ޖަލާލުއްދީން ސްކޫލުގެ ޘާނަވީ ނިންމި ދަރިވަރުންގެ ދަސްވެނިވުން ބާއްވައިފި

ޖަލާލުއްދީން ސްކޫލުގެ ސާނަވީ ނިންމި ދަރިވަރުންގެ ދަސްވެނިވުން ރޭ ބާއްވައިފި އެވެ.

ޖަލާލުއްދީން ސްކޫލްގެ ހޯލްގައި ރޭ ބޭއްވި މި ހާއްސަ ހަފުލާ ޝަރަވެރިކޮށްދެއްވާ ގައުމީ ޔުނިވަރސިޓިގެ ލެކްޗަރާ މުހައްމަދު އުމަރު ވިދާޅުވީ ސްކޫލް ނިމިގެން ނިކުންނަ ދަރިވަރުން ވާންވާނީ ސްކޫލުން ކިޔެވި އެއްޗެއް ބޭނުންހިފާ އެއިން މުޖުތަމައުއަށް ފައިދާއެއް ހޯދައިދޭ ބައެއް ކަމަށެވެ.

އަދި ލިބިފައިވާ ނިއުމަތްތަކަށް ޝުކުރުކޮށް ޓީޗަރުންނާއި މައިންބަފައިން ކޮށްދެއްވާ ހިދުމަތްތަކަށް ޝުކުރުވެރިވާ ބަޔަކަށް ވުމަށް މުހައްމަދު ގޮވާލެއްވި އެވެ.

“ސްކޫލުން ދަސްކޮށްދެނީ ތަފާތު މައުލޫމާތު. ގިނަ ފަހަރަށް ސްކޫލްތަކުން ދަސްކޮށްދެވެނީ މައުލޫމާތު. ހަގީގަތުގައި މައުލޫމާތުގެ ބޭނުނަހިފާ އެ މައުލޫމާތު އިލްމަށް ހެދުމުގެ ފުރުސަތު ލިބެނީ ސްކޫލް ނިންމާ މަސައްކަތުގެ މާހައުލަށް ނިކުތީމާ. މައުލޫމާތަކީ ތިޔަކުދިން ފޮތުން ކިޔަވާ ތަފާތު ޓެކްސްތައް. އެ ބޭނުންކޮށްގެން އަމަލީ ގޮތުން ބޭނުންކޮށްގެން މުޖުތަމައަށް ފައިދާހުރި އުފެއްދުމެއް އެއީ ކޮންމެ ކަހަލަ އުފެއްދުމެއް ކަމަށް ވިޔަސް އާ އިޖާދުތައް އާ އުފެއްދުންތަކެއް. އެކަމުގެ ބޭނުންހިފާ ބަޔަކަށްވުން އެއީ ވަރަށް މުހިންމު ކަމެއް.” މުހައްމަދު ވިދާޅުވި އެވެ.

ދަރިވަރުންނަން ޝޭޝް އާއި ސެޓްފިކެޓް ހަވާލުކޮށްދެއްވީ މި ހަފުލާތަކުގެ ޝަރަފުވެރި މެހެމާނުންނެވެ. ރޭގެ ރަސްމިއްޔާތުގައި ޖަލާލުއްދީން ސްކޫލްގެ 62 ދަރިވަރަކު ދަސްވެނިވިކަމުގެ ސެޓްފިކެޓް ހާސިލްކުރި އެވެ.

މިރަސްމިއްޔާތުގައި ޖަލާލުއްދީން ސްކޫލުގެ އިސްވެރިންނާ ދަރިވަރުން އަދި ބެލެނިވެރިން ބައިވެރިވި އެވެ.

ސާނަވީ ދަރިވަރުންގެ އޯލެވެލް އިމްތިހާނުގެ އެންމެ ފަހު އިމްތިހާން ހަދާފައިވަނީ އިއްޔެ އެވެ.

[yass cats=146]