އުސްވާގެ އޮޕަރޭޝަން ކާމިޔާބު: އާއިލާ

އުސްވާގެ ބޮލުގެ ނާރެއް ފުފި ކުއްލިގޮތަކަށް ކުރަންޖެހުނު އޮޕަރޭޝަން ކާމިޔާބު ކަމާއެކު އިއްޔެ ކޮށްފި އެވެ.

މި އޮޕަރޭޝަން ކޮށްފައިވަނީ ސިންގަޕޫރުގެ މައުންޓް އެލިޒަބަތް ހޮސްޕިޓަލްގަ އެވެ. އުސްވާގެ އޮޕަރޭޝަން ކާމިޔާބު ކަމަށް އޮޕަރޭޝަން ކުރި ޑރ. ޕިއްލޭއާ ހަވާލާދީ އާއިލާއިން ހާމަކުރެ އެވެ.

އުސްވާ އެއްކޮށް ރަނގަޅުވުމަށް 2 އަހަރާއި 3 އަހަރުގެ މުއްދަތެއް ނަގާނެ ކަމަށާއި ފުރަތަމަ ޗެކަޕް ހަދަން 3 މަހާއި 6 މަހާ ދެމެދު ސިންގަޕޫރަށް ދާން ޖެހޭނެ ކަމަށް ޑޮކްޓަރާ ހަވާލާދީ އާއިލާއިން ބުނެ އެވެ. އަދި ކޮންމެ 6 މަހަކުން ނުވަތަ ކޮންމެ އަހަރަކު އެއްފަހަރު ޗެކަޕް ހަދަންޖެހޭ ކަމަށްވެސް އާއިލާއިން ބުނެ އެވެ.

މައުންޓް އެލިޒަބަތް ހޮސްޕިޓަލްގެ ވޯރޑެއްގައި އުސްވާ އެޑްމިޓް ކުރެވިފައިވާއިރު މާދަމާ ޑޮކްޓަރު ބެލުމަށްފަހު ދޫކޮށްލާނެ ކަމަށްވެސް އުސްވާގެ އާއިލާއިން މައުލޫމާތުދެ އެވެ.

އުސްވާގެ އޮޕަރޭޝަނަށް އެތައް ލައްކަ ރުފިޔާ ބޭނުންވިއިރު މި ފައިސާ ވަނީ އެ އާއިލާއަށް ހެޔޮއެދޭ ފަރާތްތަކުން ހަދިޔާކޮށްދީފަ އެވެ. މާލެއާއި ކުޅުދުއްފުށީގެ އެތައް ތަނެއްގައި ފަންޑްރައިސް ކުރުމަށް ހަރަކާތްތައް ހިންގާފައިވާއިރު އެ ހަރަކާތްތަކަށް ބޮޑު ތަރުހީބެއް ލިބިގެން ގޮސްފައިވެ އެވެ.

އާސަންދައިގެ ހިދުމަތް ނުލިބޭ ސިންގަޕޫރަށް މި އޮޕަރޭޝަން ކުރަންދާން ޖެހުނީ އުސްވާގެ އޮޕަރޭޝަން ސްރިލަންކާއިން ނުހެދޭނެ ކަމަށް ބުނުމުންނެވެ. ވަރަށް މަދުން ނޫނީ ނުފެންނަ ސިކުނޑީގެ މި ބައްޔާ އުސްވާ ހަނގުރާމަ ކުރަމުންދިޔަ އިރު އޭނާގެ ބޮލުގެ ނާރެއް ވަނީ 3.5 ސެންޓިމީޓަރަށް ފުފިފަ އެވެ.

އުސްވާގެ އާއިލާއިން ވަނީ މި އުނދަގޫ ދަނޑިވަޅުގައި އެ އާއިލާއަށް އެހީތެރިކަން ފޯރުކޮށްދިން ހުރިހާ ފަރާތްތަކަކަށް ޝުކުރުއަދާކޮށްފަ އެވެ.