ނުކުޅެދުންތެރިކަން ހުންނަ އަންހެން ކުއްޖަކަށް ޖިންސީ ގޯނާ ކުރިކަމުގެ ތުހުމަތުގައި ކުރިނބީ މުސްކުޅިއަކު ހައްޔަރުކޮށްފި

ނުކުޅެދުންތެރިކަން ހުންނަ ކުޑަ އަންހެން ކުއްޖަކަށް ޖިންސީ ގޯނާ ކުރިކަމުގެ ތުހުމަތުގައި ކުރިނބީ މުސްކުޅިއަކު ހައްޔަރުކޮށްފި އެވެ.

ފުލުހުންގެ މީޑިއާ އޮފިސަރު ކުޅުދުއްފުށީ އޮންލައިނަށް މައުލޫމާތު ދެއްވަމުން ވިދާޅުވީ ނުކުޅެދުންތެރިކަން ހުންނަ ކުޑަ އަންހެން ކުއްޖަކާ ބަދުއަހްލާގީ އަމަލު ހިނގި ކަމުގެ ތުހުމަތުގައި އިއްޔެ ކުޅުދުއްފުށިން މީހަކު ހައްޔަރުކޮށްފައިވާ ކަމަށެވެ.

އޭނާ ވިދާޅުވީ ނުކުޅެދުންތެރިކަން ހުރި އުމުރުން 17 އަހަރުގެ އަންހެން ކުއްޖައާ ބަދުއަހްލާގީ އަމަލު ހިނގި ކަމުގެ ތުހުމަތުގައި އިއްޔެ 6:55 ހާއިރު އުމުރުން 60 އަހަރުގެ ފިރިހެނަކު ފުލުހުންގެ ބެލުމުގެ ދަށަށް ގެނެސްފައި ވާކަމަށެވެ.

ކުޅުދުއްފުށީ އޮންލައިނަށް އެނގިފައިވާ ގޮތުގައި ބަދުއަހްލާގީ އަމަލު ހިނގިގައިފައިވަނީ ކުމުންދޫ ކުއްޖަކާ އެވެ. އަދި އެކަމުގެ ތުހުމަތުގައި ފުލުހުން ހައްޔަރުކޮށްފައިވާ ދުވަސްވީ މީހަކީ ކުރިނބީ މުހައްމަދު ނަމަކަށް ކިޔާ މީހެކެވެ. އޭނާއަކީ އޮޑިއެއް ދުއްވާ މީހެއްކަމަށް މައުލޫމާތު ލިބިފައިވެ އެވެ. އޭނާ ހައްޔަރު ކޮށްފައިވަނީ ކުޅުދުއްފުށީގައި އުޅެނިކޮށެވެ.

މިމައްސަލަ ފުލުހުން ދަނީ އިތުރަށް ތަހުގީގު ކުރަމުންނެވެ.