ކުދި އަދި މެދު ފަންތީގެ ވިޔަފާރިތަކަށާއި އަލަށް ފަށާ ވިޔަފާރީތަކަށް ހާއްސަ ޓްރޭނިންގ ޕްރޮގްރާމެއް ފަށަނީ

ކުދި އަދި މެދު ފަންތީގެ ވިޔަފާރިވެރިންނަށާއި އަލަށް ވިޔަފާރިއެއް ފައްޓަން ބޭނުންވާ ފަރާތްތަކަށް އަމާޒުކޮށްގެން ހިންގުމަށް ހަމަޖެހިފައިވާ ޓްރޭނިންގ ޕްރޮގްރާމުގައި ބައިވެރިވުމުގެ ފުރުސަތު ހުޅުވާލައިފި އެވެ.

ކުޅުދުއްފުށީގެ ބިޒްނަސް ޑިވެލޮޕްމެންޓް ސާރވިސް ސެންޓަރުން އިންތިޒާމުކޮށްގެން ކުރިއަށް ގެންދިއުމަށް ހަމަޖެހިފައިވާ މި ޓްރެއިނިންގ ޕްރޮގްރާމާ ބެހޭ ގޮތުން އެ ސެންޓަރުން މައުލޫމާތުދިން ގޮތުގައި “ބިޒްނަސް ސްޓާޓްއަޕް ޓްރެއިންގ”ގެ ނަމުގައި ހިންގޭ މި ޕްރޮގްރާމު އަމާޒުކުރެވިފައިވަނީ  ޕްރޮގްރާމަކީ ކުދި އަދި މެދު ފަންތީގެ ވިޔަފާރިވެރިންނަށާއި އަލަށް ވިޔަފާރީއެއް ފައްޓަވަން ބޭނުންވާ ފަރާތްތަކާއި ވިޔަފާރިއަށް ޝައުގުވެރިވާ ފަރާތްތަކަށެވެ.

މި ޓްރެއިނިން ޕްރޮގްރާމުގައި ވިޔަފާރިއެއް ފެށުމަށް އެނގެންޖެހޭ އެންމެ އަސާސީ މައުލޫމާތުތައް ކިޔަވައިދެވޭނެ ކަމަށާއި ޖުމްލަ 7 ފިލާވަޅު ނަގައިދެވޭނެ ކަމަށް އެ ސެންޓަރުން މައުލޫމާތުދެ އެވެ. އެއީ ވިޔަފާރިއެއް ފަށާނެ ގޮތާއި ވިޔާފާރިއެއް އޮގަނައިޒް ކުރާނެ ގޮތާއި ވިޔަފާރީއަށް ފައިސާ ހޯދާ، ފައިސާ އާއި ހިސާބު ބަލަހައްޓާނެ ގޮތާއި މާކެޓް ކުރުމާއި ވިއްކުމާއި ދިމާވާ މައްސަލަތައް ދެނެގަތުމާއި ހައްލުކުރާނެ ގޮތުގެ އިތުރުން އިންސާނީ ވަސީލަތްތައް ދެނެގަތުމެވެ.

މި މަހުގެ 30 އާއި 31 ވަނަ ދުވަހުގެ އިތުރުން ނޮވެމްބަރ މަހުގެ އެއްވަނަ ދުވަހުގައި ހިންގަން ހަމަޖެހިފައިވާ މި ޕްރޮގްރާމުގެ ބައިވެރިވާން ބޭނުންވާ ފަރާތްތަކުން ރަސްމީ ގަޑީގައި ކުޅުދުއްފުށީ ބީޑީއެސްސީ އިދާރާ (ގައުމީ އިދާރާގެ އެއްވަނަ ފަންގިފިލާ)ގައި ނަން ނޯޓް ކުރުމުންނާއި 7920737 މި ނަމްބަރަށް ނަމާއި އެޑްރެސް އަދި ފޯނު ނަމްބަރާއި އައިޑީ ކާޑް ނަމްބަރު އެސްއެމްއެސް ކުރުމުން ބައިވެރިވެވޭނެ ކަމަށް އެ ސެންޓަރުން ބުނެ އެވެ.

ޓްރޭނިންގެ ދެ ދުވަހު ހާޒިރުވެ ބައިވެރިވާ ކޮންމެ ފަރާތަކަށް ހަނދާނީ ލިޔުމެއްވެސް ދެވޭނެ ކަމަށް ބިޒްނަސް ޑިވެލޮޕްމެންޓް ސާރވިސް ސެންޓަރުން ބުނެ އެވެ.

މި މަހުގެ 12 އަދި 13 ގައިވެސް މި ޕްރޮގްރާމް ހިންގާފައިވެ އެވެ.