އައު ދެ ޖަނަރޭޓަރ އިންސްޓޯލްކުރާއިރު ކަރަންޓު ކަނޑާކަށް ނުޖެހޭނެ: މަމްދޫހް

ކުޅުދުއްފުއްޓަށް ގެނައި 1 މެގަ ވޯޓްގެ ދެ ޖަނަރޭޓަރ އިންސްޓޯލްކުރުމަށް ރަށުން ކަރަންޓު ކަނޑަން ނުޖެހޭނެ ކަމަށް ކުޅުދުއްފުށި ޕަވާރ ސްޓޭޝަންގެ މެނޭޖަރ މަމްދޫހް އަލީ ވިދާޅުވެއްޖެ އެވެ.

“24 ގަޑިއިރު ކަރަންޓު ޔަގީން” މަޝްރޫއުގެ ދަށުން ކުޅުދުއްފުއްޓަށް ގެނައި މި ޖަނަރޭޓަރ އިންސްޓޯލް ކުރުމާ ގުޅޭގޮތުން މި ނޫހަށް މައުލޫމާތު ދެއްވަމުން މަމްދޫހް ވިދާޅުވީ އައު ދެ ޖަނަރޭޓަރު ކަރަންޓު ނުކަނޑައި އިންސްޓޯލްކުރުވޭނެ ކަމަށާއި އިންސްޓޯލްކުރުމުގެ މަސައްކަތް ފަށާނީ މަހެއްހާ ދުވަސް ފަހުން ކަމަށެވެ.

މަސައްކަތް ފަށާތާ 15 ދުވަސް ފަހުން ދެ ޖަނަރޭޓަރުވެސް އިންސްޓޯލްކޮށް ނިމޭނެ ކަމަށް މަމްދޫހް ވިދާޅުވި އެވެ.

ފެނަކަ ކޯޕަރޭޝަނުގެ ރީޖަނަލް މެނޭޖަރ އާދަމް މުހައްމަދު މީގެ ކުރިން މި ނޫހަށް ދެއްވި ބަސްދީގަތުމެއްގައި ވިދާޅުވީ ޖަނަރޭޓަރުތައް ލިބޭތާ މަހެއް ނުވަތަ ދޮޅު މަސް ދުވަހުގެ ތެރޭގައި އިންސްޓޯލްކޮށް ނިންމާލެވޭނެ ކަމަށާއި ޖަނަރޭޓަރުތައް އިންސްޓޯލްވުމުން މިހާރު ދިމާވެފައިވާ ކަރަންޓުގެ މައްސަލަތަކަށް ހައްލެއް ކަށަވަރު ވެގެންދާނެ ކަމަށެވެ.

ސަރުކާރުން ކުރިއަށްގެންދާ މި މަޝްރޫއު ގެ ދަށުން ކުރިޔަށް އޮތް ނުވަ ވަރަކަށް މަސްދުވަހުގެ ތެރޭގައި މުޅި ރާއްޖެއަށް 24 ގަޑިއިރުގެ ކަރަންޓުގެ ހިދުމަތް ޔަގީންކޮށްދޭނެ ކަމަށް ރައީސުލްޖުމްހޫރިއްޔާ އަބްދުﷲ ޔާމީން އަބްދުލް ގައްޔޫމް ވަނީ ވިދާޅުވެފަ އެވެ.

ފެނަކަ ކޯޕަރަޝަނުން އަތޮޅުތަކަށް ފޮނުވުމަށް 77 ޖަނަރޭޓަރ ގެނެސްފައިވާއިރު ހދ އަތޮޅަކީ އެއް އަތޮޅަކަށް އެންމެ ގިނަ ޖަނަރޭޓަރ ލިބުނު އަތޮޅެވެ. އަދި 24 ގަޑިއިރު ކަރަންޓު ޔަގީން މަޝްރޫއުގެ ދަށުން އެއް ރަށަކަށް ދެ ޖަނަރޭޓަރު ލިބޭ ހަމައެކަނި ރަށަކީ ކުޅުދުއްފުށިކަން ވެސް ފާހަގަކޮށްލެވެ އެވެ.