ދަނޑުވެރިކަމުގެ ދުވަހުގެ ހަރަކާތްތަކުގައި އަތޮޅުގެ 9 ރަށުން ބައިވެރިވަނީ

އަތޮޅު ފެންވަރުގައި ދަނޑުވެރިކަމުގެ ދުވަސް ފާހަގަކުރުމަށް ވައިކަރަދޫގައި ހިންގަން ހަމަޖެހިފައިވާ ހަރަކާތްތަކުގައި ހދ އަތޮޅުގެ 9 ރަށަކުން ބައިވެރިވާނެ ކަމަށް އަތޮޅު ކައުންސިލުން ބުނެފި އެވެ.

ހދ އަތޮޅު ކައުންސިލްގެ މީޑިޔާ ކޯޑިނޭޓަރ އަބުދުލް މުހައިމިން މި ނޫހަށް މައުލޫމާތު ދެއްވަމުން ވިދާޅުވީ ދަނޑުވެރިކަމުގެ ދުވަސް ފާހަގަކުރުމަށް ހިންގާ ހަރަކާތްތަކުގައި ވައިކަރަދޫގެ އިތުރުން ކުޅުދުއްފުށި، ހަނިމާދޫ، ނޮޅިވަރަންފަރު، ނޮޅިވަރަން، ހިރިމަރަދޫ، ކުރިނބި، ނެއްލައިދޫ އަދި ކުމުންދޫ ބައިވެރިވެފައިވާ ކަމަށެވެ.

މި އަންނަ ބުރާސްފަތި އަދި ހުކުރު ދުވަހު ވައިކަރަދޫގައި ކުލަގަދަކޮށް މި ދުވަސް ފާހަގަކުރުމަށް ތައްޔާރުވަމުންދާއިރު ޖުމްލަ 40 ދަނޑުވެރިން ކާބޯތަކެތީގެ މައުރަޒާއި ދަނޑުވެރިންނަށް ހާއްސަކޮށްގެން ހިންގަން ހަމަޖެހިފައިވާ ވޯކްޝޮޕްގައި ބައިވެރިވެފައިވާ ކަމަށް މުހައިމިން ވިދާޅުވި އެވެ.

އަތޮޅު ފެންވަރުގައި ފުރަތަމަ ފަހަރަށް ދަނޑުވެރިކަމުގެ ދުވަސް ފާހަގަކުރަން ތައްޔާރުވަމުންދާއިރު މި ހަރަކާތްތަކުގައި އަތޮޅުގެ 4 ރަށް ކަމަށްވާ ފިނޭ، މަކުނުދޫ، ނާވައިދޫ އަދި ނޭކުރެންދޫއިން ބައިވެރިވެފައި ނުވާކަން ފާހަގަކޮށްލެވެ އެވެ.

މި ދުވަހަށްޓަކައި ވައިކަރަދޫ ތައްޔާރުވަމުންދާއިރު ދުވަހާ ގުޅޭ ހާއްސަ ޖަލްސާއެއްގެ އިތުރުން ކާބޯތަކެތީގެ މައުރަޒަކާއި ދަނޑުވެރިންނަން ހާއްސަ ވޯކްޝޮޕެއް ވައިކަރަދޫގައި ކުރިއަށް ގެންދިއުމަށް ވަނީ ހަމަޖެހިފަ އެވެ.