ބޮލުގެ ނާރެއް ފުފި ކުޅުދުއްފުށި ތުއްތު ކުއްޖަކު އެހީތެރިކަމަށް ބޭނުންވެފައި

ކުޅުދުއްފުށި ބޮންތި އައިމިނަތު މުހައްމަދާއި މާލެ ފަޅުގިރި އަހުމަދު ޝިފާޒުގެ ދަރި އުސްވާގެ ބޮލުގެ ނާރެއް ފުފުމުގެ ސަބަބުން ބޮލުގެ ސާޖަރީއެއް ހެދުމަށް ގިނަ އަދަދެއްގެ ފައިސާއަށް ބޭނުންވެ ވަނީ ދީލަތި އެހީއަށް ބޭނުންވެފަ އެވެ.

ކުޅުދުއްފުށި އޮންލައިނަށް އުސްވާގެ އާއިލާގެ ފަރާތުން މައުލޫމާތު ދެމުން އާދަމް މުހައްމަދު، ބޮންތި، ބުނީ އުސްވާ ބޮލުގައި ރިހި ހޮޑުލެވޭތީ އޭޑީކޭއަށް ދެއްކުމުން ފުރަތަމަ ބުނީ އެއީ ރޯގާ ކަމަށާއި ބޭސްދީ ފޮނުވާލީ ކަމަށެވެ. ބޭސް ކެއުމުން ރަނގަޅުވެފައި އެއް ހަފުތާ ފަހުން މާބޮޑަށް ބޮލުގައި ރިހޭތީ ހޮސްޕިޓަލަށް ދެއްކުމުން އެއީ މައިގްރޭން ކަމަށް ބެލެވޭތީ އޭޑީކޭ ހޮސްޕިޓަލުން ސީޓީ ސްކޭން ހެދީ ކަމަށް އާދަމް ކިޔައިދިނެވެ.

އާދަމް ބުނީ ސްކޭނަށްފަހު އޭޑީކޭއިން ބުނީ ޓިއުމަރަކަށް ނުވަތަ ނާރަކުން ލޭ ލީކްވަނީ ކަމަށް ވެދާނެ ކަމަށާއި އަވަހަށް ލަންކާއަށް ދިއުމަށެވެ. އާސަންދައިގެ އެހީގައި އުސްވާ އޭނާގެ މަންމަ އާއި ބައްޕައާއެކު ލަންކާއަށް ގޮސް ނީލޯކް ހޮސްޕިޓަލްއަށް ދިޔުމުން އެ ހޮސްޕިޓަލުން އެމްއާރުއައި ހެދުމަށްފަހު އެއީ ޓިއުމަރެއް ނޫން ކަމަށް ބުނި ކަމަށް އާދަމް ކިޔައިދިނެވެ.

އަދި ބޮލުގައި ރިހެންދިމާވާ ސަބަބަކީ އުސްވާގެ ބޮލުގައި ނާރެއް ފުފިފައި ހުރުން ކަމަށް އެ ހޮސްޕިޓަލުން ބުނާއިރު ނާރު 3.5 ސެންޓިމީޓަރަށް ފުފިފައިވާ ކަމަށްވެސް ހޮސްޕިޓަލުން ބުނި ކަމަށް އޭނާ ކިޔައިދިނެވެ.

ލޭލީކްނުވާ ކަމަށާއި އެ ހޮސްޕިޓަލުން ސާރޖަރީ ހެދޭނެ ކަމަށް ބުނުމުން ސާރޖަރީއަށް ވާންޖެހޭ ތައްޔާރީތައްވެ އުސްވާގެ ބޯ ބާލާ ސާރޖަރީހަދަން އޮތް ދުވަހު އެ ހޮސްޕިޓަލުން އެ ސާރޖަރީ ހެދެން ނެތް ކަމަށް ބުނި ކަމަށް އުސްވާގެ ބޮޑުބޭބެ ބުންޏެވެ.

އާދަމް އެ ހޮސްޕިޓަލާ ހަވާލާދީ ބުނީ މިއީ ވަރަށް ނުރައްކާތެރި ސާރޖަރީއެއް ކަމަށާއި ވަރަށް ކޮންޕްލިކޭޓެޑް ކޭސްއެއް ކަމަށެވެ. އަދި މި ސާރޖަރީ ހެދުމަށް އެ ހޮސްޕިޓަލުން ރިކަމެންޑް ކޮށްފައިވަނީ ސިންގަޕޫރުގެ މައުންޓް އެލްޒަބެތް ހޮސްޕިޓަލްގެ ޑރ.ޕިއްލޭ ކަމަށް އާދަމް ބުންޏެވެ.

ސިންގަޕޫރަކީ އާސަންދައިގެ ހިދުމަތް ލިބޭ ގައުމަކަށް ނުވާތީ އެ އާއިލާއަށް އެފަދަ ބޮޑު ހަރަދެއް ކުރުމަށް ވަނީ ނުކުޅެދިފަ އެވެ. ހަމައެކަނި ސާރޖަރީއަށް 31000 ޑޮލަރު ބޭނުންވާއިރު ހޮސްޕިޓަލްއަށް ދެއްކުމަށް ޑެޕޮސިޓްގެ ގޮތުގައި 20000 ޑޮލަރު ބޭނުންވެ އެވެ. އަދި އައިސީޔޫއަށް ލާންޖެހިއްޖެނަމަ 40000 ޑޮލަރު ބޭނުންވާނެ އެވެ.

އެހެންކަމުން އެ އާއިލާ ހެޔޮއެދޭ މީހުންގެ އެހީ އިންތިހާއަށް ބޭނުންވެފައިވާއިރު އެމީހަކަށްވެވުނު ވަރަކުން ކިތަމެން ކުޑަ އެހީއެއްވެސް ވެދެއްވާނެ ކަމަށް “ކުޅުދުއްފުށި އޮންލައިން”އިން އުއްމީދު ކުރަމެވެ.

އާއިލާއިން ކުޅުދުއްފުށި ސަފާޔާރ ފިހާރައިގައި މިއަދު ފަންޑް ފޮއްޓެއް ބެހެއްޓުމަށް ތައްޔާރުވަމުންދާއިރު މާލޭގައި އުސްވާގެ ސްކޫލް ކަމަށްވާ ދޮންދޫނި ސްކޫލްގެ ޓީޗަރުން އިސްނަގައިގެން ފަންޑް ފޮށްޓެއް ބަހައްޓާ މާލޭގެ މަގުތަކުގައި ފަންޑް ޖަމާކުރުމަށް މަސައްކަތްކުރާނެ ކަމަށް އާއިލާއިން މައުލޫމާތުދެ އެވެ. ސަފާޔަރ ފިހާރައިގެ އިތުރުން ކުޅުދުއްފުށީ ފެހިދޫލަ ފިހާރައާއި ހެތުރު އަދި ކުއަންޓަމްގައި ވެސް ފަންޑު ފޮއްޓެއް މިއަދު ބަހައްޓާނެ އެވެ.

އުސްވާއަށް އެހީވުމަށް ބޭނުންވާފުޅު ފަރާތަކުން 7783969 އަދި 9630240 މި ނަމްބަރުތަކަށް ގުޅުއްވައިގެން ނުވަތަ 7701346688001 މި އެކައުންޓަށް ރުފިޔާ ޖަމާކޮށްގެންވެސް އެހީތެރިކަން ފޯރުކޮށްދެވޭނެ އެވެ. އަދި ޑޮލަރުން އެހީތެރިވެ ދެއްވުމަށް ބޭނުންފުޅުވާ ފަރާތްތަކުން 7706346688103 މި އެކައުންޓަށް ޑޮލަރު ޖަމާކުރެވޭނެ އެވެ.

މާލެ ދޮންދޫނި ޕްރީސްކޫލްގެ އެލްކޭޖީ ގައި ކިޔަވަމުންދާ އުމުރުން ފަސް އަހަރުގެ އުސްވާއަށް އެހީތެރިވެދެއްވާށެވެ.