އެތުމާ ފިހާރަ ފަޅާލަން އުޅުނު ބަޔަކު ފުލުން ހައްޔަރު ކޮށްފި

ކުޅުދުއްފުށީ އެތުމާ ފިހާރަ ފަޅާލަން އުޅުން ބަޔަކު ފުލުން ހައްޔަރުކޮށްފި އެވެ.

ފުލުހުން މި ނޫހަށް މައުލޫމަތު ދިންގޮތުގައި މި މައްސަލަ ފުލުހުންނަށް ރިޕޯރޓް ކޮށްފައިވަނީ އިއްޔެ ރޭ ފަތިހު 4:35 ގައި ކަމަށާއި މައުލޫމާތު ލިބުމާގުޅިގެން ފުލުހުން ގޮސް ބެލިބެލުމުގައި ފިހާރަ ތަޅު ވަނީ ހަލާކުކޮށްލާފަ ކަމަށެވެ. ނަމަވެސް ފިހާރަ ތެރެއަށް ވަދެފައި ނުވާކަމަށް ވެސް ފުލުހުން މައުލޫމާތު ދެއެވެ.

ފުލުހުން ބުނީ މި މައްސަލައާ ގުޅިގެން ދެމީހަކު ހައްޔަރުކޮށްފައިވާ ކަމަށާއި އެއީ އެއީ 23 އަހަރުގެ ފިރިހެނަކާއި 26 އަހަރުގެ ފިރިހެނެއް ކަމަށެވެ. އަދި މި މައްސަލަ އިތުރަށް ތަހުގީގުކުރަމުންދާ ކަމަށްވެސް ފުލުހުން ބުނެ އެވެ.

މި ނޫހަށް މައުލޫމާތު ލިބިފައިވާ ގޮތުގައި މި މައްސަލައާ ގުޅިގެން ހައްޔަރުކޮށްފައިވަނީ ލިވަޕޫލް ހަސަން މުހައްމަދު އާއި ސާމާ ސޮލާހު މުހައްމަދެވެ.

މޫނު ފޮރުވައިގެން ތިބި ދެމީހަކު އެެތުމާ ފިހާރައިގެ ދޮރު އިސްކުރު އަނބުރާ ކަށިގަނޑަކުން ހަލާކުކޮށްލަން އުޅެނިކޮށް ފިހާރައިގައި ހަރުކޮށްފައިވާ ސީސީޓީވީ ކެމެރާއަށް ވަނީ އަރާފަ އެވެ.

ފިހާރައިގެ ދޮރު ހަލާކުކޮށްލުމަށް ގަޑިއިރަކަށްވުރެ ގިނައިރު އެމީހުން މަސައްކަތް ކޮށްފައިވެ އެވެ. އަދި ފުލުހުން އެމީހުން އަތުލައިގަނެފައިވަނީވެސް އެ މަސައްކަތުގައި އުޅެނިކޮށް ކަމަށް މައުލޫމާތުލިބެ އެވެ. އެތުމާ ފިހާރައިގައި ސީސީޓީވީ ކެމެރާ ހަރުކޮށްފައިވަނީ މި ހާދިސާ ހިނގި ދުވަހުގެ ކުރީ ދުވަހު އެވެ.