ކުޅުދުއްފުށީ ރީޖަނަލް ހޮސްޕިޓަލް ޓާޝަރީ ފެންވަރަށް ތަރައްގީކުރުމަށް 8 މިލިޔަންގެ ބަޖެޓެއް ހިމަނައިފި

Nov 11, 2014

ކުޅުދުއްފުށީ ރީޖަނަލް ހޮސްޕިޓަލް ޓާޝަރީ ފެންވަރަށް ބަދަލުކުރުމަށް ސަރުކާރުން ހިންގާ މަޝްރޫއުގެ ދަށުން އަންނަ އަހަރަށް ލަފާކޮށް މަޖިލީހަށް ފޮނުވި ބަޖެޓްގައި އެހޮސްޕިޓަލުގެ ފެންވަރު މަތިކުރުމަށް ހިންގުމަށް ހަމަޖެހިފައިވާ ޕްރޮޖެކްޓްތަކަށް 8 މިލިއަންނަށް ވުރެ ގިނަ ރުފިޔާ ބަޖެޓްގައި ހިމަނައިފި އެވެ.

ފެންވަރު މަތިކުރުމުގެ ގޮތުން މުހިއްމު ހަތަރު ޕްރޮޖެކްޓެއް ކުޅުދުއްފުށީ ރީޖަނަލް ހޮސްޕިޓަލްގައި ހިންގުމަށް ޖުމްލަ 8459850 ރުފިޔާ ބަޖެޓެއް އަންނަ އަހަރުގެ ބަޖެޓްގައި ހިމަނާފައިވެ އެވެ.

އެގޮތުން ހޮސްޕިޓަލުގެ އެކްސްޓެންޝަނަށް ހަރަދުކުރުމަށް އަންނަ އަހަރަށް 4829250 ރުފިޔާ ވަނީ ބަޖެޓްގައި ހިމަނާފަ އެވެ. އަދި އިންސިނެރޭޓަރ ބެހެއްޓުމަށް 830000 ރުފިޔާ ވެސް ވަނީ ބަޖެޓްކުރެވިފަ އެވެ.

ބެކަޕް ޖަނަރޭޓަރާއި އާއި ސިންކްރޮނައިޒް ޕެނަލް ބޯޑު ބެހެއްޓުމަށް ބަޖެޓްގައި ހިމަނާފައިވާ އިރު އެހޮސްޕިޓަލުގެ އިންފްރާސްޓްރަކްޗަރ އަޕްގުރޭޑިން މަސައްކަތަށް 1423100 ރުފިޔާ ހިމަނާފައިވެ އެވެ.

ބަޖެޓްގައި ހިމަނާފައިވާ އުތުރުގެ ރަށްތަކާ ގުޅުން ސިއްހީ ހިދުމަތްތަކަށް ބަލާލާއިރު ހއ ދިއްދޫ އަތޮޅު ހޮސްޕިޓަލުގައި ސިންކްރޮނައިޒް ޕެނަލް ބޯޑު ބެހެއްޓުމަށާއި ބެކަޕް ޖަނަރޭޓަރ ބެހެއްޓުމަށް 902928 ރުފިޔާ ބަޖެޓްގައި ހިމަނާފައިވެ އެވެ.

ހއ އަތޮޅުގެ 7 ސިއްހީ މަރުކަޒެއް އަޕްގުރޭޑް ކުރުމަށް ފަސް މިލިއަން ދެލައްކަ ފަސްދޮޅަށް ތިންހާސް ހަތް ސަތޭކަ ސާޅީ ރުފިޔާ ވެސް ވަނީ ބަޖެޓްގައި ހިމަނާފަ އެވެ. އެރަށް ތަކަކީ އިހަވަންދޫ ސިއްހީ މަރުކަޒާއި ބާރަށު ސިއްހީ މަރުކަޒު، މުޅަދޫ ސިއްހީ މަރުކަޒު އުތީމް ސިއްހީ މަރުކަޒު، ތަކަންދޫ ސިއްހީ މަރުކަޒު އަދި ވަށަވަރު ސިއްހީ މަރުކަޒުގެ އިތުރު ހޯރަފުށީ ސިއްހީ މަރުކަޒެވެ.

ށ. އަތޮޅު 3 ސިއްހީ މަރުކަޒެއް ވެސް ވަސީލަތްތައް އަޕްގުރޭޑް ކުރުމަށް ބޭނުންވާ ފައިސާ ވަނީ ހިމަނާފަ އެވެ. އެއީ އެއަތޮޅު ނޫމަރާ، ބިލެއްފަހި އަދި ކޮމަންޑޫ އެވެ. އެތިން މަރުކަޒަށް 1721250 ރުފިޔާ ބަޖެޓްގައި ޖަހާފައިވެ އެވެ.

ހދ. ނޮޅިވަރަމްފަރު ސިއްހީ މަރުކަޒަށް ލެބޯޓަރީއެއް ހެދުމަށާއި ސްޓޯރެއް އަދި ލޯންޑްރީއެއް އިތުރު ކުރުމަށް އެއްމިލިއަން ރުފިޔާ ބަޖެޓްގައި ހިމަނާފަވެ އެވެ.

ސިއްހީ އަދި އިޖުތިމާއި ކަންކަން ތަރައްގީކުރުމަށް ރައްޔިތުން މަޖިލީހަށް ފާސްކުރުމަށް ފޮނުވި ބަޖެޓުގައި ސިއްހީ އަދި އިޖުތިމާއި ކަންކަމަށް ޖުމްލަ 455288334 ރުފިޔާ ކަނޑައަޅާފައިވެ އެވެ

މިލިޔުމާއި ގުޅޭ