ހަށިގަނޑުގެ ހޫނުމިން އެއްވަރެއްގައި ހިފަހައްޓާނީ ކިހިނެތް؟

Nov 15, 2014

އަހަރެމެންގެ ހަށިގަނޑުގެ އާންމު ހޫނު މިނަކީ 37 ޑިގްރީ ސެލްސިއަސް އެވެ. ހަށިގަނޑުގެ ހޫނުމިނަށް މޫސުމުގެ ގޮތުންވެސް އެކި ބަދަލުތައް އާދެ އެވެ.

ހޫނުވެ ދާހިތްލުމަކީ ގިނަބަޔަކަށް ދިމާވަމުންދާ މައްސަލައަކަށް ވާއިރު ހިތުގެ ތެޅުމަށް އަންނަ ބަދަލާ އެކުވެސް ހަށިގަނޑުގެ ހޫނު މިނަށް ބަދަލު އާދެ އެވެ. އެގޮތުން މީހާ ބިރުގަނެ ހާސްވުމުން ދާހިތްލާ ގޮތް ދިމާވެ އެވެ. ހަށިގަނޑުގެ ހޫނުމިން އެއްވަރެއްގައި ނުހިފެހެއްޓިއްޖެނަމަ ބޯ އެބުރުމާއި ބަނޑުގައި ރިއްސުން އަދި ހަށިގަނޑުގެ އެތެރޭގެ ގުނަވަންތަކަށް ގެއްލުންވުން ފަދަ މައްސަލަތައް ދިމާވެއެވެ.

މިފަދަ މައްސަލަތަކުން ދުރުހެލިވުމަށްޓަކައި ކެއުމުގަ ހަށިގަނޑަށް ފައިދާ ހުރި ކާނާ ބޭނުން ކުރުމަކީ މުހިއްމު ކަމެކެވެ. އެގޮތުން ކަރާ ފަދަ ފެންގިނަ މޭވާ އާއި ތަރުކާރީ ބޭނުން ކުރާށެވެ. ކަރާގައި 90 ޕަސެންޓަކީ ފެނެވެ. އޭގެ އިތުރުން ކަރާއަކީ ގިނަ އަދަދަކަށް ވިޓަމިން އޭ އާއި ސީ ހިމެނޭ މޭވާ އެކެވެ.

ކިއުކަންބާ އަކީ ވެސް ފެން ގިނަ ތަރުކާރީ އެކެވެ. އަދި ކިއުކަންބާއަކީ ގިނަ އަދަދަކަށް ވިޓަމިން، ފޮސްފަރެސް އަދި ކެލްސިއަމް ވެސް ހިމެނޭ ބާވަތެކެވެ.

އޭގެ އިތުރުން ކުރުނބާ ފެނަކީވެސް ހަށިގަނޑުގެ ހޫނުމިން އެއްވަރެއްގައި ހިފެހެއްޓުމަށް މަސައްކަތްކޮށްދޭ އެއްޗެކެވެ. އަދި މޭބިސްކަދުރު އާފަލު، ޕެއަރސް ، ބެރީ އަދި އަންނާރު ފަދަ މޭވާތަކަކީވެސް ހަށިގަނޑުގެ ހޫނުމިން އެއްވަރެއްގައި ހިފެހެއްޓުމަށް ބޭނުން ކުރެވިދާނެ ފައިދާ ހުރި މެވާ ތަކެކެވެ.

ބަލިތަކުން ދުރުވެ ހަށިގަނޑު ރަނގަޅު ސިއްހަތެއްގައި ބެހެއްޓުމަށްޓަކައި ހަށިގަނޑުގެ ހޫނުމިން އެއްވަރެއްގައި ހިފެހެއްޓުމަކީ މުހިއްމު ކަމެކެވެ.

މިލިޔުމާއި ގުޅޭ