އަންނަ އަހަރު ޖަލާލުއްދީން ސްކޫލްގައި ބީޓެކް ސްޓްރީމް ފަށާނެ: މަހުދީ ޝާހިދު

އަންނަ އަހަރު ޖަލާލުއްދީން ސްކޫލްގައި ބީޓެކް ސްޓްރީމް ފަށާނެ ކަމަށް ޖަލާލުއްދީން ސްކޫލްގެ ޕްރިންސިޕަލް މަހުދީ ޝާހިދު ވިދާޅުވެއްޖެ އެވެ.

މަހުދީ މިހެން ވިދާޅުވީ މިއަދު ހަވީރު ހދ އަތޮޅު ތައުލީމީ މަރުކަޒުގެ ގްރޭޑް 7 ގެ ދަރިވަރުންގެ ގްރޭޖްއޭޝަން ހަފުލާ ޝަރަފުވެރިކޮށްދެއްވާ ވާހަކަ ދައްކަވަމުންނެވެ. ބީޓެކް ސްޓްރީމަކީ މާލޭގެ ބޮޑެތި ސްކޫލްތަކުގައި ކިޔަވަމުންގެންދާ ސްޓްރީމެއް ކަމަށާއި ރާއްޖޭގައި ބީޓެކް ސްޓްރީމްގައި ކިޔަވަނީ 4 ކޯހެއް ކަމަށް މަހުދީ ވިދާޅުވި އެވެ. އެއީ ސްޕޯޓްސް، އާރޓް އެންޑް ޑިޒައިން، ބިއުޓި ތެރަޕީ އަދި ޓްރެވެލް އެންޑް ޓޫރިޒަމް އެވެ.

ބީޓެކް ކޯސް އިހުތިޔާރުކުރުމުން މި ހަތަރު ކޯހުގެ ތެރެއިން އެއް ކޯސް ނެގުމުގެ ފުރުސަތު ލިބޭނެ ކަމަށާއި މި ސްޓްރީމްގައި މަޖުބޫރު 4 މާދަމާގެ އިތުރުން ދެން ނަގަންޖެހޭނީ އެއް ކޯސް ކަމަށް މަހުދީ ވިދާޅުވި އެވެ. އަދި ކޯހަކީ ހަތަރު މާއްދާއާ އެއް ފެންވަރުގެ ކޯހެއް ކަމަށާއި މި ކޯހުގައި ގިނައިން ނަގާނީ އެސައިމެންޓް ކަމަށް އޭނާ ވިދާޅުވި އެވެ.

މަހުދީ ވިދާޅުވީ އެޑެކްސަލްގެ ސެޓްފިކެޓެއް ލިބޭ މި ކޯހަކީ އައު ފުރުސަތެއް ކަމަށާއި ބައެއް މާއްދާތަކުން ދަށް ނަތީޖާ ލިބި މާޔޫސްވެފައިވާ ކުދިންނަށް މިއީ ރަނުގެ ފުރުސަތެއް ކަމަށެވެ.

“މި ސްޓްރީމްގައި ނަގަންޖެހެނީ މަޖުބޫރު ހަތަރު މާއްދާއާ އެކީ ކޮންމެވެސް އެއް ކޯހެއް. އެއިން ކޯހެއް ނެގީމާ ތިކުދިންނަށް އެ ލިބުނީ ގާތްގަނޑަކަށް އޯލެވެލްގެ ހަތަރު މާއްދާ. އޭރުން ނުޖެހޭނެ އެހާ ގިނަ ޓެސްޓް ހަދާކަށް އެކަމަކުވެސް ވަރަށް ބައިވަރު އެސައިމެންޓް ހަދަން ޖެހޭނެ. ތިކުދިންގެ ހުނަރުތައް ކުރިއެރުމަށް ވަރަށް ބޮޑު ފުރުސަތެއް ލިބިގެންދާނެ.” މަހުދީ ވިދާޅުވި އެވެ.

މަހުދީ ވިދާޅުވީ އޭނާއަކީ މިހާރު ހދ އަތޮޅު ހުރިހާ ސްކޫލެއް ކޯޑިނޭޓްކުރައްވާ ފަރާތް ކަމަށާއި އެހެންކަމުން މަސައްކަތް ކުރާނީ ޖަލާލުއްދީން ސްކޫލް އެކަނި ކުރި އަރުވަން ނޫން ކަމަށާއި ހުރިހާ ސްކޫލަކުން ގުޅިގެން މި އަތޮޅުގެ ހުރިހާ ސްކޫލެއް ފެންވަރު ރަނގަޅު ކުރުމަށް މަސައްކަތް ކުރާނެ ކަމަށެވެ.

އަތޮޅުގެ ހުރިހާ ސްކޫލެއް އިސްވެރިންނާ ކުރި ބައްދަލުވުމުގައިވެސް ނިންމާފައިވަނީ ވަކި ގްރޫޕެއް ހެދުމުގެ ބަދަލުގައި ހުރިހާ ސްކޫލަކުން ގުޅިގެން އެކުގައި މަސައްކަތް ކުރަން ކަމަށް ޖަލަލުއްދީން ސްކޫލްގެ ޕްރިންސިޕަލް ހަފުލާއާ މުހާތަބު ކުރައްވާ ވިދާޅުވި އެވެ.

މި ހާއްސަ ރަސްމިޔާތުގައި ސްކޫލްގެ 113 ދަރިވަރަކު ވަނީ ދަސްވެނިވެ ޖަލާލުއްދީން ސްކޫލަށް ބަދަލުވެފަ އެވެ. ދަސްވެނިވުނު ދަރިވަރުންނަށް އިނާމް ހަވާލުކޮށްދެއްވީ ޝަރަފުވެރި މެހެމާން މަހުދީ ޝާހިދެވެ.

އަދި މި ހަފުލާގައި ވަނީ މިއަހަރު އެ ސްކޫލް ދޫކޮށްދާ މުދައްރިސުންނަށް ހަނދާނީ ފިލާ ހަވާލުކޮށްފަ އެވެ. ހަނދާނީ ފިލާ ހަވާލުކޮށްދެއްވީ އޭއީސީގެ ޑެޕިއުޓީ ޕްރިންސިޕަލް އަހުމަދު އަބުދުﷲ އެވެ.

ސްކޫލްގެ ބެލެނިވެރިންގެ ފަރާތުންވެސް ވަނީ ގްރޭޑް 7ގައި ކިޔަވައިދެއްވާ ޓީޗަރުންނަށް ހަނދާނީ ފިލާ ދީފަ އެވެ. ހަނދާނީ ފިލާ ހަވާލުކޮށްދެއްވީ އެ ސްކޫލް ބޯޑްގެ ޗެއާރ ޕާރސަން އައިމިނަތު ގާސިމެވެ. .