ވިއްސާރައާ ގުޅިގެން ޔެލޯ އެލާޓް ނެރެ ސަމާލުވެ ތިބުމަށް އަންގައިފި

މިދުވަސްވަރު ރާއްޖެއަށް ކުރަމުން ގެންދާ ވިއްސާރައާ ގުޅިގެން ޑިޕާޓްމަންޓް އޮފް މީޓިއޮރޮލޮޖިކަލް ސާވިސް(މެޓް) އިން ޔެލޯ އެލާޓް ނެރެ ރައްޔިތުން ސަމާލުވެ ތިބުމަށް އިލްތިމާސްކޮށްފި އެވެ.

މޫސުމާ ބެހޭ އޮފީސް މެޓުން ބުނެފައިވަނީ މިހާރު ކުރަމުންދާ ވިއްސާރައަކީ ހުޅަނގު މޫސުމުގެ ވިއްސާރަ ކަމަށާއި ކުރިއަށް އޮތް ދެ ދުވަހު ވެސް ވިއްސާރަކުރާނެ ކަމަށް ލަފާކުރެވޭ ކަމަށެވެ.

މާލެއަށް ގުގުރުމާއިއެކު ބޯކޮށް ވިއްސާރަކުރާނެ ކަމަށް މެޓް އޮފީހުން ބުނެފައިވާއިރު އުތުރާއި މެދު ރާއްޖެތެރެއަށްވެސް ބޯކޮށް ވިއްސާރަ ކުރާނެ ކަމަށް ބުނެފައިވެ އެވެ. ނަމަވެސް ވައި މަޑުވާނެ ކަމަށްވެސް އެ ފަރާތުން މައުލޫމާތުދެ އެވެ.

އަދި ދެކުނުގެ އަތޮޅަށް އާންމު ގޮތެއްގައި މޫސުން ރަނގަޅު ވާނެ ކަމަށް މެޓްއިން މައުލޫމާތުދެ އެވެ.

ރޭ ފަތިހުން ފެށިގެން ރާއްޖެއަށް ކުރަމުންގެންދާ ވިއްސާރާގައި މާލޭގެ ގިނަ މަގުތަކުގައި ފެންބޮޑުވެފައިވާއިރު ކުޅުދުއްފުށީގެ ބައެއް ހިސާބުތަކުގައިވެސް ވަނީ ފެންބޮޑުވެފަ އެވެ.