މަސްތުވާތަކެއްޗާ ދެކޮޅަށް މަސައްކަތް ކުރުމާއި ބެހޭގޮތުން މައުލޫމާތުދިނުމުގެ ބައްދަލުވުންތަކެއް ބާއްވައިފި

މަސްތުވާތަކެއްޗާ ދެކޮޅަށް މަސައްކަތް ކުރުމާއި އެދާއިރާގައި މަސައްކަތްކުރާ ފަރާތްތަކުގެ ގާބިލްކަން އިތުރުކުރުމުގެ ގޮތުން، ދިވެހި ރެޑް ކްރެސެންޓްގެ ހދ ގޮފީގެ ފަރާތުން މައުލޫމާތު ދިނުމުގެ ބައްދަލުވުންތަކެއް ގޮފީގެ ދެޔުނިޓުކަމަށްވާ ކުޅުދުއްފުށީ ޔުނިޓާއި ނޮޅިވަރަމް ޔުނިޓްގައި ބާއްވައިފި އެވެ.

ތިން ގަޑިއިރުގެ މިބައްދަލުވުމުގައި މަސްތުވާތަކެއްޗާއި އެތަކެތި ބޭނުންކުރުމުގެ ސަބަބުން ދިމާވާ އޯވަރޑޯޒްވުމާއި އެހެނިހެން ސިއްހީ ކުއްލި ހާލަތްތަކަށް ބިނާކޮށް މައުލޫމާތު ފޯރުކޮށްދީފައިވާނެ ކަމަށް މި ނޫހަށް މައުލޫމާތު ހިއްސާ ކުރައްވަމުން ރެޑް ކްރެސެންޓްގެ ހދ ގޮފީހުގެ ބްރާންޗް ސެކެއްޓްރީ އާތިފާ އަލީ ވިދާޅުވި އެވެ.

އާތިފާ ވިދާޅުވީ އެކި ދާއިރާތަކަށް ވަކިވަކިން ކުރިއަށްގެންދެވުނު މި ބައްދަލުވުންތަކުގެ ތެރެއިން ކުޅުދުއްފުށީ ޔުނިޓްގައި ހދ އަތޮޅު ރީޖަނަލް ޕޮލިސް ސްޓޭޝަންގެ 10 ފުލުހަކު ބައިވެރިވި ބައްދަލުވުން ބޭއްވިފައިވަނީ މި މަހުގެ 14ވަނަ ދުވަހުގަ ކަމަށެވެ. އަދި ސިއްހީ ދާއިރާއިން ހދ އަތޮޅު ރީޖަނަލް ހޮސްޕިޓަލްގެ 09 ބައިވެރިންނަށާއި ތައުލީމީ ދާއިރާއިން ހދ އަތޮޅު ތައުލީމީ މަރުކަޒާއި ޖަލާލުއްދީން ސްކޫލާއި އަފީފުއްދީން ސްކޫލްގެ މެނޭޖްމަންޓްގެ ޖުމްލަ 11 ބައިވެރިންނަށް މި މަހުގެ 15ވަނަ ދުވަހު ދެ ބައްދަލުވުން ބޭއްވާފައިވާނެ ކަމަށްވެސް އޭނާ ވިދާޅުވި އެވެ.

އަދި ނޮޅިވަރަމް ޔުނިޓްގައި ނޮޅިވަރަމް ސްކޫލް މެނޭޖްމަންޓްގެ 05 ބައިވެރިންނާއި ނޮޅިވަރަމް ސިއްހީ މަރުކަޒުގެ 04 ބައިވެރިންނާއިއެކު ޖުމްލަ 09 ބައިވެރިންނަށް މި މަހުގެ 16ވަނަ ދުވަހު ބައްދަލުވުމެއް ބޭއްވާފައިވެ އެވެ.

މި ނޫހަށް މައުލޫމާތު ހިއްސާ ކުރައްވަމުން ރެޑް ކްރެސެންޓްގެ ހދ ގޮފީހުގެ ބްރާންޗް ސެކެއްޓްރީ އާތިފާ އަލީ ބައްދަލުވުންތައް ކުރިއަށް ގެންދިޔުމުގައި އިދާރާތަކުންނާއި ދިވެހި ރެޑް ކްރެސެންޓްގެ މައިމަރުކަޒުން ދެއްވި އެއްބާރުލެއްވުން ފާހަގަކޮށް ޝުކުރުއަދާކޮށްފައިވެ އެވެ.

މިގެ އިތުރުން ކުރިއަށް އޮތް ދެމަސް ދުވަސްތެރޭގައި މަސްތުވާތަކެއްޗާއި ގުޅިގެން ބެލެނިވެރިން ހޭލުންތެރިކުރުމުގެ ވޯކްޝޮޕެއް ހިންގުމަށް ހދ ގޮފިން ރާވަމުންދާ ކަމަށްވެސް އާތިފާ ވިދާޅުވި އެވެ.