ވައިކަރަދޫއިން ނާޒިމް އަދި ވާހިދު
ހދ އަތޮޅު ކައުންސިލުން އެއްހާސް ގަސް އިންދުމުގެ ޕްރޮގްރާމެއް މިއަދު ވައިކަރަދޫގައި ފަށައިފި އެވެ.
ހދ އަތޮޅުގައި މޭވާ ގަސް އިންދުމަށް ކައުންސިލުން އިސްނަގައިގެން ފެށި މި ޕްރޮގްރާމް އިފްތިތާހް ކޮށްދެއްވީ މިނިސްޓްރީ އޮފް ފިޝަރީޒް އެންޑް އެގްރުކަލްޗަރގެ ނައިބު މުހައްމަދު ޝަރީފެވެ. ޝަރީފް ވަނީ އަނބު ގަހެއް އިންދަވައިދެއްވާފަ އެވެ.
ދަނޑުވެރިކަމުގެ ދުވަސް ފާހަގަކުރުމަށް ވައިކަރަދޫގައި ކުރިއަށްގެންދާ ހަރަކާތްތަކުގެ ތެރެއިން މިއަދު ހެނދުނު ކުރިއަށްގެންދިޔަ މި ހަރަކާތުގައި އަތޮޅު ކައުންސިލްގެ ރައީސް އާދަމް ނަސީރާއި ނައިބު ރައީސް އަހުމަދު އާތިފް އަދި އަތޮޅު ކައުންސިލްގެ އެހެން މެމްބަރުން ވަނީ ރުއް އިންދަވާފަ އެވެ. އަދި ބޭންކް އޮފް މޯލްޑިވްސްގެ ކުޅުދުއްފުށި ބުރާންޗް މެނޭޖަރ ގާސިމް އަބުދުއްކަރީމާއި ފެނަކަ ކޯޕަރޭޝަންގެ ރީޖަނަލް މެނޭޖަރ އާދަމް މުހައްމަދުވެސް ރުއް އިންދެވި އެވެ.
މީގެ އިތުރުން ވައިކަރަދޫ ކައުންސިލްގެ ރައީސް އާއި އަތޮޅުގެ އެހެން ރަށްރަށުގެ ކައުންސިލް މެމްބަރުންގެ އިތުރުން ދަނޑުވެރިކަމުގެ ދުވަހުގެ ހަރަކާތްތަކުގައި ބައިވެރިވި ކޮންމެ ރަށެއްގެ ފަރާތުން ވަނީ ރުކެއް އިންދާފަ އެވެ.
މި ޕްރޮގުރާމުގައި މިއަދު ވައިކަރަދޫ “ކައުންސިލުން ހިނގުމު”ގައި 17 ރުކާއި އަނބުގަހެއް އިންދާފައިވެ އެވެ.
ދަނޑުވެރިކަމުގެ ދުވަސް ފާހަގަކުރުމުގެ ގޮތުން ވައިކަރަދޫގައި ކުރިއަށްގެންދާ ހަރަކާތްތަކުގެ ތެރެއިން މިއަދު ހަވީރު ދަނޑުވެރިންނަށް ހާއްސަ ވޯރކްޝޯޕެއް ކުރިއަށްދާނެ އެވެ.
[yass cats=140]
