އެމްޑީޕީ ދިއްދޫ ދާއިރާއިން ބާއްވާ މަގުމަތީ ބާޒާރުގައި މޭޒު ބެހެއްޓުމުގެ ފުރުސަތު ހުޅުވާލައިފި

އެމްޑީޕީގެ ދިއްދޫ ދާއިރާގެ ފަރާތުން ދިއްދޫގައި ހާއްސަ ޖަމްބްލް ސޭލްއަކާއި މަގުމަތީ ބާޒާރެއް ބޭއްވުމަށް ހަމަޖައްސައި ބާޒާރުގައި މޭޒު ބެހެއްޓުމުގެ ފުރުސަތު ހުޅުވާލައިފި އެވެ.

މި ނޫހަށް މައުލޫމާތު ދެއްވަމުން އެމްޑީޕީގެ ދިއްދޫ ދާއިރާގެ ސެކްރެޓަރީ ޖެނެރަލް އަލީ ހާޝިމް ވިދާޅުވީ ގޮތުގައި މި ބާޒާރަކީ ދިއްދޫގެ އެމްޑީޕީ މެމްބަރުންނާއި އާންމުކޮށް ހުރިހާ ރައްޔިތުން އެއް މާހައުލެއްގައި ވިޔަފާރިކޮށްލައި ހިތް ފަސޭހަ ވަގުތު ކޮޅެއް ހޭދަކޮށްލުމުގެ ގޮތުން ބާއްވާ ބާޒާރެއް ކަމަށެވެ. އަދި ޕާޓީގެ ހަރަކާތްތައް އަލުން ފެށުމުގެ ގޮތުން ބޭއްވޭ ބާޒާރެއް ކަމަށްވެސް އަލީ ވިދާޅުވި އެވެ.

އެމްޑީޕީގެ ފަރާތުން ބާއްވާ މި މަގުމަތީ ބާޒާރުގައި ދިއްދޫގެ ބޮޑެތި ހުރިހާ ވިޔަފާރިވެރިންގެ މޭޒުތަކާއިި ޕާޓީގެ ޖަމްބްލް ސޭލް މޭޒުގެ އިތުރުން ކުޑަކުދިންގެ ސްޓޯލްތަކާއި ކެއިންބުއިމުގެ ހިދުމަތް ވެސް ލިބޭ ގޮތަށް ވަނީ ހަމަޖެހިފައިވާ ކަމަށް އޭނާ މައުލޫމާތު ދެއްވި އެވެ.

އަންނަ ހޮނިހިރުު ދުވަހުގެ ހެނދުނު 8.30 އިން ފެށިގެން 11.30 ގެ ނިޔަލަށް އަދި ހަވީރު 3.45 އިން ފެށިގެން އެރޭގެ 10.30 އާ ހަމައަށް މި ބާޒާރު ކުރިއަށް ގެންދިއުމަށް ހަމަޖެހިފައިވާއިރު މި ބާޒާރުގައި ގިނަ ވައްތަރުގެ މުދާ އަގުހެޔޮކޮށް ލިބޭނެ ގޮތް ހަމަޖެހިފައިވާ ކަމަށް ވެސް އަލީ ހާޝިމް ވިދާޅުވިއެވެ.

އަލީ ހާޝިމް ވިދާޅުވީ މި ބާޒަރަކީ ހަމައެކަނި ދިއްދޫގެ ވިޔަފާރިވެރިން ބައިވެރިވާ ބާޒާރެއް ނޫން ކަމަށާއި މި ބާޒާރުގައި ބައިވެރިވުމުގެ ފުރުސަތު ކޮންމެ ރަށެއްގެ ކޮންމެ ފަރާތަކަށްވެސް ހުޅުވިފައިވާ ކަމަށެވެ. ބާޒާރުގައި މޭޒު ބެހެއްޓުމަށް އެއްވެސް ފީ އެއް ނުނަގާއިރު ބާޒާރުގެ ހުރިހާ އިންތިޒާމެއް އެމްޑީޕީ ދިއްދޫ އޮފީހުން ހަމަހައްސައިދޭނެ ކަމަށްވެސް އަލީ ވިދާޅުވި އެވެ.

“މި ބާޒާރުގައި ބައިވެރިވާން އެދޭ ފަރާތްތަކަށް އަދި ވެސް ފުރުސަތު ހުޅުވިފައި އެބައޮތް. ދިއްދޫގެ އިތުރުން އެހެން ރަށްތަކުގެ މޭޒު ވެސް މި ބާޒާރުގައި ބެހެއްޓޭނެ. މިހާރު ވެސް ހއ ގެ 2 ރަށަކުން މޭޒުތައް އަންނާނެ ކަމަށް އަޅުގަނޑުމެންނަށް ވަނީ އަންގާފައި. މި ބާޒާރުގައި މޭޒުތައް ބެހެއްޓުމަށް އެއްވެސް ފީ އެއް ނުނަގާނެ. އަދި ބާޒާރުގެ ހުރިހާ އިންތިޒާމެއް ހަމަޖައްސަނީ އެމްޑީޕީގެ ދިއްދޫ ދާއިރާގެ އޮފީހުން. ދިއްދޫގައި މި ބާޒާރަށް ތައްޔާރުވުމުގެ ކަންތައްތައް މިހާރު ވަރަށް ފޯރީގައި ވަނީ ފެށިފައި” އަލީ ހާޝިމް ވިދާޅުވި އެވެ.

މި ބާޒާރުގައި ބައިވެރިވުމަށް ބޭނުންވާ ފަރާތްތަކުން ދާއިރާގެ އޮފީހުގެ ފޯން ނަންބަރު 7549269 އާ ގުޅުމުން އިތުރު މައުލޫމާތު ލިބޭނެ ކަމަށް ވެސް އޭނާ ވިދާޅުވި އެވެ.