އުރީދޫ ލޮކޭޓިން ޑިވައިސްގެ އާ ޕެކޭޖުތަކެއް ތައާރަފުކޮށްފި

އުރީދޫ މޯލްޑިވްސްއިން ޖީޕީއެސް ޓެކްނޮލޮޖީގެ އެހީގައި ވެހިކަލްތައް އުޅޭ ސަރަހައްދު ވަގުތުން ވަގުތަށް ސްމާޓްފޯނުތަކުން އަދި އިންޓަނެޓް މެދުވެރިކޮށް ކޮމްޕިއުޓަރުން ބަލާލެވޭ ހިދުމަތް ‘އުރީދޫ ލޮކޭޓް’ ތައާރަފްކޮށްފި އެވެ.

އުރީދޫއިން ބުނީ މި ހިދުމަތަކީ ހަރަދު ކުޑަ ގޮތެއްގައި އަމިއްލަ ވެހިކަލް، ކަނޑު އުޅަނދު އަދި ސްނޯކްލިންގ ކުރާ ފަރާތްތަކާއި ޒުވާންކުދިން އުޅޭ ސަރަހައްދު ފަސޭހަކަމާއެކު ދެނެގަނެވޭނެ އުފެއްދުމެއް ކަމަށެވެ.

އުރީދޫއިން ވަނީ ހަތަރު ޕެކޭޖެއް ތައާރަފްކޮށްފަ އެވެ. އެގޮތުން ޕާސަނަލް ޓްރެކިން އަކީ ޖީބަށް ލައިގެން ވެސް ގެންގުޅެވޭ ކުޑަ ޑިވައިސް އެވެ. މިއީ މޫދު ކުޅިވަރުތަކުގައި ހަރަކާތްތެރިވާ ފަރާތްތަކަށް ހާއްސަ އެއްޗެކެވެ. އޭގެ އިތުރުން އެއީ އިމަޖެންސީ ވަގުތުތަކުގައި އެއްކޮޅުން ގުޅާލެވޭ ޑިވައިސް އެކެވެ. އެ ޑިވައިސް ވިއްކަނީ މަހު ފީ އާއެކު 120ރ އަށެވެ.

އަނެއް ޕެކޭޖް ހާއްސަ ކޮށްފައި ވަނީ އެއްގަމާއި ކަނޑުމަތީ އުޅަނދު ފަހަރަށެވެ. މި ޑިވައިސް ސައިކަލާއި ޖެޓްސްކީގައި ވެސް ފަސޭހަކާ އެކު ހަރުކޮށްލެވެ އެވެ. ޕެކޭޖުގެ އަގަކީ 150ރ އެވެ. މި ޕެކޭޖާ އެކު 850 އެމްބީގެ ޑޭޓާ އެލަވަންސް ވެސް ލިބެ އެވެ.

ތިންވަނަ ޕެކޭޖަކީ ވެސަލް ޓްރެކިން އެކެވެ. މިއީ ބޮޑެތި ދޯނި ފަހަރާއި ޓެކްސީތަކުގައި ފަސޭހަކަމާ އެކު ބޭނުންކޮށްލެވޭ ޑިވައިސް އެވެ. މި ޕެކޭޖުގެ އަގަކީ 399ރ އެވެ. ޕެކޭޖުގައި އެއް ޖީބީގެ އެލަވަންސް ލިބެ އެވެ.

އުރީދޫން މިއަދު ތައާރަފުކުރި އަނެއް ޕެކޭޖަކީ ސެޓެލައިޓް ޓްރެކިން އެވެ. މި ޕެކޭޖު ހާއްސަކޮށްފައި ވަނީ ރާއްޖޭގެ ކަވަރޭޖް ލިބޭ ސަރަހައްދުން ބޭރަށް ދަތުރުކުރާ އުޅަނދު ފަހަރަށެވެ. މިއީ ޝިޕިން ކޮންޓެއިނާ ބޯޓު ފަހަރުގައި ބޭނުންކުރެވޭ ޑިވައިސް އެކެވެ. މި ޕެކޭޖުގެ އަގަކީ 1099ރ އެވެ. ޕެކޭޖުގައި އެއް ޖީބީގެ ޑޭޓާ އެލަވަންސް ލިބެ އެވެ.

މިޑިވައިސްތަކާއެކު ޕެކޭޖުތައް މިހާރު ރާއްޖޭގެ އެކިކަންކޮޅުތަކުގައިވާ އުރީދޫ އެކްސްޕީރިއަންސް ސެންޓަރުތަކުން ލިބެން ހުންނާނެ ކަމަށް އުރީދޫއިން ބުނެ އެވެ.