ރައީސް ދެއްވާ ހާއްސަ އިނާމް ކުޅުދުއްފުށީ ހާފިޒާ އަހުމަދަށް ލިބިއްޖެ

މަތީ ދަރަޖަ ހޯދާ ފަރާތްތަކަށް ރައީސުލްޖުމްހޫރިއްޔާ ދެއްވާ ހާއްސަ އިނާމް ކުޅުދުއްފުށި ރަންނާޅި ހާފިޒާ އަހުމަދަށް ލިބިއްޖެ އެވެ.

ޖުމްހޫރީ ދުވަހުގެ މުނާސަބަތުގައި މިއަދު ދަރުބާރުގޭގައި ބޭއްވި ހާއްސަ ޖަލްސާގައި އޭނާއަށް އެ އެވޯޑް ރައީސުލް ޖުމްހޫރިއްޔާ އަބްދުﷲ ޔާމީން އަބްދުލް ގައްޔޫމް އަރުވާފައިވަނީ ކުއްލިއްޔާއިން ބޭއްވި ބެޗްލަރ އޮފް އިސްލާމިކް ސްޓަޑީޒް ކޯހުން 1 ވަނަ ހޯދާފައިވާތީ އެވެ.

ހާފިޒާއަށް މެޑެއްޔަކާއި ހަނދާނީ ލިޔުމެއް ރައީސް އަރުވާފައިވާއިރު ހ ާފީޒާގެ އިތުރުން 20 ފަރާތަކަށް މި އެވޯޑް ލިބިފައިވެ އެވެ. އޭގެތެރޭގައި ހިމެނެނީ މަތީ ތައުލީމާއި ތަމްރީނުގެ ކޯހަކުން މަތީ ދަރަޖަ ހާސިލް ކުރި 16 ފަރާތަކަށާއި މަތީ ސާނަވީގައި ބައިވެރިވެ އެކައުންޓްސް މާއްދާއިން ދުނިޔެއިން އެއްވަނަ ހާސިލް ކުރި ދިވެހި ދަރިވަރުންނާއި އުފެއްދުންތެރި މަސައްކަތް ކުރެއްވި ފަރާތްތަކެވެ.

އަދި ބައިނަލްއަގްވާމީ މައުރަޒަކުން އާދަޔާ ހިލާފު ހުނަރެއް ދައްކާލައިގެން ދިވެހި ފިލްމު “އިނގިލިން” ދެއްކި މޮޅު އެކްޓިންގ އަށް މިސަރަހައްދުގެ އެންމެ މޮޅު އެކްޓަރުގެ އެވޯޑު ހާސިލް ކުރި އިސްމާއީލް ރަޝީދު (ކޮޕީ އިއްސެ)އަށް ވެސް ވަނީ ހާއްސަ އިނާމް ލިބިފަ އެވެ.

މީގެއިތުރުންވެސް މިއަދުގެ ރަސްމިޔާތުގައި 14 ބޭފުޅަކަށް ހިތްވަރު ދިނުމުގެ އިނާމާއި ދިވެހިބަހާއި އަދަބިއްޔާތުގެ ދާއިރާއިން، ދިވެހިބަހުގެ ލިޔުންތެރިކަން ކުރިއެރުވުމުގެ ރޮނގުން ޅ. ނައިފަރު، މީޒާން، މުހައްމަދު ޒަކަރިއްޔާ އާއި ކުޅިވަރުގެ ދާއިރާއިން ކުޅިވަރު ހިންގުމާއި ކުޅިވަރު ކުރިއެރުވުމުގެ ރޮނގުން ދެއްވީ ސ. ހިތަދޫ، އަރާއިރު، މުހައްމަދު ރަޝީދަށް ޝަރަފުވެރިކަމުގެ ގައުމީ އިނާމް ލިބިފައިވެ އެވެ.

މި ދެ ބޭފުޅުންނަށް ޝަރަފުގެ އައްޑަނަ އާއި ޝަރަފުގެ ބެޖްގެ އިތުރުން ހަނަދާނީ ފިލާ ވަނީ ރައީސް ދެއްވާފަ އެވެ. އަދި ހިތްވަރުދިނުމުގެ އިނާމް ލިބުން 14 ފަރާތަށްވެސް ހަނދާނީ ފިލާ ހަވާލުކޮށްދެއްވީ ރައީސް ޔާމީން އެވެ.