އެތަނުގައި އެއާޕޯޓެއް އެޅުން ކަމަށާއި އެކަން ސަރުކާރުން ކުރާނެ ކަމަށެވެ.

ފަރުކޮޅުގައި ޑޮމެސްޓިކް އެއާޕޯޓެއް ހަދަން ސަރުކާރާއެކު ސޮއިކޮށްފައިވާ އަރާމް ޓްރެވަލްސް އަކީ ކުރީގެ ހެލްތް މިނިސްޓަރު ޑރ. މަރިޔަމް ޝަކީލާ އާއި އޭނާގެ ފިރިކަލުން އިބްރާހިމް ދީދީ އަދި އެ ދެބޭފުޅުންގެ ތިން ކުދިން ހިއްސާވާ ސިމްޑީ ކުންފުނީގެ ސަބްސިޑަރީ ކުންފުންޏެކެވެ.

ފަރުކޮޅު އެއާޕޯޓު ތަރައްގީ ކުރުމުގެ މަސައްކަތް އަރާމް ޓްރެވަލްސްއާއި ހަވާލުކުރީ 15 މަސް ދުވަހުގެ ތެރޭގައި އެ މަސައްކަތް ނިންމާ ހިދުމަތް ދޭން ފަށާ ގޮތަށެވެ. އަދި އެރަށުގައި އެއާޕޯޓު އަޅާމަތިން އެކުންފުންޏަށް ވަނީ ރިސޯޓެއް ތަރައްގީ ކުރުމަށް ގއ. އަތޮޅުން ރަށެއް ވެސް ހަވާލުކޮށްފަ އެވެ.

ށ. ފަޅުކޮޅުގައި އެއާޕޯޓެއް ތަރައްގީކޮށްފިނަމަ އިއާދަ ނުކުރެވޭ ވަރުގެ ބޮޑެތި ގެއްލުންތަކެއް އެރަށަށް ތިމާވެށީގެ ގޮތުން ލިބިދާނެ ކަމަށް އެންވަރަޔަންމަންޓަލް ޕްރޮޓެކްޝަން އެޖެންސީ (އީޕީއޭ) އިން މީގެ ކުރިން ބުނެފައިވެ އެވެ

މިލިޔުމާއި ގުޅޭ